Buku Jandanda ja Samuyele 28:1-25
-
Sauli akwawula kwa jwakutenda yamasenga ku Eni-doli (1-25)
28 M’masiku gelego Afilisiti ŵasongangenye asilikali ŵawo kuti ajawule kukumenyana ni Ayisalayeli. Myoyo Akisi ŵamsalile Daudi kuti, “Mmwejotu mkumanyilila chenene kuti chimjawule ni une yimpepe ni achalume ŵenu kuti tukapute ngondo jeleji.”
2 Pelepo Daudi ŵamsalile Akisi kuti, “Wawojo akumanyilila chenene yachatende jwakutumichila jwawo.” Akisi ni ŵamsalile Daudijo kuti, “Ni ligongo lyakwe chinamsagule mmwejo kuti mŵe msilikali jwangu jwakulondela, soni kuti mulondeleje mpaka kalakala.”
3 Sambano Samuyele ŵaliji ali ajasiche, soni Ayisalayeli wosope ŵalisile malilo gakwe soni ŵamsichile m’malembe ku Lama, uwaliji msinda wakumangwakwe. Nambosoni Sauli ŵaliji ali ŵatyosisye mu Isalayeli mosope ŵandu ŵakutenda yamasenga soni ŵakusala yamsogolo.
4 Kaneko Afilisiti ŵasongene pampepe ni kuja kukunga matenti gawo ku Sunemu. Nombenajo Sauli ŵasongangenye Ayisalayeli wosope pampepe, mwamti jemanjaji ŵakunjile matenti gawo ku Gilibowa.
5 Sauli paŵagaweni magulu ga asilikali ga Afilisitiwo jwatesile woga, mwamti mtima wakwe watandite kutetemela mnope.
6 Atamose kuti Sauli ŵaliji mkumŵenda Yehofa kuti amsalile yakusosekwa kutenda, nambo Yehofajo nganamjanga jwalakwe chinga kupitila mu sagamisi kapena mu Ulimu* kapenasoni kupitila mwa ŵakulochesya.
7 Pambesi pakwe Sauli ŵasalile ŵakutumichila ŵakwe kuti, “Asosele jwamkongwe jwakusatenda yamasenga, soni une chinjawule kuti ngawonegane ni jwalakwejo.” Pelepo ŵakutumichila ŵakwewo ŵamjanjile jwalakwe kuti, “Pana jwamkongwe jwakusatenda yamasenga ku Eni-doli.”
8 Myoyo Sauli ŵalichenjile soni ŵachenjile yakuwala yakwe ni ŵajawile kukuwonegana ni jwamkongwejo chilo yimpepe ni achalume ŵakwe ŵaŵili. Jwalakwe ŵamsalile jwamkongwejo kuti, “Mtende yamasenga kuti musalile yamsogolo, soni mungopochesye mundu jwachinamsalile.”
9 Nambo jwamkongwejo ŵamjanjile jwalakwejo kuti, “Wawojo akumanyilila yaŵatesile Sauli. Jwalakwetu ŵatyosisye ŵandu wosope ŵakutenda yamasenga soni ŵakusala yamsogolo m’chilambochi. Sambano ligongo chichi wawojo akusaka kundega chitega une ni chakulinga chakuti ambulaje?”
10 Pelepo Sauli ŵamlumbilile jwamkongwejo mu lina lya Yehofa kuti, “Nditu ngulumbila pameso pa Yehofa Mlungu jwaumi, mmwejo ngamŵa jwakulemwa ligongo lya yindu yeleyi.”
11 Ni jwamkongwejo ŵamwusisye jwalakwejo kuti, “Ana akusaka nakopochesye ŵani?” Sauli ni ŵajanjile kuti, “Mungopochesye Samuyele.”
12 Jwamkongwejo paŵam’weni “Samuyele”* ŵagumisile mwakwesya maloŵe mnope ni ŵamwusisye Sauli kuti, “Ligongo chichi aloŵesye une? Wawojotu ali Sauli.”
13 Pelepo mwenyewo ŵamsalile jwamkongwejo kuti, “Mkajogopa. Mgambe kusalila yamkuyiwona.” Jwamkongwejo ni ŵamjanjile Sauli kuti, “Ngumwona jwinejwakwe jwakuwoneka mpela mlungu ali mkukopoka pasi pa chilambo chapasi.”
14 Ndaŵi jijojo jwalakwe ŵamwusisye jwamkongwejo kuti, “Musalile, ana akuwoneka mwamtuli?” Jwamkongwejo ni ŵajanjile kuti, “Jwakwikajo ali jwamlume jwachikulile soni awete malaja gakusa gangali makono.” Pelepo Sauli ŵamanyilile kuti mundujo ali “Samuyele,” mwamti jwalakwe ŵatindiŵele ni kwinama kaneko ŵagonile mwakulola pasi.
15 Kaneko “Samuyele” ŵamwusisye Sauli kuti, “Ligongo chichi musokonasisye pakungoposya une kuti mbiche akuno?” Pelepo Sauli ŵajanjile kuti, “Yindu yisawusye mnope une. Afilisiti anjimuchile, soni Mlungu alesile une mwamti ngakunjanga chinga kupitila mwa ŵakulochesya kapena mu sagamisi. Ni ligongo lyakwe naŵilasile wawojo kuti asalile yampaka ndende.”
16 Kaneko “Samuyele” ŵamwusisye kuti, “Ligongo chichi mkusaka kuti une namsalile yakutenda, chitamilecho Yehofa amlesile mmwejo soni aŵele mdani jwenu?
17 Yehofa chatende yindu yaŵasasile kupitila mwa une. Yehofajo ŵatite chachityosya uchimwene mmyala mwenu ni kuwupeleka kwa mundu jwine lina lyakwe Daudi.
18 Yehofa akutenda yeleyi kwa mmwejo lelojino ligongo lyakuti nganimpikanila maloŵe ga Yehofa soni nganimwajonanga Aamaleki ŵaŵamtumbilikasisye mnope jwalakwe.
19 Yehofa chiŵapeleche Ayisalayeli ni mmwejo ŵakwe mmyala mwa Afilisiti, mwamti malaŵi mmwejo ni ŵanache ŵenu chimchiŵa yimpepe ni une. Yehofa chagapelechesoni magulu gangondo ga Ayisalayeli mmyala mwa Afilisiti.”
20 Ndaŵi jijojo Sauli ŵagwile pasi ni gamba kuti kwalaa, soni ŵatesile woga mnope ligongo lya maloŵe ga Samuyele. Nambosoni jwalakwe jwafoweche mnope ligongo nganalya chilichose lisiku lyosope musi ni chilo.
21 Jwamkongwe jula paŵayiche paŵaliji Sauli ni kuyiwona kuti jwalakwe asokonechele mnope, ŵamsalile kuti, “Une jwakutumichila jwawo mbikanile yaŵasalile, mwamti naŵisile umi wangu pangosi ni kutenda yaŵasalileyo.
22 Sambano chonde apikane yangusaka kwasalila une jwakutumichila jwawo. Angunde une kuti nape mkate* kuti alye ni kupata machili pachawujileje.”
23 Nambo jwalakwe ŵakanile ni kuŵecheta kuti, “Ngangusaka kulya.” Nambope ŵakutumichila ŵakwe ŵala soni jwamkongwe jula ŵamkanganichisye jwalakwe kuti alye. Pambesi pakwe jwalakwe ŵapikanile jemanjaji, mwamti ŵajimwiche paŵagonile pala ni kutama pabedi.*
24 Jwamkongwejo ŵakwete kamwanache ka ng’ombe kejimbale chenene. Myoyo ŵakawuleje mwachitemachitema ni ŵajigele utandi ni kuwuwunya, kaneko ni Ŵateleche mikate jangali yakusasaŵisya.
25 Kaneko jwalakwe ŵapeleche yakulyayi kwa Sauli ni ŵakutumichila ŵakwe ŵala, mwamti jemanjaji ŵalile. Panyuma pakwe jemanjajo ŵanyakwiche ni kuwujilaga kumangwawo chilopecho.
