Ayimwene Jandanda 9:1-28
9 Sambano Solomoni paŵagambile kumalisya kutaŵa nyumba ja Yehofa, nyumba jaumwenye+ soni chilichose chele Solomonijo ŵasachile kutaŵa,+
2 Yehofa jwawonechelesoni kwa Solomoni ulendo waŵili mpela yaŵatite pakuwonechela kwa jwalakwe paŵaliji ku Gibiyoni.+
3 Yehofa ŵamsalile jwalakwejo kuti, “Une mbikene lipopelo lyenu soni kuŵenda kwamwatesile pameso pangu kwakuti namlosye umbone mtima. Une najiswejesye nyumba jamtaŵileji mwamti ŵandu chachichimbichisya lina lyangu pa nyumba jeleji mpaka kalakala.+ Nambosoni meso soni mtima wangu uchiŵa panyumba jeleji+ mpaka kalakala.
4 Soni mmwejo naga mkwenda pameso pangu ni mtima wakulupichika+ soni mwakulungamika+ mpela muŵatendele baba ŵenu Daudi,+ mwakutenda yosope yanamlamwile+ soni kupikanila malamusi gangu,+
5 une chinjitendekasya kuti mpando wenu waumwenye wakwalamulila Ayisalayeli utamilichiche mpaka kalakala mpela yinasalile baba ŵenu Daudi kuti chinjatendela. Paja natite, ‘Ngasipalepela kusimanikwa mundu kutyochela mumsela wenu wakupagwila, jwakutama pampando waumwenye wa Isalayeli.’+
6 Nambo naga mmwejo soni ŵanache ŵenu mkuleka kunguya une soni ngamkupikanila malamusi gangu ni yosope yanamsalile kuti mtendeje, ni kaneko mkutanda kujitumichila milungu jine ni kujitindiŵalilaga,+
7 une chinjatyosya Ayisalayeli kuti akasimanikwasoni pachilambo chele une nachipeleche kwa jemanjajo.+ Nambosoni nyumba jele une najiswejesye ligongo lya lina lyangu chinjijityosya pameso pangu.+ Mwamti Ayisalayeliwo chachiŵa chindu chakusekasya soni chakunyoseka pameso pa ŵandu wosope.+
8 Nambosoni nyumbaji jichiŵa masame.+ Jwalijose juchachipitaga pamalopo chachisimongaga mnope, soni chachijimbaga lulusi ni kuŵechetaga kuti, ‘Ligongo chichi Yehofa achitesile yeleyi chilambo chelechi pampepe ni nyumbaji?’+
9 Kaneko chachiŵechetaga kuti, ‘Yeleyi yitendekwe ligongo lyakuti jemanjajo ŵamlesile Yehofa Mlungu jwawo jwele ŵakopwesye achinangolo ŵawo m’chilambo cha Iguputo. Nambosoni jemanjaji ajigele milungu jine ni kujitindiŵalilaga soni kujitumichila. Ni ligongo lyakwe Yehofa ayikasisye yakupweteka yeleyi pa jemanjajo.’”+
10 Payamalaga yaka 20, Solomoni ŵaliji ali ataŵile nyumba siŵili syasyaliji nyumba ja Yehofa soni nyumba jaumwenye.+
11 Hilamu+ mwenye jwa ku Tulo ŵampele Solomoni matabwa ga yitela ya mkungusa soni ga yitela ya janipa. Ŵampelesoni golide jwamjinji mwakamulana ni winji wele Solomoni jwasakaga.+ Nombenajo Mwenye Solomoni ŵampele Hilamu misinda jakwana 20 ja ku Galileya.
12 Myoyo Hilamu ŵatyosile ku Tulo ni kuja kujilola misinda jiŵampele Solomonijo. Nambo jwalakwe nganijimsangalasya misindajo.
13 Jwalakwe ni ŵamwusisye Solomonijo kuti, “Mlongomjangu, pamtiteje mumbele misinda, misinda jakwe ni kuŵaga jeleji?” Myoyo kutandila pelepo misindajo jatandite kumanyika ni lina lyakuti Chilambo cha Kabuli* mpaka apano.
14 Hilamu ŵampele Solomoni matalente* gakwana 120 ga golide.+
15 Aji ni ngani jakwamba ŵandu ŵele Mwenye Solomoni ŵaŵisile kuti akamuleje masengo gakwakanganichisya+ pakutaŵa nyumba ja Yehofa,+ nyumba jakwe, Liwunjili,*+ lutenje lwa Yelusalemu, misinda ja Hasoli,+ Megido+ soni Geseli.+
16 (Falawo mwenye jwa ku Iguputo ŵayiche ni kuwujimuchila msinda wa Geseli soni ŵawujochile moto. Nambosoni ŵawuleje Akanani+ ŵaŵatamaga mumsindamo. Myoyo jwalakwe ŵawupeleche msindawo kwa mwanache jwakwe jwamkongwe+ kuti uŵe mtuka* pandaŵi jaŵalombanaga ni Solomoni.)
17 Solomoni ŵataŵile msinda wa Geseli, wa Beti-holoni+ Jwakwiŵanda,
18 wa Baalati+ soni msinda wa Tamala wawaliji m’chipululu mu chilambo chichocho.
19 Jwalakwe ŵataŵilesoni misinda ja Solomoni jakusunjila yindu, misinda jakusunjila magaleta,*+ misinda ja achalume ŵakwela pa mahachi soni chilichose chele Solomonijo ŵasachile kutaŵa ku Yelusalemu, ku Lebanoni ni kumadela gosope gaŵagalamulilaga.
20 Pakwamba ya ŵandu wosope ŵaŵasigele ŵele nganaŵa Ayisalayeli+ ŵaŵaliji Aamoli, Ahiti, Apelesi, Ahifi soni Ayebusi+
21 pampepe ni ŵanache ŵawo ŵaŵasigele m’chilambocho, ŵele Ayisalayeli ŵalepele kwawulaga, Solomoni ŵaŵisile kuti akamuleje masengo gakwakanganichisya mpela achikapolo mpaka lelojino.+
22 Nambo pangali Myisalayeli jwalijose jwele Solomoni ŵamŵisile kuŵa kapolo.+ Jemanjaji ŵaŵisile kuŵa ŵakuputa ngondo, ŵakutumichila, ŵakulamulila, achakulungwa ŵa asilikali soni ŵakulongolela asilikali ŵakwela pa magaleta ni asilikali ŵakwela pa mahachi.
23 Papalisoni achakulungwakulungwa ŵakulolela nduna ŵakwana 550 ŵaŵalolelaga masengo ga Solomoni. Achakulungwakulungwaŵa ŵaliji mpela achikapitawo ŵakwalolela ŵandu ŵaŵakamulaga masengo.+
24 Mwanache jwamkongwe jwa Falawo+ jwatyosile ku msinda wa Daudi+ ni kwawula ku nyumba jakwe jele Solomoni ŵamtaŵile. Kaneko Solomoni ŵataŵile Liwunjili.*+
25 Katatu pa chaka,+ Solomoni ŵapelekaga mbopesi syakutinisya soni mbopesi sya mkamulano pa malo gakupelechela mbopesi gaŵamtaŵile Yehofa.+ Nambosoni ŵapelekaga mbopesi syakoposya lyosi pa malo gakupelechela mbopesi gagaliji pasogolo pa Yehofa. Myoyo jwalakwe ŵamalisisye kutaŵa nyumbajo.+
26 Mwenye Solomoni ŵapanganyisyesoni masitima gejinji ku Esiyoni-geba+ chiŵandika ni ku Eloti mungulugulu Nyasa Jechejewu m’chilambo cha Edomu.+
27 Hilamu ŵatumisye ŵakutumichila ŵakwe ŵakumanyilila chenene ya panyasa kuti akakamuleje masengo yimpepe ni ŵakutumichila ŵa Solomoni m’masitima+ gejinjigo.
28 Jemanjaji ŵapite ku Ofili+ soni kweleko ŵajigele golide jwakwana matalente 420 ni kwika najo kwa Mwenye Solomoni.
Maloŵe Gamwiŵanda
^ Kagopolele kanesoni, “Chilambo Changali Mate.”
^ Talente jimo jaŵaga jakusitopa makilogalamu 34.2. Alole Yakumbesi B14.
^ Kapena kuti “Milo.” Gelega gali maloŵe ga Chihebeli gagakusagopolela kuti “kugumbasya.”
^ Kapena kuti “mtuka wakutyochela kuchikongwe kwawula kwa jwamlume jwalombele.”
^ Alole mbali jakuti, Kugopolela kwa Maloŵe.
^ Kapena kuti “Milo.” Gelega gali maloŵe ga Chihebeli gagakusagopolela kuti “kugumbasya.”
