Chikalata Chaŵili Chakwawula kwa Akolinto 1:1-24
1 Une Paulo, ndumetume jwa Klistu Yesu mwakusaka kwa Mlungu, ndili ni mlongomjetu Timoteyo.+ Nguwulembela chikalatachi mpingo wa Mlungu wawuli ku Kolinto soni ŵaswela wosope ŵali ku Akaya.+
2 Umbone mtima wekulungwa soni mtendele wakutyochela kwa Mlungu Atati ŵetu soni Ambuje Yesu Klistu uŵe ni jemanja.
3 Achimbichikwe Mlungu ŵalisoni Atati ŵa Ambuje ŵetu Yesu Klistu,+ Mlungu jwakusatutendela chanasa+ soni kutumyalasya mu yosope.+
4 Mlungu akusatumyalasya mu yakusawusya* yetu yosope.+ Jwalakwe akusatumyalasya+ kuti m’wejisoni tukombole kwamyalasya ŵane+ ŵakusimana ni yakusawusya yakulekanganalekangana.
5 Mpela mwayiŵelele kuti tukusimana ni yakusawusya yejinji ligongo lya Klistu,+ myoyosoni kupitila mwa Klistujo akusatumyalasya mnope.
6 Sambano naga m’weji tukusimana ni yakusawusya, tukusimana nayo kuti yimmyalasye jemanja soni kuti mkulupuche. Soni naga m’wejo tukumyalasidwa, nikuti nombe jemanja chiyimmyalasye, kuti yimkamuchisye kupilila yakusawusya yakulandana ni yatukusimana nayo m’weji.
7 Chembecheyo chetu pa jemanja chili changatenganyika, ligongo tukumanyilila kuti jemanja mkusimanasoni ni yakusawusya mpela yatukusimana nayo m’weji, myoyo jemanjasoni chimchimyalasidwa mpela m’weji.+
8 Pakuŵa ngatukusaka kuti jemanja achalongo achimjetu mkamanyilila ya yakusawusya yatwasimene nayo ku Asiya.+ Twalasile mnope mwamti nganitukolasoni machili, soni twakayichilaga naga chituŵesoni ni umi.+
9 Nambosoni m’mitima mwetu twalipikanaga mpela kuti tuwile kala. Yaliji myoyo kuti tukalidalilaga achimsyewe, nambo kuti tumdalileje Mlungu+ jwakusiŵajimusya ŵawe.
10 Jwalakwe ŵatukulupwisye ku yakusawusya yeleyo, yele yikatutendekasisye kuwa. Jwalakwe chachitukulupusyasoni, mwamti tukwete chikulupi chakuti chachipitilisya kutukulupusya.+
11 Jemanjasoni mpaka mtukamuchisye naga mkutupopelela mwakuchondelela.+ Mtendeje yeleyi kuti ŵajinji amyamichileje Mlungu pa umbone watupochele ligongo lya mapopelo ga ŵandu ŵajinji.+
12 Pakuŵa tukusalilapilila ligongo lyakuti, kwa ŵandu m’chilambochi soni mnopemnope kwa jemanja, tulosisye ndamo syeswela soni tulosisye chilungamo chakutyochela kwa Mlungu. Tutesile yeleyi mwakulongoleledwa ni umbone mtima wekulungwa wa Mlungu, ngaŵa ni lunda lwa chilambochi,+ mwamti mtima* wetu ukusatutendela umboni.
13 Pakuŵa tukumlembela jemanja yindu yampaka mkombole kuyiŵalanga* ni kuyipikanichisya, soni ngukulupilila kuti chimpitilisye kuyipikanichisya chenene,*
14 soni ŵane mwa jemanja mwayipikanichisye kala. Nditu, ŵane mwa jemanja mkumanyilila kuti mkusalilapilila ligongo lya m’weji. M’wejisoni tuchililapilila ligongo lya jemanja pa lisiku lya Ambuje ŵetu Yesu.
15 Myoyo, pakuŵa ngusimichisya yeleyi, naganisisye kuti chandanda yiche kwa jemanja, ni chakulinga chakuti mkolesoni upile wine wakusangalala.*
16 Pakuŵa nalinganyisye yakuti pangwawula ku Makedoniya mbitile kweleko kuti namlole jemanja, soni kuti panguwuja kutyochela ku Makedoniyako mbitilesoni kwa jemanja, kuti kaneko mumbechesye paulendo wangu wa ku Yudeya.+
17 Sambano ana panalinganyisye yeleyi, nikuti nalinganyisye mwangaganisya chenene? Ana kapena yangusaganichisya kuti ndende, ngusayiganichisyaga mwautambwali, kuti panguti “Elo,” ngusachengagasoni nikuti “Iyayi”?
18 Pakuŵa Mlungu ali jwakudalilichika, maloŵe getusoni gali gakudalilichika. Myoyo ngasituŵecheta kuti “elo,” kaneko nikuti “iyayi.”
19 Pakuŵa Yesu Klistu jwali Mwanache jwa Mlungu juŵalalichidwe kwa jemanja kupitila mwa une, Silifano* soni Timoteyo,+ nganaŵa “elo” kaneko “iyayi,” nambo kwa jwalakwe “elo” jiŵelepe “elo.”
20 Nambosoni yindu yasasile Mlungu kuti chachitenda, ata yiŵe yejinji chamtuli, yikusaŵaga “elo” kupitila mwa Yesu.+ Myoyo kupitila mwa jwalakwe tukusasala kuti “Ame” kwa Mlungu,+ kuti Mlungujo apochele uchimbichimbi kupitila mwa m’weji.
21 Nambo juŵatusimichisye kuti jemanja ni m’weji tuli ŵa Klistu soni jwele juŵatusagwile, ali Mlungu.+
22 Jwalakwe atudindile chimanyisyo* chakwe,+ soni atupele msimu weswela+ m’mitima mwetu. Ŵatesile yeleyi pakutusimichisya kuti tuchipochela yambone yayili msogolo.
23 Sambano Mlungu aŵe mboni jangu* pa ligongo lyanalepelele kwika ku Kolintoko. Nganiyika pakogopela kuti chinjonjechesye chanasa chimkwete.
24 Ngaŵa kuti m’weji tuli ŵakulamulila chikulupi chenu,+ nambo tuli ŵamasengo achimjenu kuti msangalaleje, pakuŵa mli ŵakulimba ligongo lya chikulupi chenu.
Maloŵe Gamwiŵanda
^ Kapena kuti “yakupweteka.”
^ Pelepa, maloŵe gatugopolele kuti “mtima” gakugopolela nganisyo syakumkumbusya mundu yambone soni yakusakala. Ŵane akusati “chikumbumtima.” Alole maloŵe gakuti “Mtima” pa mbali jakuti, Kugopolela kwa Maloŵe.
^ Kagopolele kanesoni, “yindu yamkuyimanyilila kala chenene.”
^ Mu Chigiliki ŵatiga, “mpaka kumbesi.”
^ Kagopolele kanesoni, “ni chakulinga chakuti mpindule kaŵili.”
^ Jwalakweju akusamanyikasoni ni lina lyakuti Sila.
^ Kapena kuti “chidindo.”
^ Kapena kuti “mboni ja umi wangu.”
