Buku Jandanda ja Ayimwene 6:1-38
6 Pali pamasile yaka yakwana 480 kutyochela pele Ayisalayeli* ŵakopweche m’chilambo cha Iguputo, soni pali papite yaka mcheche kutyochela pele Solomoni ŵatandite kulamulila mpela mwenye jwa Ayisalayeli, m’mwesi wa Sifi* (wawuli mwesi waŵili), jwalakwe ŵatandite kutaŵa nyumba ja Yehofa.*
2 Nyumba jele Mwenye Solomoni ŵamtaŵile Yehofa jaliji makono* 60 m’chilewu, makono 20 m’chijipi, soni makono 30 kwawulaga mwinani.
3 Chipinda cha pa mlango wakwinjilila m’nyumbajo chaliji makono 20 m’chilewu, mwakulandana ni ulewu wa m’chijipi wa nyumbajo. Chipindachi chajonjechesye ulewu wa nyumbajo ni makono gakwana 10.
4 Jwalakwe ŵapanganyisyesoni mawindo ga nyumbajo gele mafelemu gakwe galiji gekulungwa mkati nambo gamwana kusa.
5 Nambosoni jwalakwe ŵataŵile chinyumba chine chiŵachilumbikenye ni lipupa lya nyumbajo. Chinyumbachi chasyungulile mapupa gosope ga nyumbajo gagali mapupa ga chipinda chekulungwa* soni mapupa ga chipinda cha mkati mnope. Kaneko ŵataŵile yipinda yamumbali kusyungulila mkati mosope mwa chinyumbacho.
6 Ukulu wa yipinda yapasi waliji makono msano soni yipinda yapasikati yayasajikene ni yipinda yapasi ukulu wakwe waliji makono 6, yipinda yine yayaliji penani pakwe ukulu wakwe waliji makono 7. Yaliji myoyo ligongo mapupa ga yipindayo ŵagataŵile mwakuleka mipata jakuti asajichejemo matabwa gakulekanganya yipindayo mwamti nganipasosekwagasoni kuti lipupa lya nyumbajo alipowole.
7 Nyumba josopejo ŵajitaŵile ni maganga gaŵagasepile chile mwamti nganipapikanikaga masegwe ga mahamala, maŵago, kapena chisyano chine chilichose paŵataŵaga nyumbajo.
8 Mlango wakwinjila m’chipinda chapasi cha mumbali walolite mbali ja kummwela* ja nyumbajo. Papalisoni masitepe gakwelela gagaliji gakusyungulila gele gayiche ku yipinda yapasikati yila soni mpaka gajile kwika ku yipinda yamwinani yila.
9 Jwalakwe ŵapitilisye kutaŵa nyumbaji mpaka ŵamalisisye. Msakasa wa nyumbajo ŵawulinganyisye ni migomba soni mbalaŵala sya yitela ya mkungusa.
10 Jwalakwe ŵataŵile yipinda ya mumbali kusyungulila nyumba josopejo. Chipinda chilichose chaliji makono msano kwawula mwinani. Yipinda yeleyi ŵayilumbikenye ku nyumbajo ni matabwa ga mkungusa.
11 Pandaŵiji Yehofa ŵamsalile Solomoni kuti,
12 “Pakwamba ya nyumba jamkutaŵaji, naga mmwejo mkukuya malamusi gangu soni mkutenda yosope yangusamsalila kuti mtendeje ni kupikanilaga yosope yanamlamwile nikuti une chinjimtendela mmwejo yanasalile baba ŵenu Daudi kuti chinjatendela.
13 Nambosoni une chinjitama pasikati pa Ayisalayeli soni ngasinajasa ŵandu ŵangu Ayisalayeli.”
14 Solomoni ŵapitilisye kutaŵa nyumbajo mpaka ŵajimalisisye.
15 Jwalakwe ŵataŵile lipupa lya mkati lya nyumbajo ni matabwa gekulungwakulungwa ga chitela cha mkungusa. Jwalakwe ŵagasalalisye mapupa ga mkatigo ni matabwa kutandila pasi panyumbajo mpaka kumsakasa kwakwe. Nambosoni pasi posope pa nyumbajo ŵakomilepo ni matabwa gekulungwakulungwa ga janipa.
16 Nambosoni mkati mwa nyumbajo chakunyuma jwalakwe ŵataŵile chipinda chamkati mnope chelewu makono 20. Chipindachi ŵachitaŵile ni matabwa gekulungwakulungwa ga mkungusa kutyochela pasi mpaka kwinani. Chipinda chelechi ni chachaliji Malo Geswela Mnope.
17 Chipinda chekulungwa* chachaliji mbali ja kusogolo kwa nyumbaji chaliji chelewu makono 40.
18 M’matabwa ga mkungusa gagaliji mkati mwa nyumbajo ŵajambwilemo yiwulili ya mbonda soni maluŵa mwakutenda kugoba. Matabwa ga mkungusago gasiŵile lipupa lyosopelyo mwamti paliji pangali atamose liganga limo lyalyawonechelaga.
19 Nambosoni jwalakwe ŵalinganyisye chipinda cha mkati mnope chachaliji m’nyumbajo ni chakulinga chakuti aŵichemo libokosi lya chilanga lya Yehofa.
20 Chipinda cha mkati mnopecho chaliji makono 20 m’chilewu, makono 20 m’chijipi soni makono 20 kwawula mwinani soni ŵachipakesye golide jwambone mnope. Jwalakwe ŵaŵisile matabwa ga chitela cha mkungusa kusa kosope kwa malo gakupelechela mbopesi.
21 Solomoni jwapakesye golide jwambone mnope mkati mosope mwa nyumbajo. Nambosoni jwalakwe ŵakoleche macheni ga golide kusogolo kwa chipinda cha mkati mnope chila soni chipindacho ŵachipakesye golide.
22 Jwalakwe ŵajipakesye golide nyumba josopejo mpaka kujimalisya nambosoni jwapakesye golide malo gosope gakupelechela mbopesi gagaliji chiŵandika ni chipinda cha mkati mnopecho.
23 Kaneko jwalakwe ŵapanganyisye akelubi ŵaŵili ni matabwa ga chitela cha payini* ni kwaŵika m’chipinda cha mkati mnopechi. Mkelubi jwalijose jwaliji jwamlewu makono 10.
24 Lipapiko limo lya mkelubi lyaliji lyelewu makono 5 soni lipapiko lya mbali jinejo lyaliji lyelewu makono 5. Kutyochela kusonga kwa lipapiko limo kuja kwika kusonga kwa lipapiko linelyo ulewu wakwe waliji makono 10.
25 Mkelubi jwaŵili jwalijisoni jwamlewu makono 10. Akelubi wosope ŵaŵiliŵa ŵaliji ŵakulandana ukulu soni ŵapanganyisye mwakulandana.
26 Mkelubi jumo jwaliji jwamlewu makono 10 mpela mujwaŵelele jwinejo.
27 Kaneko ŵaŵisile akelubiŵa m’chipinda chamkati mnope chila. Mapapiko ga akelubiŵa galiji getambasukule mwamti lipapiko lya mkelubi jumo lyayiche mpaka kwipupa soni lipapiko lya mkelubi jwinejo lyayichesoni ku lipupa lya mbali jine. Mapapiko gawo ganego ŵagatambasukulile pasikati pa nyumbajo mwamti gagundene.
28 Jwalakwe ŵapakesye golide akelubiŵa.
29 Mu yipinda yosope chinga yamkati kapena yakusa ya nyumbajo, mapupa gakwe gosope ŵajambwilemo yiwulili ya akelubi, yitela ya kanjesa soni maluŵa. Yosopeyi ŵayijambwile mwakutenda kugoba.
30 Jwalakwe ŵapakesye golide pasi pa yipinda yosope ya nyumbajo kutandila yamkati mpaka yapasa.
31 Nambosoni pamlango wakwinjilila mu chipinda chamkati mnope ŵapanganyisye matanga ga chitela cha payini, yipilala ya mumbali soni mafelemu kuti gaŵe mpela mbali jamsano.*
32 Matanga gaŵiliga galiji ga chitela cha payini soni jwalakwe ŵajambwile pa matangaga akelubi, yitela ya kanjesa soni maluŵa. Ŵajambwile yeleyi mwakutenda kugoba. Kaneko ŵagapakesye golide matangago, soni akelubi ni yitela ya kanjesa yaŵajambwile yila ŵayipakesye golide.
33 Mwelemu ni muŵawupanganyilesoni mlango wakwinjilila m’nyumbajo.* Mlangowo ŵawupanganyichisye mafelemu ga chitela cha payini kuti gaŵe kumbali jamcheche.*
34 Kaneko jwalakwe ŵapanganyisye matanga gaŵili ga yitela ya janipa. Litanga limo lyaliji lyegaŵanye pasikati, mwamti mbali jilijose ja litangalyo ŵakombolekaga kujiwugula. Litanga linelyo ŵaligaŵenyesoni pasikati mwamti mbali jilijose ja litangalyo ŵakombolekagasoni kujiwugula.
35 Jwalakwe ŵajambwile yiwulili ya akelubi, yitela ya kanjesa, soni maluŵa mwakutenda kugoba, mwamti ŵayipakesye yakwambulayo golide.
36 Jwalakwe ŵataŵile misela jitatu ja lipupa lya luŵala lwamkati ni maganga gakusepa. Ŵataŵilesoni msela wine wa matabwa gekulungwakulungwa ga chitela cha mkungusa.
37 Mu chaka chamcheche cha ulamusi wa Solomoni m’mwesi wa Sifi,* ŵaliji ali amalisisye kutaŵa fendeshoni ja nyumba ja Yehofa.
38 Nambosoni mu chaka cha 11, m’mwesi wa Buli* (wawuli mwesi wa 8), ŵamalisisye kutaŵa nyumbajo mwakamulana ni pulani jakwe josope. Myoyo jwalakwe ŵataŵile nyumbajo kwa yaka yakwana 7.
Maloŵe Gamwiŵanda
^ Mu Chihebeli ŵatiga, “ŵanache ŵa Isalayeli.”
^ Alole Yakumbesi B15.
^ Alole Yakumbesi B8.
^ Mkono umo waŵaga masemtimita 44.5. Alole Yakumbesi B14.
^ Pelepa akwamba malo geswela.
^ Mu Chihebeli ŵatiga, “kumlyo.”
^ Pelepa akwamba Malo Geswela gagaliji kusogolo kwa Malo Geswela Mnope.
^ Mu Chihebeli ŵatiga, “chitela chamawuta.”
^ Komboleka pelepa akwamba mwaŵapanganyile felemu ja pamlango kapena akwamba ya ukulu wa matanga.
^ Pelepa akwamba Malo Geswela.
^ Komboleka pelepa akwamba mwaŵapanganyile felemu ja pamlango kapena akwamba ya ukulu wa matanga.
^ Alole Yakumbesi B15.
^ Alole Yakumbesi B15.
