Chikalata Chandanda cha Petulo 1:1-25
1 Une Petulo, ndumetume+ jwa Yesu Klistu, ngumlembela jemanja ŵamli achalendo soni ŵamtemi mwakubalalikangana ku Ponto, ku Galatiya, ku Kapadokiya,+ ku Asiya, soni ku Bituniya.
2 Ngumlembela jemanja ŵele Mlungu Atati ŵamsagwile soni ŵammanyilile chilepe,+ mwamti ŵamswejesye ni msimu+ ni chakulinga chakuti mŵeje ŵakupikanila soni kuti mŵe ŵaswela kupitila m’myasi ja Yesu Klistu.+
Mlungu amjonjechesye jemanja umbone mtima wakwe wekulungwa soni mtendele.
3 Achimbichikwe Mlungu jwali Atati ŵa Ambuje ŵetu Yesu Klistu, pakuŵa mwa umbone wakwe wekulungwa, jwalakwe kupitila mu kwimuka kwa Yesu Klistu,+ ŵatutendekasisye kuti tupagwe mwasambano+ ni chakulinga chakuti tukole chembecheyo chisyesyene+
4 soni mtuka wele ngasiwujonasika kapena kumala.+ Mtuka welewu akumsunjila jemanja kwinani.+
5 Mlungu akumchenjela jemanja ni machili gakwe ligongo lya chikulupi chenu kuti chimkulupuche, soni mkwembecheya kukulupuka kweleku mu ndaŵi jakumalisya.
6 Pa ligongo lyeleli jemanja mkusangalala mnope, atamose kuti apanopano mkulinjidwa ni yakusawusya yakulekanganalekangana,+ yanganiyiŵa yijigele ndaŵi jelewu.
7 Yeleyi yikumtendechela jemanja ni chakulinga chakuti chikulupi chenu+ chachisimene ni yakulingwa chimtendekasye kuti mkapochele uchimbichimbi, kuŵala, soni kuti chamkwesye pa ndaŵi jele yakutenda ya Yesu Klistu yichiwonechela.+ Chikulupi chachisimene ni yakulingwa chili chapenani mnope kupunda golide jwele jukusajonasika atamose kuti jwapitile pamoto* pakumswejesya.
8 Jemanja atamose kuti nganimumwoneje Klistu, nambo mkusimumnonyela. Atamosesoni kuti apanopano ngamkumwona jwalakwejo, nambope mkusimumkulupilila, mwamti mkusangalala soni kusangalala kwakwe kuli kwekulungwa mnope.
9 Jemanja chimchikulupuka* ligongo lya chikulupi chenu, mli mkusangalala myoyo.+
10 Pangani ja kukulupukaji, ŵakulochesya ŵaŵasasile chile ya umbone mtima wekulungwa wele Mlungu amlosisye jemanja, ŵasosagasosaga soni ŵawungunyisye mwakusamala yakwamba ngani jeleji.+
11 Msimu weswela wasalile chile jemanjaji yakwamba yakusawusya yachachisimana nayo Klistu+ soni yakwamba uchimbichimbi wachachipochela panyuma pakwe. Myoyo jemanjaji ŵaliji mkusosasosa kuti amanyilile ndaŵi jisyesyene jele yindu yeleyi yichimtendechela Klistu,+ mwakamulana ni yawasasile msimu weswela.
12 Mlungu ŵatendekasisye jemanjajo kumanyilila kuti paŵaŵechetaga yeleyi nganalitumichilaga achimsyenewo, nambo ŵamtumichilaga jemanja. Yindu yaŵaŵecheteyo ni yele ŵandu ŵakulalichila ngani syambone ayilalichile kwa jemanja ni machili ga msimu weswela wakutyochela kwinani.+ Yindu yeleyi, atamose malayika gali gakusachilila mnope kuyimanyilila.
13 Myoyo, mkosechelesye nganisyo syenu kuti mkamule masengo.+ Mlolechesyeje kuti mli ŵaganisya chenene.+ Mjembecheyeje umbone mtima wekulungwa wele Mlungu chachimlosya jemanja pandaŵi jachachiwonechela Yesu Klistu.
14 Mpela ŵanache ŵakupikanila, mleche kukuya* yakumbila yimwakwete pandanda pandaŵi jimwaliji ŵangamanyilila.
15 Nambo mŵeje ŵaswela mu ndamo syenu syosope,+ mwakulandana ni Jwamswelajo jwele juŵamŵilasile jemanja.
16 Pakuŵa Malemba gakusati, “Mŵeje ŵaswela, ligongo unejo ndili jwamswela.”+
17 Nambosoni naga mkwaŵenda yindu Atati ŵele ŵakusalamula* mwangali lusagu+ pakujigalila masengo ga mundu jwalijose, ndamo syenu silosyeje kuti mkusimumjogopaga Mlungu+ pandaŵi jimkutama mpela achalendo m’chilambochi.
18 Jemanja mkumanyilila kuti ŵamgopwele* ku umi wangalondeka wamwajigalile kwa achinangolo ŵenu.* Ngaŵa kuti ŵamgopwele ni yindu yampaka yijonasiche,+ mpelaga silifa kapena golide.
19 Nambo ŵamgopwele ni myasi+ ja Klistu,+ jajili mpela myasi ja ngondolo jangalemala+ soni jangali liŵasi.
20 Yisyene, jwalakwejo jwamanyiche chilepe mkanatamilikasye chilambo,*+ nambo jwawonechele pandaŵi jakumalisya ligongo lya jemanja.+
21 Jemanja mkusamkulupilila Mlungu kupitila mwa jwalakwe,+ soni Mlungujo ni juŵamjimwisye jwalakwejo ku chiwa+ ni kumpa uchimbichimbi.+ Ŵatesile yeleyi kuti chikulupi soni chembecheyo chenu chiŵe mwa Mlungu.
22 Pakuŵa sambano mliswejesye mwakuŵa ŵakupikanila yijiganyo yisyesyene, mwamti yakuyichisya yakwe mwalosisye achalongo achimjenu chinonyelo changali chinyengo,+ myoyo mwanonyeleje ŵane ni mtima wosope.+
23 Pakuŵa jemanja mpagwile mwasambano,+ ngaŵaga ni mbeju jampaka jijonasiche, nambo ni mbeju jangajonasika,*+ kupitila m’maloŵe ga Mlungu jwele chachitama mpaka kalakala.+
24 Pakuŵa “yaumi yosope* yili mpela manyasi, soni uchimbichimbi wakwe wosope uli mpela maluŵa gakwitinji. Manyasi gakusanyala, soni maluŵa gakusalakatika,
25 nambo maloŵe* ga Yehofa* gachitamape mpaka kalakala.”+ “Maloŵe” gelega gali ngani syambone syaŵasilalichile kwa jemanja.+
Maloŵe Gamwiŵanda
^ Kapena kuti “atamose kuti ŵajilinjile ni moto.”
^ Kapena kuti “chimchikulupusya umi wenu.”
^ Kapena kuti “kujigalila.”
^ Kapena kuti “ŵakusawelusya.”
^ Mu Chigiliki ŵatiga, “ŵamsumile; ŵamwombwele.”
^ Kapena kuti “wamwajigalile ku miyambo jenu.”
^ Pelepa akwamba Adamu ni Hawa mkanatande kuŵeleka ŵanache.
^ Pelepa akwamba mbeju jampaka jisogole.
^ Kapena kuti “ŵandu wosope ali.”
^ Kapena kuti “yakuŵecheta ya Yehofa.”
^ Alole Yakumbesi A5.
