Chikalata Chandanda Chakwawula kwa Timoteyo 3:1-16
3 Maloŵe aga gali gakwenela kugakulupilila, gakuti, Naga mundu akulingalinga kuti aŵe jwakulolela,+ akusachilila masengo gambone.
2 Myoyo jwakulolela atameje umi wakuti ŵandu akampatilaga magongo, akole jwamkongwe jumpepe, atendeje yindu mwangapundanganya malile, aŵeje jwaganisya chenene,+ jwakuyikolosya chenene yindu, jwakwapochela chenene achalendo,+ soni jwakombola kwiganya.+
3 Akaŵa jwakumwa mnope ukana,+ akaŵa jwandewo, nambo aŵe jwakundilila.+ Akaŵa jwakunonyela yakangana,+ soni akaŵa jwakunonyela mbiya.+
4 Aŵe jwamlume jwakulongolela* chenene liŵasa lyakwe, soni aŵe jwakuti ŵanache ŵakwe akusampikanila* ni mtima wosope.+
5 (Pakuŵa naga mundu ngakumanyilila kulilongolela* liŵasa lyakwe, ana chachisamalila chamtuli mpingo wa Mlungu?)
6 Akaŵa mundu jwagambile kuŵa kwene Mklistu,+ kogopela kuti mpaka atande kulikwesya ligongo lya kunyada ni kulamulidwa* mpela yaŵatite pakumlamula Satana.
7 Nambosoni aŵe jwakuti ŵandu ŵangakulupilila akusaŵecheta yambone yakwamba jwalakwejo,+ kuti ŵandu akamnyosyaga, ni kugwila mu chitega chakutyochela kwa Satana.
8 Nombenawo ŵakutumichila ŵakamuchisya akusosekwa kuŵa ŵangali uwanache, akaŵa ŵakuŵecheta paŵili,* akaŵa ŵakumwa mnope finyo, soni akaŵa ŵakunonyela kupata yindu mwachinyengo.+
9 Aŵe ŵakamula mwamachili yakusisika yapadela yatukusakulupilila ali akwete mtima* weswela.+
10 Nambosoni, jemanjaji akusosekwa kulinjidwa kaje kuti alosye naga ali ŵakuŵajilwa. Pambesi pakwe mpaka atumichile mpela ŵakutumichila ŵakamuchisya, pakuŵa pelepo chachiŵa ali ŵangali magongo gakwalekasya kutumichila.+
11 Nombenawo achakongwe akusosekwa kuŵa ŵangali uwanache, akaŵa ŵamiseche,+ atendeje yindu mwangapundanganya malile, soni aŵeje ŵakulupichika pa yindu yosope.+
12 Ŵakutumichila ŵakamuchisya aŵeje achalume ŵa jwamkongwe jumo, ŵakulolela chenene ŵanache ŵawo soni maŵasa gawo.
13 Pakuŵa achalume ŵakusatumichila chenene akusakola mbili jambone soni akusakola ufulu wekulungwa wakuŵecheta ya chikulupi chawo mwa Klistu Yesu.
14 Ngumlembela yindu yeleyi atamose kuti ngwembecheya kwika kweleko pamkaŵapa.
15 Nambo pakutendela kuti mwine chinjelewe, namlembele yeleyi kuti mmanyilile yampaka mtendeje m’nyumba ja Mlungu,+ jajili mpingo wa Mlungu jwaumi. Mpingowu ukusalimbisya soni kuchenjela yayili yisyesyene.
16 Kusala yisyene, yakusisika yapadela yeleyi yakwamba kulipeleka kwetu kwa jwalakwejo yili yekulungwa mnope: ‘Jwalakwejo ŵawonechele mpela mundu,+ ŵam’weni kuŵa jwakulungama ali mu chilu chausimu,+ ŵawonechele kwa malayika,+ ŵandu ŵamitundu josope ŵalalichidwe yakwamba jwalakwejo,+ ŵandu ŵa pachilambo chapasi ŵamkulupilile,+ soni jwalakwejo ŵampochele kwinani mwauchimbichimbi.’
Maloŵe Gamwiŵanda
^ Kapena kuti “jwakulolela.”
^ Kapena kuti “akusamgonjela.”
^ Kapena kuti “kulolela.”
^ Kapena kuti “kwelusidwa.”
^ Kapena kuti “akaŵa ŵaunami.”
^ Pelepa, maloŵe gatugopolele kuti “mtima” gakugopolela nganisyo syakumkumbusya mundu yambone soni yakusakala. Ŵane akusati “chikumbumtima.” Alole maloŵe gakuti “Mtima” pa mbali jakuti, Kugopolela kwa Maloŵe.
