Ayimwene Jaŵili 9:1-37
9 Kaneko jwakulochesya Elisa ŵamŵilasile jumo mwa ŵanache ŵa ŵakulochesya ni kumsalila kuti, “Mtaŵilile yakuwala yenu m’chiwunu mwenu, soni mwachitemachitema mjigale libotolo lya mawuta ali ni mjawule ku Lamoti-giliyadi.+
2 Patimkayiche kweleko, mkamlolesye Yehu+ mwanache jwa Yehosafati jwali chisukulu cha Nimusi. Kweleko mkajinjile m’nyumba ni mkamŵilanje jwalakwe pasikati pa achalongo achimjakwe ni kwinjila najo m’chipinda chamkati mnope.
3 Kaneko mkajigale libotolo lya mawutalyo ni kumtaga jwalakwe pamtwe pakwe ni mkaŵechete kuti, ‘Yehofa aŵechete kuti, “Une ngumsagula mmwejo kuŵa mwenye jwa Ayisalayeli.”’+ Pachimkatende yeleyi mkawugule litanga ni kutila mwachitemachitema.”
4 Myoyo jwakutumichila jwa jwakulochesyajo ŵawutandite ulendo wakwawula ku Lamoti-giliyadi.
5 Paŵayiche kweleko ŵasimene ŵakulongolela ŵa gulu ja asilikali ali atemi. Kaneko ŵasalile kuti, “Mbiche ni utenga wawo, ambuje ŵangu.” Yehu ni ŵamwusisye jwalakwejo kuti, “Pa ŵandu ŵatuli apanowe, ni ŵani ŵamkusaka mwasalile utengawo?” Jwalakwe ni ŵajanjile kuti, “Utengawo uli wa wawojo ambuje ŵangu.”
6 Myoyo Yehu ŵanyakwiche ni kwinjila m’nyumba. Pelepo jwakutumichilajo ŵamtasile jwalakwe mawuta pamtwe pakwe ni kumsalila kuti, “Yehofa Mlungu jwa Isalayeli juŵechete kuti, ‘Une ngumsagula mmwejo kuti mŵe mwenye jwa ŵandu ŵa Yehofa, Ayisalayeli.+
7 Mmwejo mkusosekwa mwawulaje ŵandu ŵa m’nyumba ja ambuje ŵenu, Ahabu. Une chinjawuchisya jemanjaji ligongo lya myasi ja ŵakutumichila ŵangu ŵaŵaliji ŵakulochesya, soni ligongo lya ŵakutumichila wosope ŵa Yehofa ŵaŵawile mmyala mwa Yesebele.+
8 Ŵandu wosope ŵa m’nyumba ja Ahabu chachiwulajidwa, nambosoni chinjipyajila achalume wosope ŵa m’liŵasa lya Ahabu, atamose jwalijose jwanganaŵa akombwele kulichenjela soni jwalijose jwanganakola machili mu Isalayeli.+
9 Chinjitendekasyasoni nyumba ja Ahabu kuti jiŵe mpela nyumba ja Yelobowamu+ mwanache jwa Nebati soni mpela nyumba ja Basa+ mwanache jwa Ahiya.
10 Nambosoni pakwamba ya Yesebele, mbwa sichimtawuna jwalakwe mumgunda wa ku Yeseleeli+ soni pangali juchachimsika jwalakwejo m’malembe.’” Paŵaŵechete yeleyi, jwakutumichila jula jwawugwile litanga ni kutanda kutila.+
11 Sambano Yehu paŵawujile kuŵaliji ŵakutumichila ŵa ambuje ŵakwe ŵala, jemanjajo ŵamwusisye jwalakwejo kuti, “Nambo yosope yili chenene? Ana mundu jwamasokaju juyicheje kukutenda chichi?” Pelepo jwalakwe ŵajanjile jemanjajo kuti, “Jemanja mummanyi chenene mundu jweleju, soni myimanyi yakusanonyela kuŵecheta.”
12 Nambo jemanjajo ŵamjanjile jwalakwejo kuti, “Unamitu wele. Chonde mtusalile yisyesyene.” Pelepo Yehu ŵasalile jemanjajo yaŵaŵechete mundujo. Jwalakwe jwaŵechetesoni kuti, “Mundujo asalilesoni une kuti, ‘Yehofa aŵechete kuti, “Ngumsagula mmwejo kuti mŵe mwenye jwa Ayisalayeli.”’”+
13 Paŵapikene yeleyi, mwachitemachitema jemanjajo ŵajigele yakuwala yawo ni kuyitandika pasi pamasitepe kuti jwalakwe apondepo.+ Kaneko jemanjajo ŵagombile lipenga lya msengo ni kuŵecheta kuti, “Sambano Yehu ali mwenye!”+
14 Kaneko Yehu+ mwanache jwa Yehosafati juŵaliji chisukulu cha Nimusi ŵamlinganyichisye chiwembu Yeholamu.
Yeholamu pampepe ni Ayisalayeli wosope ŵaliji ali mkuwulolela msinda wa Lamoti-giliyadi+ ni chakulinga chakuti Mwenye Hasaele+ jwa ku Siliya akawujimuchila.
15 Kaneko Mwenye Yeholamu ŵawujile ku Yeseleeli+ kuti akapole maŵanga gakwe gaŵamwulesye ŵandu ŵa ku Siliya pandaŵi jiŵamenyanaga ni Mwenye Hasaele jwa ku Siliya.+
Sambano Yehu jwaŵechete kuti, “Naga jemanja chimkamulane nayo, mkamkunda mundu jwalijose kukopoka mumsinda awuno ni kwawula ku Yeseleeli kuja kusala ngani jeleji.”
16 Kaneko Yehu ŵakwesile ligaleta* lyakwe ni kuwutanda ulendo wakwawula ku Yeseleeli, pakuŵa kweleko ni kuŵalwalilaga Yeholamu ligongo lya kuwulala kwakwe kula, mwamti Mwenye Ahasiya jwa ku Yuda jwapite kweleko kukumlola Yeholamujo.
17 Sambano mlonda juŵajimi pa sanja ku Yeseleeliko ŵajiweni gulu ja achalume ŵaŵaliji ni Yehu jili mkwika. Ndaŵi jijojo mlondajo ŵaŵechete kuti, “Ngujiwona gulu ja ŵandu jili mkwika.” Pelepo Yeholamu ŵamsalile jwalakwejo kuti, “Mumsalile mundu jwakwela pa hachi kuti ajawule akasimane nawo soni akawusye kuti, ‘Ana akwichila ya mtendele?’”
18 Myoyo mundu jwakwela pa hachijo jwapite kukusimana ni Yehu ni ŵamsalile kuti, “Mwenye akuwusya kuti, ‘Ana akwichila ya mtendele?’” Nambo Yehu ŵamjanjile jwalakwejo kuti, “Mkumanyilila yamtuli mmwejo pakwamba ya ‘mtendele’? Mjawule kunyuma kwanguku ni munguyeje.”
Kaneko mlonda jula ŵapeleche utenga wakuti, “Mundu jwatumtumile julatu asimene ni ŵandu ŵala nambo jwalakwe nganawuja.”
19 Myoyo jwalakwe jwatumisyesoni mundu jwine jwakwela pa hachi. Mundujo paŵasimene jemanjajo jwaŵechete kuti, “Mwenye akuwusya kuti, ‘Ana akwichila ya mtendele?’” Nambo Yehu ŵamjanjile jwalakwejo kuti, “Mkumanyilila yamtuli mmwejo pakwamba ya ‘mtendele’? Mjawule kunyuma kwanguku ni munguyeje.”
20 Kaneko mlonda jula ŵapelechesoni utenga wakuti, “Mundu jwatumtumile julatu asimene ni ŵandu ŵala nambo jwalakwesoni nganawuja. Nambo yakuti ŵanduwo kawutuche yikuwoneka kuti pana Yehu chisukulu cha Nimusi, ligongo jwalakwe akusawutusya ligaleta mpela jwamasoka.”
21 Myoyo Yeholamu ŵatite, “Ataŵilile mahachi ku ligaleta.” Pelepo ŵanduwo ŵataŵilile mahachi ku ligaleta lyakwe, mwamti Mwenye Yeholamu jwa ku Isalayeli soni Mwenye Ahasiya+ jwa ku Yuda ŵanyakwiche jwalijose pa ligaleta lyakwe kuti akasimane ni Yehu. Jemanjaji ŵasimene ni jwalakwe pa mgunda wa Naboti+ jwa ku Yeseleeli.
22 Yeholamu paŵagambile kumwona Yehu ŵamwusisye kuti, “Yehu, ana mkwichila ya mtendele?” Nambo Yehujo jwajanjile kuti, “Ana chipaŵe uli mtendele chitamilecho pali pana uhule wa mama ŵenu, Yesebele,+ soni pali mkutendekwa yamasenga yejinji ya jwalakwe?”+
23 Ndaŵi jijojo Yeholamu ŵagalawisye ligaleta lyakwe ni kutanda kutila, soni ŵamsalile Ahasiya kuti, “Ahasiya, ŵanduŵa atujesile pasi.”
24 Pelepo Yehu ŵajigele ukunje wakwe ni kumsoma Yeholamujo kunyuma pasikati pa makoyo gakwe, mwamti mpambawo wajinjile mkati mpaka wakopochele pamtima pakwe. Kaneko jwalakwe jwagwilile mu ligaleta lyakwe lya ngondolyo.
25 Kaneko Yehu, ŵamsalile Bidikali juŵaliji jwamkulungwa jwa asilikali ŵakwe kuti, “Mumnyakule aju ni mumjase mumgunda wa Naboti jwa ku Yeseleeli.+ Mkaliŵalila kuti mmwejo ni une twamkuyaga Ahabu, babagwe Yeholamuju, tuli tukwesile pa magaleta pandaŵi jele Yehofa jwaŵechete maloŵe gakumtembelela* Ahabujo.+
26 Pajatu Yehofa jwaŵechete kuti, ‘“Panajiweni myasi ja Naboti+ soni myasi ja ŵanache ŵakwe liso, nasimichisye mumtima kuti chinjimwuchisya+ mmwejo mumgunda uwuwu.” Jwaŵechete myoyo Yehofa.’ Myoyo mumnyakule jwalakwejo ni mumjase mumgundamo mwakamulana ni maloŵe gaŵaŵechete Yehofa.”+
27 Sambano Mwenye Ahasiya+ jwa ku Yuda paŵayiweni yayatendekwagayi jwatandite kutila ni kwinjililaga ku msewu wa kunyumba ja kumgunda. (Kaneko Yehu ŵatandite kumtoposya jwalakwejo, ni ŵaŵechete kuti, “Amsomesoni jwelejo.” Myoyo achalumewo ŵamsomile jwalakwejo ali mu ligaleta pa litala lyakwawula ku Guli chiŵandika ku Ibuleyamu.+ Nambo jwalakwejo ŵapitilisye kutila mpaka ŵajile kwika ku Megido mwamti jwawilile kweleko.
28 Kaneko ŵakutumichila ŵakwe ŵamnyakwile jwalakwe mu ligaleta lyakwe ni kwawula najo ku Yelusalemu. Kweleko ŵamsichile m’malembe gakwe mu Msinda wa Daudi mpela muyaŵelele ni achinangolo ŵakwe.+
29 Ahasiya+ jwaŵele mwenye ku Yuda mu chaka cha 11 cha Yeholamu mwanache jwa Ahabu.)
30 Yehu paŵayiche ku Yeseleeli,+ Yesebele+ ŵapikene kuti jwalakwe ayiche. Myoyo Yesebele ŵapachile meso gakwe yakulisalalichisya yepiliwu, soni ŵatiŵile chenene wumbo syakwe kaneko ŵajile kwima pa liwindo ni kulingulilaga pasi.
31 Sambano Yehu paŵajinjile kupitila pa geti, Yesebele jwaŵechete kuti, “Ana yindu yamjendele chenene Simuli juŵawuleje ambuje ŵakwe?”+
32 Yehu paŵalolite kwinani pa liwindopo, jwawusisye kuti, “Ana ŵani ŵali kumbali jangu? Nguti ŵani?”+ Ndaŵi jijojo nduna sya mwenye siŵili kapena sitatu syamlingulile jwalakwe kupitila pa liwindolyo.
33 Pelepo Yehu jwaŵechete kuti, “Amponye pasi jwelejo.” Myoyo jemanjajo, ŵamponyisye pasi mwamti myasi jakwe jine jamisichile pepupa soni pa mahachi, kaneko Yehu ŵampondilepondile jwalakwe.
34 Panyuma pakwe jwalakwe ŵajinjile m’nyumba ni kutanda kulya soni kumwa. Kaneko jwalakwe jwaŵechete kuti, “Akamjigale jwamkongwe jwamtembeleledwejo* ni kuja kumsika m’malembe. Pajatu jwalakwe ali mwanache jwa mwenye.”+
35 Nambo ŵanduwo paŵapite kuti akamsiche jwalakwejo m’malembe, ŵagambile kumsimana kuti asigele mtwe, sajo* soni magasape basi.+
36 Jemanjajo paŵawujile kwa Yehu ni kumsalila yeleyi, jwalakwe ŵatite, “Yeleyi yitendekwe mwakamulana ni maloŵe ga Yehofa+ gaŵaŵechete kupitila mwa jwakutumichila jwakwe Eliya, jwa ku Tisibe. Paja jwalakwe jwatite, ‘Mbwa sichimtawuna Yesebele mumgunda wa ku Yeseleeli.+
37 Nambosoni mtembo wa Yesebele uchiŵa manyowa pa litaka lya mumgunda wa ku Yeseleeli, ni chakulinga chakuti ŵandu akasaŵecheta kuti, “Ajutu ni Yesebele jula.”’”
Maloŵe Gamwiŵanda
^ Alole mbali jakuti, Kugopolela kwa Maloŵe.
^ Ŵane akusati “gakumlwesa.”
^ Ŵane akusati “jwamlwesechejo.”
^ Ŵane akusati “makawu.”
