Chikalata Chaŵili Chakwawula kwa Akolinto 11:1-33
11 Nganonyele kuti jemanja mumbilile atamose ndosyeje mpela kuti ndili jwangali lunda. Nambope yisyene yakwe yili yakuti mumbilile kala.
2 Ngusinamtendela wiwu jemanja mpela wiwu wakwete Mlungu. Pakuŵa une ni junamkamuchisye jemanja kuti mtomeledwe ni jwamlume jumope jwali Klistu kuti nampeleche mpela msikana jwamswela chenene* kwa jwalakwejo.+
3 Nambo ngogopa kuti, mpela mulyatendele lijoka pakumnyenjelela Hawa mwakalamuka,+ nganisyo syenusoni mpaka sisokonechele kuti mkaŵa ŵachilungamo soni ŵaswela mpela mwakusasachila Klistu.+
4 Nguŵechetatu yeleyi ligongo lyakuti, payiche mundu jwine kwa jemanja kukumlalichila yakwamba Yesu jwakulekangana ni Yesu jutwamlalichile, jemanja mkumpochela mundu jwelejo. Nambosoni naga machili gane gakutanda kulongolela nganisyo syenu gele gali gakulekangana ni machili gagaŵele gali mkulongolela nganisyo syenu, kapena mundu jwine akwika ni kumlalichila ngani syambone syakulekangana ni simwapochele,+ jemanja mkwamba kuyikundasoni yindu yeleyi.
5 Une nguyiwona kuti pangali chilichose chachikulosya kuti ndili jwakutuluka pameso pa ŵandumetume ŵenu ŵamkusimwawona kuti ali ŵapenaniwo.+
6 Atamose kuti ndili jwangakombola kuŵecheta yakamula mtima,+ nambo ngusamanyilila yindu. Sonitu yeleyi tuyilosisye chenene kwa jemanja m’matala gosope soni pa yindu yosope.
7 Une nalalichile kwa jemanja ngani syambone syakwamba Mlungu mwakusangalala soni nganinamŵenda kuti mumbe mbiya. Nambosoni nalinandiye kuti jemanja mpochele uchimbichimbi. Ana pelepo nalemwisye?+
8 Unetu natendaga mpela ngujijiŵila mipingo jine pakupochela chikamuchisyo chawo kuti namtumichileje jemanja.+
9 Panasoŵile yindu ndili kumangwenuko, nganinamsitopesya jwalijose, pakuŵa achalongo achimjetu ŵakutyochela ku Makedoniya ni ŵaŵambele yindu yinasosechelagayo.+ Nditu nganinamsitopesya jemanja m’litala lililyose soni chimbitilisye kutenda myoyo.+
10 Naga ngupitilisya kuŵa jwakumkuya jwa Klistu, ngasindeka kulilapilila+ pa ngani jeleji kwa achalongo achimjetu ŵa ku Akaya kosope.
11 Ana ngutenda yeleyi ligongo chichi? Ana lili ligongo lyakuti ngangumnonyela jemanja? Mlungu akumanyilila kuti ngusinamnonyela.
12 Nambotu yangutendayi ngandeka,+ ni chakulinga chakuti ŵandu ŵakulilosya kuti ali ŵakulandana ni m’weji, soni ŵakusalilapililaga pa yindu yakombwele kutenda akakola ligongo lyakulilapilila.
13 Ŵandu ŵeleŵa nganaŵa ŵandumetume ŵasyesyene, nambo ali ŵamasengo ŵaunami soni akusalilandanichisya mpela ŵandumetume ŵa Klistu.+
14 Yeleyitu nganiyiŵa yachilendo, pakuŵa Satana akusalilandanichisya mpela lilayika lyambone.*+
15 Ni ligongo lyakwe nganiyiŵa yachilendo kwawona ŵakutumichila ŵakwesoni ali mkulilandanichisya mpela akutumichila yindu yachilungamo. Nambo mbesi jawo jichiŵa jakamulana ni masengo gawo.+
16 Ngusaka mbechete kanesoni kuti, mundu jwalijose akaganisyaga kuti ndili jwangali lunda. Nambo naga jemanja mkuganisya myoyo, basi mgambe kumbochela mpela mundu jwangali lunda, ni chakulinga chakuti unesoni nalilapilile panandi.
17 Pangani jakulilapililaji, yanguŵechetayo ni iyoyo basi. Nambotu pelepa ngaŵa kuti ngukuya chisyasyo cha Ambuje, nambo ngwamba kuŵecheta mpela mundu jwangali lunda.
18 Pakuŵa ŵandu ŵajinji akulilapilila ligongo lya yindu ya m’chilambo, unesoni chinalilapilile.
19 Pakuŵa jemanja mkuliwona mpela ŵalunda mnope, mwamti mkukamulanaga ni ŵandu ŵangali lunda ni kusangalalaga nawo.
20 Ni ligongo lyakwe mkusagamba kwalechelela ŵandu ŵakumjigala mpela achikapolo, ŵakusamsumula soni kumjiŵila yindu yenu, ŵakusalikwesya pameso penu, soni ŵakusamputa makofi.
21 Tukutendatu sooni ligongo lyakuŵecheta yeleyi. Nambope tuŵechete basi ligongo ŵane mwa jemanja mwatuwonaga mpela ŵangali machili.
Sambano ngusaka mbechete mpela jwangali lunda. Naga pana ŵane ŵakusatenda yindu mwakulimba mtima, unesoni ngusatenda yindu mwakulimba mtima.
22 Ana jemanjajo ali Ahebeli? Unesoni ndili Mhebeli.+ Ana jemanjajo ali Ayisalayeli? Unesoni ndili Myisalayeli. Ana jemanjajo ali ŵanache ŵa Abulahamu? Unesonitu ndili mwanache jwa Abulahamu.+
23 Ana jemanjajo ali atumiki ŵa Klistu? Apa ni chinjanje mpela jwamasoka. Unejo ndili jwakutumichila jwakwapunda jemanjajo. Ndesile masengo gejinji kwapunda jemanjajo,+ naliji mkutaŵidwa kaŵilikaŵili,+ naputidwe kejinji, soni kaŵilikaŵili nasigalaga panandi kuwa.+
24 Maulendo msano Ayuda ŵangwapwile yikoti 40 kutyochesya chimo.+
25 Maulendo gatatu ŵambutile ni ndodo.+ Kampepe ŵambonyisye maganga.+ Sitima jangasichile katatu,+ soni natemi pasikati pa nyasa chilo ni musi.
26 Ndaŵi ni katema naŵaga ndili mkwenda, nasimene ni yakogoya mu sulo, yakogoya yakutyochela kwa ŵachiswamba, yakogoya yakutyochela kwa ŵandu ŵa mtundu wangu,+ soni yakogoya yakutyochela kwa ŵandu ŵamitundu jine.+ Nasimene ni yakogoya mu msinda,+ yakogoya m’chipululu, yakogoya panyasa, soni yakogoya pasikati pa achalongo achimjetu ŵaunami.
27 Nakamulaga masengo gakupweteka, natamaga chilo chosope ngagona,+ naŵaga ni sala soni njota.+ Ndaŵi syejinji naŵaga jwangali yakulya,+ naŵaga pambepo soni nasoŵaga yakuwala.
28 Konjechesya pa yindu yakundendechela kusa kwa chiluyi, panasoni chindu chine chachikusandagasya mumtima lisiku lililyose, chachili nganisyo syangusakola pa mipingo josope.+
29 Ana apali jwalijose jwatengwiche,* une ni ngatengukasoni? Ana apali jwalijose jwakuŵele,* une ni ngangwaya mumtima?
30 Naga ngusaka kulilapilila, chinalilapilile ligongo lya yindu yayikusandendekasya kuŵa jwangali machili.
31 Mlungu jwalisoni Atati ŵa Ambuje Yesu, jwakusosekwa kupochela uchimbichimbi mpaka kalakala, akumanyilila kuti une ngangulambusya.
32 Panaliji ku Damasiko, gafanala jwa mwenye Aleta ŵaliji mkulondela msindawo ni chakulinga chakuti angamule.
33 Nambo ŵandu ŵambisile mu lukalala* ni kungopochesya pewindo lya lipupa lya msindawo+ kaneko ŵanduluchisye pasi, mwamti nakulupwiche mmyala mwakwe.
