Buku Jaŵili ja Mbili 11:1-23
11 Lehobowamu paŵakopochele ku Yelusalemu, mwachitemachitema jwalakwe ŵasongangenye asilikali ŵakumanyilila kuputa ngondo* ŵakwana 180,000 ŵakutyochela mu mbumba* ja Yuda soni Benjamini. Ŵatesile yeleyi ni chakulinga chakuti apute ngondo ni Ayisalayeli pakusaka kuwuchisya umwenyewo kwa Lehobowamu.
2 Kaneko maloŵe ga Yehofa gamyichile Semaya mundu jwa Mlungu jusyesyene. Maloŵe gakwe galiji gakuti,
3 “Mkamsalile Lehobowamu mwanache jwa Solomoni mwenye jwa ku Yuda soni mkasalile Ayisalayeli wosope ŵa ku Yuda soni ku Benjamini kuti,
4 ‘Yehofa aŵechete kuti, “Mkajawula kukuputa ngondo ni achalongo achimjenu. Jwalijose awujile kumangwakwe, pakuŵa une ni jwandendekasisye yeleyi.”’” Myoyo jemanjajo ŵapikanile maloŵe ga Yehofa mwamti ŵawujile msimangwawo, nganajawula kukuputa ngondo ni Yelobowamu.
5 Lehobowamu ŵatamaga ku Yelusalemu soni ŵataŵile misinda jakola yakulichenjela ku Yuda.
6 Misinda jaŵataŵile jwalakwejo jaliji aji: Msinda wa Betelehemu, Etamu, Tekowa,
7 Beti-suli, Soko, soni msinda wa Adulamu.
8 Ŵataŵilesoni msinda wa Gati, Malesa, Sifi,
9 Adolayimu, Lakisi, Aseka,
10 Sola, Aijaloni, soni msinda wa Hebuloni. Jeleji ni misinda jajakwete yakulichenjela jajaliji ku Yuda soni ku Benjamini.
11 Konjechesya pelepa, jwalakwe ŵalimbisye mnope misinda jakola yakulichenjela ni kuŵika ŵakulongolela asilikali m’misindajo. Jwalakwe ŵapelechelagasoni kwa asilikaliwo yakulya, mawuta soni finyo.
12 Lehobowamu ŵaŵisilesoni yakuchijila yekulungwakulungwa soni mapanga m’misinda jakulekanganalekangana. Jwalakwe ŵajilimbisye misindajo ngaŵa masanje. Lehobowamu ŵapitilisye kulamulila ku Yuda soni ku Benjamini.
13 Ŵakutaga mbopesi soni Alefi ŵaŵaliji mu Isalayeli mosope ŵaliji kumbali ja jwalakwejo, mwamti jemanjajo ŵatyosile m’madela gawo gosope gaŵatamaga ni kwika kwa jwalakwejo.
14 Alefiwo ŵalesile malo gawo gakulichisya yilango soni malo gawo gaŵapochele mpela chipanje chawo. Jemanjaji ŵayiche kukutama ku Yuda soni ku Yelusalemu. Yaliji myoyo ligongo lyakuti Yelobowamu soni ŵanache ŵakwe ŵachalume ŵalekasisye jemanjajo kuti akatumichilaga mpela ŵakutaga mbopesi ŵa Yehofa.
15 Kaneko Yelobowamu ŵasagwile ŵakutaga mbopesi ŵakwe kuti ŵalongoleleje ŵandu pakutumichila kumalo gakwela. Jemanjaji ŵalongolelagasoni pakuyitindiŵalila yiŵanda yakuwoneka mpela mbusi soni pakuyitindiŵalila yiwanichisyo ya ŵanache ŵa ng’ombe yaŵayipanganyisye jwalakwejo.
16 Nambo ŵandu wosope ŵakutyochela mu mbumba sya Isalayeli ŵaŵakwete mtima wakumtumichila Yehofa Mlungu jwa Isalayeli, ŵakuyisye ŵakutaga mbopesi soni Alefi ŵaŵapite ku Yelusalemu ŵala. Ŵakuyisye jemanjajo kuti akapelecheje mbopesi kwa Yehofa Mlungu jwa achinangolo ŵawo.
17 Kwa yaka yitatu jemanjajo ŵakamuchisye pakuwulimbisya umwenye wa ku Yuda soni pakumkamuchisya Lehobowamu mwanache jwa Solomoni. Kwa yaka yitatu yeleyo jemanjajo ŵajesile m’matala gaŵajesile Daudi soni Solomoni.
18 Kaneko Lehobowamu ŵalombele Mahalati mwanache jwamkongwe jwa Yelimoti. Yelimoti ŵaliji mwanache jwamlume jwa Daudi. Jwalakwe ŵalombelesoni Abihayilo mwanache jwamkongwe jwa Jese. Jese jweleju ŵaliji mwanache jwamlume jwa Eliyabu.
19 Pali papite ndaŵi, jemanjaji* ŵaŵeleche ŵanache ŵachalume. Ŵanache ŵakwe ŵaliji Yeusi, Semaliya, soni Sahamu.
20 Kaneko Lehobowamu ŵalombele ŵakongwe ŵane lina lyawo Maaka ŵaŵaliji chisukulu cha Abisalomu. Pali papite ndaŵi jwalakwe ni ŵamkwakweŵa ŵaŵeleche Abiya, Atayi, Sisa, soni Selomiti.
21 Lehobowamu ŵamnonyelaga mnope Maaka chisukulu cha Abisalomu kupunda achiŵamkwakwe wosope soni achakongwe ŵane wosope ŵapambali. Jwalakwe ŵakwete achiŵamkwakwe 18, soni ŵalombele achakongwe ŵane ŵamasengo ŵakwana 60, mwamti ŵaŵeleche ŵanache ŵachalume 28 soni ŵanache ŵachakongwe 60.
22 Myoyo Lehobowamu ŵamsagwile Abiya mwanache jwamlume jwakuŵeleka Maaka kuti aŵe jwamkulungwa soni jwakulongolela pasikati pa achalongo achimjakwe. Ŵatesile yeleyi ligongo ŵasakaga kuti chamŵiche jwalakwejo kuŵa mwenye.
23 Nambope Lehobowamu ŵatesile yindu mwalunda. Jwalakwe ŵatumisye ŵane mwa ŵanache ŵakwe ku madela gosope ga ku Yuda soni ku Benjamini m’misinda josope jakola yakulichenjela kuti akatameje. Jwalakwe ŵapele ŵanache ŵakwewo yindu yejinji soni ŵasosele achakongwe ŵajinji kuti aŵe achiŵamkwawo.
Maloŵe Gamwiŵanda
^ Mu Chihebeli ŵatiga, “asilikali ŵakusagulidwa.”
^ Alole Kugopolela kwa Maloŵe Gane.
^ Pelepa akwamba Lehobowamu ni Mahalati.
