Buku Jaŵili ja Mbili 1:1-17
1 Ulamusi wa Solomoni mwanache jwa Daudi waŵele wamachili mnope, mwamti Yehofa Mlungu jwakwe ŵaliji ni jwalakwejo. Mlungu ŵamtendekasisye jwalakwejo kuŵa jwamachili mnope.
2 Solomoni ŵatumisye utenga wakwaŵilanga Ayisalayeli wosope. Ŵaŵilasile ŵakulongolela ŵa magulu ga ŵandu 1,000 soni ŵakulongolela ŵa magulu ga ŵandu 100, ŵakwelusya, nambosoni achakulungwakulungwa wosope ŵa Ayisalayeli ŵakulongolela m’maŵasa gakumanyika ni mena ga achinangolo ŵawo.
3 Kaneko Solomoni pampepe ni ŵandu wosope ŵaŵasongenewo ŵanyakwiche ni kwawula kumalo gakwela ku Gibiyoni, pakuŵa chitenti chakusimanilana cha Mlungu jusyesyene chaliji kweleko. Chitenti chelechi ni chiŵapanganyisye Mose jwakutumichila jwa Yehofa m’chipululu.
4 Nambope pandaŵiji Daudi ŵaliji ali ajigele kala Libokosi lya Chilanga lya Mlungu jusyesyene kutyochela ku Kiliyati-yelimu kwawula nalyo kumalo gaŵalinganyisye Daudijo kuti litameje. Jwalakwe ŵakunjile tenti ku Yelusalemu kuti libokosilyo liŵeje mwelemo.
5 Malo gakupelechela mbopesi gakopa gaŵalinganyisye Besaleli mwanache jwa Uli chisukulu cha Hula galiji kweleko pasogolo pa chitenti cha Yehofa. Solomoni pampepe ni ŵandu wosopewo ŵapopelaga pasogolo pa malo gakupelechela mbopesigo.*
6 Sambano Solomoni ŵapeleche mbopesi kweleko pameso pa Yehofa. Jwalakwe ŵapeleche mbopesi syakutinisya pamalo gakupelechela mbopesi gakopa ga ku chitenti chakusimanilanako. Nyama syaŵapeleche kuŵa mbopesi syakutinisya syaliji syakwana 1,000.
7 Lisiku lyelelyo chilo, Mlungu ŵawonechele kwa Solomoni ni kumsalila kuti, “Mŵende chindu chilichose chamkusaka kuti nampe.”
8 Pelepo Solomoni ŵamjanjile Mlungujo kuti, “Wawojo alosisye chinonyelo chakulupichika kwa Daudi baba ŵangu, soni ambisile une kuŵa mwenye mmalo mwa jwalakwejo.
9 Sambano wawo Yehofa Mlungu, aŵe ŵakulupichika ku chilanga chawo chaŵatesile kwa Daudi baba ŵangu, pakuŵa wawojo ambisile une kuŵa mwenye jwa ŵandu ŵajinji mnope mpela mchenga wapachilambo chapasi.
10 Sambano wawojo ambe une lunda, soni angamuchisye kuti mbe jwakumanyilila yindu kuti napakombole kwalongolela ŵanduŵa. Ana ŵani ŵampaka akombole kwawelusya ŵandu ŵawo ŵajinji mnopeŵa?”
11 Kaneko Mlungu ŵamjanjile Solomonijo kuti, “Mmwejo nganimŵenda kuti mkole katundu jwamjinji, chipanje soni uchimbichimbi, kapena kuŵenda kuti adani ŵenu awulajidwe, kapenasoni kuŵenda kuti mtame ni umi kwa ndaŵi jelewu.* Nambo mmalomwakwe mmwejo mŵendile kuti mkole lunda soni kuti mŵe ŵakumanyilila yindu, kuti mkombole kwawelusya ŵandu ŵangu ŵanampele kuti mwalamulilejeŵa. Ligongo lyakuti yeleyi ni yawusachile mtima wenu,
12 lundalo chinampe, soni chinamkamuchisye kuti mŵe ŵakumanyilila yindu. Nambo konjechesya pelepa, chinampesoni katundu jwamjinji, chipanje soni uchimbichimbi. Yindu yeleyi yichiŵa yejinji mnope kupunda mwayaŵelele ni mamwenye gagapali mmwejo mkaniŵe kuŵa mwenye, soni pangali mwenye jwine juchachikola yindu mpela yeleyi panyuma penu.”
13 Panyuma pakwe Solomoni ŵatyosile ku malo gakwela ku Gibiyoni kuchaliji chitenti chakusimanilana kula ni kwawula ku Yelusalemu. Jwalakwe ŵapitilisye kwalamulila Ayisalayeli kweleko.
14 Solomoni ŵapitilisye kupata magaleta* soni mahachi* gejinji. Jwalakwe ŵakwete magaleta gakwana 1,400, soni mahachi* gakwana 12,000. Solomoni ŵayisunjile yindu yeleyi chiŵandika ni jwalakwejo ku Yelusalemu, m’misinda jakusunjila magaleta.
15 Mwenyewo ŵatendekasisye kuti ku Yelusalemu kusimanikweje silifa soni golide jwamjinji mpela maganga wamba. Ŵatendekasisyesoni kuti matabwa ga mkungusa gaŵeje gejinji mpela yitela yamkuju ya ku Sefela.
16 Mahachi ga Solomoni ŵagaŵilasyaga kutyochela ku Iguputo. Gulu ja ŵamalonda ŵakwendajenda ŵa mwenyewo jasumaga mahachigo m’magulu pamtengo waŵawutamilikasisye.*
17 Ligaleta lililyose lyaŵaŵilasyaga kutyochela ku Iguputo ŵalisumaga pamtengo wa mbiya sya silifa syakwana 600, soni hachi ŵajisumaga pamtengo wa mbiya sya silifa syakwana 150. Kaneko jemanjajo ŵayisumisyaga yeleyi kwa mamwenye gosope ga Ahiti soni kwa mamwenye ga ku Siliya.
Maloŵe Gamwiŵanda
^ Kapena kuti, “ŵawusyaga lunda kwa Mlungu pelepo.”
^ Mu Chihebeli ŵatiga, “mtame masiku gejinji.”
^ Magaleta gali ngolo syakuwutidwa ni mahachi.
^ Kapena kuti, “ŵakwela pa mahachi.”
^ Kapena kuti, “ŵakwela pa mahachi.”
^ Kagopolele kanesoni, “kutyochela ku Iguputo soni ku Kuwe. Ŵamalonda ŵa mwenyewo ŵayisumaga yeleyi kutyochela ku Kuwe pamtengo waŵawutamilikasisye.” Komboleka kuti ku “Kuwe” kwaliji ku Kilikiya.
