Buku Jaŵili ja Mbili 12:1-16
12 Umwenye wa Lehobowamu pawagambile kutamilichika mwakulimbangana soni jwalakwe paŵagambile kuŵa jwamachili mnope, ŵalesile kukuya Chilamusi cha Yehofa. Nombenawo Ayisalayeli wosope ŵatesile yakulandana ni yaŵatesile jwalakwe.
2 M’chaka cha msano cha Mwenye Lehobowamu, Mwenye Sisaki jwa ku Iguputo ŵayiche kukuputa ngondo ni ŵandu ŵa mumsinda wa Yelusalemu. Yaliji myoyo ligongo lyakuti Ayisalayeliwo ŵatesile yindu mwangakulupichika kwa Yehofa.
3 Jwalakwe ŵayiche ni magaleta* gakwana 1,200, achalume ŵakwela pa mahachi ŵakwana 60,000, nambosoni gulu jekulungwa ja asilikali ŵangaŵalanjika. Asilikaliŵa ŵaliji ŵakutyochela ku Libiya, ku Sukimu, soni ku Itiyopiya.
4 Jwalakwe ŵasumwile misinda jakola yakulichenjela ja ku Yuda. Pambesi pakwe ŵayiche mumsinda wa Yelusalemu.
5 Sambano Semaya juŵaliji jwakulochesya, ŵayiche kwa Lehobowamu soni kwa ŵakulamulila ŵa ku Yuda ŵaŵasongene ku Yelusalemu ligongo lyakumjogopa Mwenye Sisaki. Paŵayiche kweleko, ŵasalile jemanjajo kuti, “Yehofa aŵechete kuti, ‘Ligongo lyakuti jemanja mundesile une, unesoni chinamleche jemanja ni kumpeleka mmyala mwa Sisaki.’”
6 Ali apikene yeleyo, ŵakulamulila ŵa Ayisalayeli pampepe ni mwenyewo ŵalinandiye, ni ŵaŵechete kuti, “Yehofa ali jwachilungamo.”
7 Yehofa paŵayiweni kuti jemanjajo alinandiye, Yehofajo ŵamsalile Semaya maloŵe gakuti, “Ŵanduŵatu alinandiye, myoyo nganajonangasoni jemanjaji. M’kandaŵi kamnono chinakulupusye. Nganawutumbililasoni msinda wa Yelusalemu mwakumkunda Sisaki kuti awujonanje.
8 Nambo mmalomwakwe chachiŵa ŵakutumichila ŵa Mwenye Sisaki. Chinjitenda yeleyo kuti amanyilile kulekangana pasikati pa kundumichila une ni kugatumichila mamwenye ga yilambo yine.”
9 Myoyo Mwenye Sisaki jwa ku Iguputo ŵayiche kukulimbana ni Yelusalemu. Jwalakwe ŵajigele chipanje cha m’nyumba ja Yehofa soni ŵajigele chipanje cha m’nyumba ja mwenye. Jwalakwe ŵajigele yosope, kupwatikapo yakuchijila yosope ya golide yaŵayipanganyisye Solomoni.
10 Myoyo Mwenye Lehobowamu ŵapanganyisye yakuchijila yine ya chisyano chakopa kuti yijinjile mmalo mwa yakuchijila ya golideyi. Kaneko ŵayipeleche yindu yeleyi kuti ayiloleleje achakulungwakulungwa ŵa alonda,* ŵaŵalondelaga mlango wakwawula ku nyumba ja mwenye.
11 Ndaŵi jilijose jayiche mwenye ku nyumba ja Yehofa, alondawo ŵayikaga m’nyumbamo ni kunyakula yakuchijilayo, kaneko ŵayiwuchisyaga kuchipinda cha alonda.
12 Ligongo lyakuti mwenyewo ŵalinandiye, Yehofa ŵalesile kwatumbilila, mwamti nganiŵapyajila mwenyewo pampepe ni ŵandu ŵakwe. Konjechesya pa yaŵatesile mwenyeŵa, yapalisoni yindu yine yambone yaŵayisimene mwa ŵandu ŵa ku Yuda.
13 Mwenye Lehobowamu ŵawulimbisye umwenye wakwe mu Yelusalemu soni ŵapitilisye kulamulila. Lehobowamujo ŵaŵele mwenye ali ni yaka yakwana 41. Jwalakwe ŵalamulile kwa yaka yakwana 17 ku Yelusalemu, wawuli msinda waŵawusagwile Yehofa pasikati pa mbumba syosope sya Ayisalayeli kuti kuŵe lina lyakwe. Mama ŵawo mwenyewo ŵaliji ŵa mtundu wa Chiamoni soni lina lyawo ŵaliji Naama.
14 Nambo Lehobowamu ŵatesile yakusakala ligongo nganasimichisya mumtima mwakwe yakumsosasosa Yehofa.
15 Pakwamba ya mbili jine ja Lehobowamu, yaŵatesile kundanda mpaka pambesi, yalembedwe m’buku ja jwakulochesya Semaya. Yalembedwesoni m’buku jakusala ya msela wakupagwila wa achinangolo jaŵalembile Ido jwakulola yamsogolo. Ndaŵi syejinji Lehobowamu soni Yelobowamu ŵatamilaga kuputana ngondo.
16 Pambesi pakwe, Lehobowamu ŵawile mpela mwayaŵelele ni achinangolo ŵakwe. Kaneko ŵamsichile m’malembe mumsinda wa Daudi. Panyuma pakwe Abiya juŵaliji mwanache jwakwe ŵaŵele mwenye mmalo mwa jwalakwejo.
Maloŵe Gamwiŵanda
^ Magaleta gali ngolo syakuwutidwa ni mahachi.
^ Mu Chihebeli ŵatiga, “ŵakuwutuka.”
