Buku Jandanda ja Ayimwene 5:1-18
5 Hilamu mwenye jwa ku Tulo paŵapikene kuti Solomoni asagulidwe kuŵa mwenye mmalo mwa babagwe, ŵatumisye ŵakutumichila ŵakwe kwa Solomonijo, pakuŵa Hilamu jwaliji mjakwe jwa Daudi* kwandaŵi jelewu.
2 Nombenajo Solomoni ŵatumisye maloŵe kwa Hilamu gakumsalila kuti,
3 “Wawojo akumanyilila chenene kuti Daudi baba ŵangu ŵalepele kutaŵa nyumba jakumanyika ni lina lya Yehofa Mlungu jwawo. Yaliji myoyo ligongo lya ngondo syakulimbana ni baba ŵanguwo syasyatyochelaga ku mbali syosope mpaka pandaŵi jele Yehofa ŵaŵisile adani ŵa baba ŵanguwo pasi pa chindende cha sajo syawo.
4 Nambo sambano Yehofa Mlungu jwangu ambele mtendele kutyochela ku mbali syosope. Pangali jwalijose jwakulimbana ni une, soni pangali chakusakala chilichose chachikutendekwa.
5 Myoyo une nguganisya ya kutaŵa nyumba jakumanyika ni lina lya Yehofa, Mlungu jwangu. Yeleyi ni yaŵasasile Yehofa kuti chachimtendela Daudi baba ŵangu paŵasalile kuti, ‘Mwanache jwenu jwele chinjimtamika pa mpando wenu waumwenye mmalo mwa mmwejo, jwelejo ni jutachitaŵa nyumba jakumanyika ni lina lyangu.’
6 Sambano ŵalamule ŵandu ŵawo kuti angatile yitela ya mkungusa ya ku Lebanoni. Ŵakutumichila ŵangu chachikamula masengo yimpepe ni ŵakutumichila ŵawo, soni une chinjalipila ŵakutumichila ŵawo mwakamulana ni mtengo wele wawojo chalamule, pakuŵa wawojo akumanyilila chenene kuti pangali jumo mwa m’weji jwakusamanyilila chenene kukata yitela mpela ŵandu ŵa ku Sidoni.”
7 Hilamu paŵapikene maloŵe ga Solomoni ŵasangalele mnope mwamti ŵatite, “Nguŵenda kuti Yehofa achimbichikwe lelo, pakuŵa jwalakwe ampele Daudi mwanache jwalunda kuti awulongoleleje mtundu wekulungwawu.”
8 Myoyo Hilamu ŵatumisye utenga kwa Solomoni wakuti, “Une mbochele utenga wamwandumichisye. Chindende yosope yamkusaka, mwamti chinampeje matabwa ga yitela ya mikungusa soni ga yitela ya janipa.
9 Ŵakutumichila ŵangu chakanyakuleje matabwaga kutyochela ku Lebanoni ni kwawulaga nago ku nyasa. Kaneko une chinagataŵeje pampepe ni kugajajaŵilisya panyasa mpaka ku malo gachimusalile. Pagayiche kweleko chinagagopoleje kuti mmwejo mganyakuleje ni kwawulaga nago. Malipilo gakwe, mmwejo chimpelecheje yakulya yachinamsalileje yakuti ŵandu ŵa m’nyumba jangu alyeje.”
10 Myoyo Hilamu ŵapeleche matabwa gosope ga chitela cha mkungusa soni ga chitela cha janipa gele Solomoni ŵasakaga.
11 Nombenajo Solomoni ŵampele Hilamu tiligu jwakwana makoli* 20,000 kuti yiŵe yakulya ya ŵandu ŵa m’nyumba jakwe. Ŵampelesoni mawuta ga olifi gambone mnope gakwana makoli 20. Yeleyi ni yindu yele Solomoni ŵampaga Hilamu chaka chilichose.
12 Yehofa ŵampele lunda Solomoni mpela muŵaŵechetele kuti chachimpa. Nambosoni paliji mtendele pasikati pa Hilamu ni Solomoni mwamti jemanjaji ŵatesile mkamulano.
13 Mwenye Solomoni ŵasongangenye achalume ŵakwana 30,000 kutyochela mu Isalayeli mosope kuti akamuleje masengo gakwakanganichisya.
14 Jwalakwe ŵatumisyaga jemanjaji ku Lebanoni, ŵatumisyaga gulu ja ŵandu 10,000 mwesi uliwose. Jemanjaji ŵatamaga mwesi umo ku Lebanoni soni myesi jiŵili kumangwawo, soni Adonilamu ni juŵalongolelaga ŵandu ŵaŵakamulaga masengo gakwakanganichisya.
15 Solomoni jwakwete ŵamasengo wamba* ŵakwana 70,000. Ŵakwetesoni ŵamasengo ŵakukasa maganga* kwitumbi ŵakwana 80,000.
16 Solomoni jwakwetesoni nduna syakwana 3,300. Jemanjaji ŵalolelaga achalume ŵakamula masengowo.
17 Mwakamulana ni lilamusi lya mwenye, jemanjaji ŵakasaga maganga gekulungwakulungwa soni gakudula ni kugasepa kuti gaŵe gakutaŵila fendeshoni ja nyumba.
18 Myoyo ŵamasengo ŵakutaŵa ŵa Solomoni soni ŵamasengo ŵakutaŵa ŵa Hilamu pampepe ni Agebala ŵakamwile masengo gakukasa maganga. Jemanjaji ŵatesile yakuti matabwa soni maganga gakutaŵila nyumbajo gaŵe tayali.
Maloŵe Gamwiŵanda
^ Kapena kuti “ŵamnonyelaga Daudi.”
^ Koli jimo jaliji jakulandana ni malita 220. Alole Yakumbesi B14.
^ Kapena kuti “ŵakunyakula katundu.”
^ Mu Chihebeli ŵatiga, “ŵakata maganga.”
