Buku Jaŵili ja Mbili 10:1-19
-
Ayisalayeli akumjimuchila Lehobowamu (1-19)
10 Sambano Lehobowamu ŵapite ku Sekemu, pakuŵa Ayisalayeli wosope ŵayiche ku Sekemuko kuti am’weche jwalakwejo umwenye.
2 Yelobowamu mwanache jwa Nebati paŵagambile kupikana yeleyi, ŵawusile kutyochela ku Iguputo, pakuŵa pandaŵijo ŵaliji chiŵela ku Iguputo ligongo lyakumtila Mwenye Solomoni.
3 Kaneko ŵandu ŵamŵilasisye Yelobowamu, mwamti jwalakwejo pampepe ni Ayisalayeli wosope ŵayiche kwa Lehobowamu ni kumsalila kuti,
4 “Baba ŵenu ŵatendekasisye likongwa lyetu kuŵa lyakupweteka. Nambo naga mmwejo mkutendekasya masengo gakupweteka ga baba ŵenu kuŵa gangasawusya, soni naga mkutupepuchisya likongwa lyakusitopesya lyaŵaliŵisile baba ŵenu pa m’weji, ni kuti m’wejo tuchimtumichila.”
5 Pelepo jwalakwe ŵajanjile ŵanduwo kuti, “Akayichesoni panyuma pa masiku gatatu.” Myoyo ŵanduwo ŵawujile kumangwawo.
6 Kaneko Mwenye Lehobowamu ŵapite kukuwusya lunda kwa ŵandu ŵachikulile* ŵaŵamtumichilaga Solomoni ŵali babagwe Lehobowamujo pandaŵi jiŵaliji umi. Jwalakwe ŵawusisye kuti, “Ana akuganisya kuti ngajanje yamtuli ŵandu ŵeleŵa?”
7 Jemanjajo ŵamjanjile kuti, “Naga mkwatendela yambone ŵandu ŵeleŵa soni kutenda yakwasangalasya ni kwajanga chenene, ŵandu ŵeleŵa chachiŵa ŵakutumichila ŵenu ndaŵi syosope.”
8 Nambo jwalakwe nganapikanila lunda lwaŵamsalile ŵandu ŵachikulile* ŵala. Mmalomwakwe ŵapite kuja kuwusya lunda kwa ŵachinyamata ŵaŵakusile yimpepe ni jwalakwejo. Pandaŵiji ŵachinyamata ŵeleŵa ŵaliji ŵakutumichila ŵakwe.
9 Jwalakwe ŵawusisye jemanjajo kuti, “Ana akuganisya kuti twajanje yamtuli ŵandu ŵambendile une ŵala kuti, ‘Mtupepuchisye likongwa lyaŵaŵisile baba ŵenu pa m’weji’?”
10 Anyamata ŵala ŵamjanjile kuti, “Ŵandu ŵakwaŵenda wawojowo kuti, ‘Baba ŵenu ŵatendekasisye likongwa lyetu kuŵa lyakusitopa, nambo mmwejo mkusosekwa kutupepuchisya,’ akajanje jemanjajo kuti, ‘Chala changu chamwana chichiŵe chejimbale kupunda chiwunu cha baba ŵangu.
11 Baba ŵangu ŵamtwichile jemanja likongwa lyakusitopa nambo une chinjonjechesye usito wa likongwa lyenulyo. Baba ŵangu ŵamkwapulaga jemanja ni yikoti wamba, nambo une chinjimkwapula ni yikoti yamiŵa.’”
12 Sambano Yelobowamu pampepe ni ŵandu wosope ŵala ŵayiche kwa Lehobowamu palisiku lyatatu, mpela muŵaŵechetele mwenyewo kuti, “Akayichesoni panyuma pa masiku gatatu.”
13 Nambo mwenyewo ŵajanjile jemanjajo mwachipongwe. Mwelemo ni muŵatendele Mwenye Lehobowamu pakukana maloŵe galunda gaŵampele ŵandu ŵachikulile.*
14 Jwalakwe ŵajanjile jemanjajo mwakamulana ni yaŵaŵechete ŵachinyamata achimjakwe ŵala kuti, “Chinjitendekasya likongwa lyenu kuŵa lyakusitopa, soni chinjijonjechesya usito wakwe kuti liŵe lyakusitopa mnope. Baba ŵangu ŵamkwapulaga jemanja ni yikoti wamba, nambo une chinjimkwapula ni yikoti yamiŵa.”
15 Myoyo mwenyewo nganiŵapikanila ŵanduwo, pakuŵa Mlungu jusyesyene ni juŵatendekasisye yeleyi. Yeleyi yaliji myoyo ni chakulinga chakuti gakwanilichikwe maloŵe ga Yehofa gakwawula kwa Yelobowamu mwanache jwa Nebati gaŵaŵechete kupitila mwa Ahiya jwa ku Silo.
16 Sambano Ayisalayeli wosope paŵayiweni kuti mwenyewo akanile kwapikanila, jemanjajo ŵawusisye mwenyewo kuti, “Ana mwa Daudi mwana chetu chilichose? M’wejitu pangali chatuchipochela mwa mwanache jwa Jese. Jemanja Ayisalayeli, jwalijose awujile kwa milungu jakwe. Sambano jemanja yisukulu ya Daudi chimlilamulileje jika basi.” Ni gele maloŵega Ayisalayeli wosope ŵawujile m’majumba gawo.*
17 Nambo Lehobowamu ŵapitilisye kwalamulila Ayisalayeli ŵaŵatamaga m’misinda ja ku Yuda.
18 Kaneko Mwenye Lehobowamu ŵamtumile Hadolamu juŵaliji jwakulolela ŵandu ŵaŵakamulaga masengo gakwakanganichisya kuti ajawule kwa Ayisalayeli. Pelepo Ayisalayeliwo ŵamponyisye maganga jwalakwejo mpaka kuwa. Nambo Mwenye Lehobowamu ŵakombwele kukwela ligaleta* lyawo ni kutilila ku Yelusalemu.
19 Kutandila pelepo Ayisalayeli aŵele ali mkujijimuchila nyumba ja Daudi mpaka lelojino.
Maloŵe Gamwiŵanda
^ Kapena kuti, “achakulungwa.”
^ Kapena kuti, “achakulungwa.”
^ Kapena kuti, “achakulungwa.”
^ Mu Chihebeli ŵatiga, “m’matenti gawo.”
^ Ligaleta lili ngolo jakuwutidwa ni mahachi.
