Chikalata Chaŵili Chakwawula kwa Akolinto 12:1-21
12 Ngusosekwa kulilapilila kwene, atamose kuti yeleyi nganiyiŵa yakamuchisya. Myoyo chisalepe yakwamba yindu yaŵandosisye+ Ambuje+ soni utenga waŵamanyikasisye une.
2 Ngummanyilila mundu jwinejwakwe jwali jwakulijiganya jwa Klistu, jwele yaka 14 yipiteyo ŵajigalidwe kwawula kwinani mwakusisimuchisya. Chinga yeleyi yatendekwe ali ni chilu chisyesyenechi kapena iyayi, une yeleyo nganguyimanyilila, nambo Mlungu ni jwakuyimanyilila.
3 Nditu une ngummanyilila mundu jwelejo. Chinga ŵajigalidwe ali ni chilu chisyesyenechi kapena iyayi, une yeleyo nganguyimanyilila, nambo Mlungu ni jwakuyimanyilila.
4 Mundu jweleju ŵajigalidwe mwakusisimuchisya ni kumjawusya ku paladaiso. Kweleko ŵapikene maloŵe gele mundu nganaŵa amkundile kugaŵecheta kapena kwasalila ŵane.
5 Myoyo chinalilapilile ligongo lya mundu jwelejo. Ngangusaka kulilapilila ligongo lya une namsyene, nambo naga ngusaka kulilapilila chinalilapilile ligongo lya kusoŵa kwa machili gangu.
6 Atamose ndili mkusaka kulilapilila, nganimba mboneche mpela mundu jwangali lunda, pakuŵa chimbe ndili mkuŵecheta yisyene. Nambo ngindenda yeleyo, pakogopela kuti mundu jwine mpaka atande kumbona mpela jwakusosekwa mnope kupunda yindu yaŵayiweni mwa une kapena yaŵambikene ndili mkuŵecheta.
7 Ngangusaka kuti ŵandu amboneje myoyo ligongo lya yakusimonjesya yele Mlungu ŵamanyisye une.
Myoyo kuti ngaŵa jwakulikwesya mnope, ŵambele chakusoma mpela miŵa m’chilu mwangu+ lyalili lilayika lya Satana, kuti limbuteje ndaŵi syosope, ni chakulinga chakuti ngaŵa jwakulikwesya mnope.
8 Naŵendile Ambuje kwa maulendo gatatu kuti andyochesye chakusoma chelechi.
9 Nambo Ambujewo ŵasalile kuti, “Umbone mtima wangu wekulungwa uli wakwanila kwa mmwejo, pakuŵa machili gangu gakusaŵa gakwanila naga mmwejo mli ŵangali machili.”+ Myoyo, chinjililapilila mwakusangalala ligongo lya ungali machili ŵangu, ni chakulinga chakuti machili ga Klistu gapitilisye kuŵa pa une mpela kuti chitenti chimbunichile.
10 Ngusaŵaga jwakusangalala pandili jwangali machili, ŵane pakunyosya, pandaŵi jangusoŵa yindu, pandaŵi jakundagasya soni pangusimana ni yakusawusya ligongo lya Klistu. Yili myoyo ligongo lyakuti pandili jwangali machili ni pangusapatasoni machili.+
11 Sambanotu mbele mpela jwangali lunda. Nambotu jemanja ni ŵamundendekasisye kuti mbe myoyo, ligongo ni ŵamwasosekwaga kuŵecheta yambone ya une. Pakuŵa une nganimba jwakutuluka ata panandi pameso pa ŵandumetume ŵenu ŵapenaniwo, atamose kuti ndili jwangali mate pameso penu.+
12 Nditu, une nalosisye kwa jemanja kuti ndili ndumetume jusyesyene. Jemanja mwakuweni kupilila kwangu,+ mwayiweni yimanyisyo soni yakusimonjesya nambosoni masengo gamachili ganatesile pasikati penu.+
13 Ana jemanja mwaŵele ŵangachimbichika kulekangana ni mipingo jine josope? Mwinetu mwaŵele ŵangachimbichika pa ligongo lyakuti nganinamsitopesya mwakumŵenda yindu.+ Mungululuchile chonde pakulemwa kwanguku.
14 Akano kali katatu kuŵa jwakoseka kuti yiche kwa jemanja, nambo pachinjiyika ngasimba jwakumsitopesya. Pakuŵa ngangusaka yindu yenu,+ nambo ngumsaka jemanja. Pajatu ŵanache+ ngakusasosekwa kwasunjila chipanje achinangolo ŵawo, nambo achinangolowo ni ŵakusasosekwa kwasunjila chipanje ŵanache ŵawo.
15 Kwa une, chinjiŵa jwakusangalala kupeleka yangu yosope ligongo lya jemanja soni chinjiŵa jwakusachilila kuti jemanja mkamulichisye masengo umi wangu wosope mwamkusachila.+ Naga une ngusinamnonyela mnope jemanja, ana yili yakuŵajilwa kuti jemanja munonyeleje une panandi?
16 Nambopetu, une nganinamsitopesya jemanja+ mu litala lililyose. Atamose yaliji myoyo, jemanja mkuŵecheta kuti “namkalamuchile” soni kumtendela yindu “mwachinyengo.”
17 Ana kapena namkalamuchile jemanja kupitila mwa jwalijose junamtumisyaga kweleko?
18 Une namŵendile Tito pampepe ni mlongomjetu jwine kuti ayiche kweleko. Ana kapena Titojo paŵayiche kweleko ŵamkalamuchile jemanja?+ Ana ngati jwalakwejo ni une twatendaga yindu yosope ni nganisyo syakulandana? Ana nganitutendaga yindu mu litala lyakulandana?
19 Achalongo achimjangu ŵapamtima, ana ndaŵi josopeji mŵele mli mkuganisya kuti tukusaka kulichenjela pameso pa jemanja? Iyayi, m’wetu tuli ŵakumkuya Klistu soni Mlungu akumanyilila kuti tukuŵecheta yisyene. Sonitu tukutenda yosopeyi kuti tumlimbikasye jemanja.
20 Pakuŵa ngogopa kuti pachinjiyika kweleko mwine chinjimsimana jemanja mwakulekangana ni munasachilaga, soni mwine une chinjiŵa mwakulekangana ni mwamkusachila jemanja. Nguganisya kuti chinjimsimana mli mkulimbana, kutendelana jelasi,* kutumbilikasyana, kukangana, kusinjililana, kuŵecheta yamiseche, kulikwesya, soni pali pangali mtendele.
21 Nguganisya kuti pachinjiyikasoni kweleko Mlungu chachikunda kuti ndende sooni pasikati penu, soni mwine chinjisosekwa kwalilila ŵajinji mwa ŵandu ŵaŵalemwisye nambo ni ngagalawuka mtima ni kuleka ndamo jawo jakunyalaya, chikululu* soni ndamo jakulijasilila* jiŵatendaga.
Maloŵe Gamwiŵanda
^ Ŵane akusati “dumbo.”
^ Mu Chigiliki akusati, por·neiʹa. Alole mbali jakuti, Kugopolela kwa Maloŵe.
^ Kapena kuti “ndamo jakutesya sooni; ndamo jangalilekasya; ndamo jakulilechelela.” Mu Chigiliki akusati, a·sel′gei·a. Alole mbali jakuti, Kugopolela kwa Maloŵe.
