Chikalata Chandanda Chakwawula kwa Timoteyo 1:1-20
1 Une Paulo, ndumetume jwa Klistu Yesu junasagulidwe ni machili ga Mlungu jwali Mkulupusyo jwetu soni Klistu Yesu jwali chembecheyo chetu,+
2 ngumlembela mmwejo Timoteyo*+ mwanangu jusyesyene+ m’chikulupi.
Nguŵenda kuti Mlungu jwali Atati soni Klistu Yesu Ambuje ŵetu amlosye umbone mtima wekulungwa, amtendele chanasa soni ampe mtendele.
3 Panasigele panandi kuti njawule ku Makedoniya, namlimbikasisye kuti mtamepe ku Efeso. Apano ngumlimbikasyasoni kuti mtamepe kukoko ni chakulinga chakuti mwalekasye ŵandu ŵane ŵakwiganya yijiganyo yachilendo,
4 nambosoni kuti aleche kupikanila ngani syaunami+ soni ngani syakulondesya ya msela wakupagwila. Yindu yeleyi yili yangakamuchisya+ mwamti yikusagamba kutandisya yakangana soni nganiyiŵa mbali ja yindu yapeleche Mlungu kuti yitukamuchisyeje pa chikulupi.
5 Chakulinga changu pakuŵecheta yeleyi chili chakuti wosope akole chinonyelo+ chakutyochela mumtima weswela, mu mtima* wangali chakuwusisya soni m’chikulupi+ changali chinyengo.
6 Ŵandu ŵane akanile kukuya yindu yeleyi mwamti atandite kwinjilila nawo ngani syangalondeka.+
7 Ŵandu ŵeleŵa akusasaka kuŵa ŵakwiganya+ chilamusi, nambo chitamilecho ŵangapikanichisyaga yindu yakusaŵechetaga achimsyenewo kapenasoni yindu yakusalimbichila kwiganyayo.
8 Sambano tukumanyilila kuti Chilamusi chikusaŵaga chambone naga mundu akuchikuya chenene.
9 Jwalijose akusosekwa kumanyilila kuti chilamusi nganichipagwa ligongo lya mundu jwakulungama nambo ligongo lya ŵandu ŵangapikanila malamusi,+ ŵakwimuchila, ŵangajogopa Mlungu, ŵakulemwa, ŵangakulupichika, ŵangachimbichisya yindu yeswela, ŵakuwulaga baba soni mama ŵawo, ŵakuwulaga ŵandu,
10 ŵandu ŵachikululu,* ŵandu ŵakusagonana achalumepe, ŵakwiŵa ŵandu, ŵaunami, ŵakulumbila mwaunami, soni jwalijose jwakusatenda chilichose chakutindana ni chijiganyo chisyesyene* cha Mlungu.+
11 Chijiganyo chelechi chili chakutyochela kwa Mlungu jwakusangalala soni chili chakamulana ni ngani syambone syakuchimbichika syanapochele.+
12 Ngumyamichila Klistu Yesu Ambuje ŵetu jwele juŵambele machili paŵambweni kuŵa jwakulupichika ni kumba upile wakutumichila.+
13 Ŵatesile yeleyi atamose kuti pandanda naliji jwakunyosya Mlungu, jwakwalagasya ŵandu ŵakwe soni jwachipongwe.+ Nambope Mlungu ŵandendele chanasa ligongo naliji mkutenda yindu mwangamanyilila soni naliji jwangali chikulupi.
14 Myoyo Ambuje ŵetu ŵandosisye umbone mtima wekulungwa mnope, nambosoni Klistu Yesu ŵambele chikulupi soni chinonyelo.
15 Maloŵe gakuti Klistu Yesu ŵayiche pachilambo kuti ŵakulupusye ŵandu ŵakulemwa+ gali gasyesyene soni gali gakusosekwa kugajitichisya nditu. Mwa ŵakulemwa ŵeleŵa, une ndili jwakulemwa mnope.+
16 Atamose kuti yili myoyo, jwalakwe ŵandendele chanasa une jwandili jwakulemwa mnope ni chakulinga chakuti kupitila mwa une, Klistu Yesu alosye kuwusimana mtima kwakwe kosope. Ŵatesile yeleyi kuti une mbe chisyasyo kwa wosope ŵachachimkulupilila jwalakwe kuti apate umi wangamala.+
17 Sambano kwa Mlungu jwetu jumopejo,+ jwali Mwenye jwandaŵi syosope,+ jwakwete umi wanganiwuŵa ujonasiche,+ soni jwali jwangawoneka,+ kwa jwalakwe kuŵe uchimbichimbi soni kusalala mpaka kalakala. Ame.
18 Maloŵe* gelega ngumpa mmwejo mwanangu Timoteyo, mwakamulana ni yakulochesya yayaŵechetedwe kala pakwamba ya mmwejo, ni chakulinga chakuti kupitila mu yayaŵechetedweyo mpitilisye kuputa ngondo jambone.+
19 Nambosoni kuti mpitilisye kusunga chikulupi soni mtima* wangali chakuwusisya,+ wele ŵandu ŵane awujasile mwamti chikulupi chawo chikasiche mpela sitima.
20 Ŵane mwa ŵandu ŵeleŵa ali Hemenayo+ ni Alekisanda. Ŵandu ŵeleŵa napeleche kwa Satana*+ ni chakulinga chakuti chilango* chelechi chajiganye kuti aleche kunyosya Mlungu.
Maloŵe Gamwiŵanda
^ Linali likusagopolela kuti “Mundu Jwakusamchimbichisya Mlungu.”
^ Pelepa, maloŵe gatugopolele kuti “mtima” gakugopolela nganisyo syakumkumbusya mundu yambone soni yakusakala. Ŵane akusati “chikumbumtima.” Alole maloŵe gakuti “Mtima” pa mbali jakuti, Kugopolela kwa Maloŵe.
^ Mu Chigiliki akusati, por·neiˈa. Alole mbali jakuti, Kugopolela kwa Maloŵe.
^ Kapena kuti “chambone; chakupindulisya.”
^ Kapena kuti “Malamusi.”
^ Pelepa, maloŵe gatugopolele kuti “mtima” gakugopolela nganisyo syakumkumbusya mundu yambone soni yakusakala. Ŵane akusati “chikumbumtima.” Alole maloŵe gakuti “Mtima” pa mbali jakuti, Kugopolela kwa Maloŵe.
^ Pelepa akugopolela kuti ŵatyosisye mumpingo.
^ Ŵane akusati “chamuko.”
