Buku Jandanda ja Ayimwene 4:1-34
4 Mwenye Solomoni ŵalamulilaga mu Isalayeli mosope.
2 Aŵa ni ŵaŵaliji achakulungwakulungwa ŵa mu ulamusi wa Solomoni: Asaliya mwanache jwa Sadoki jwaliji jwakutaga mbopesi.
3 Eliholefu soni Ahiya ŵanache ŵa Sisa ŵaliji alembi. Yehosafati mwanache jwa Ahiludi ŵaliji jwakulemba mbili.
4 Benaya mwanache jwa Yehoyada ŵaliji jwamkulungwa jwa gulu ja asilikali. Sadoki soni Abiyatala ŵaliji ŵakutaga mbopesi.
5 Asaliya mwanache jwa Natani ŵaliji jwakusilolela nduna. Sabudi mwanache jwa Natani ŵaliji jwakutaga mbopesi soni mjawo jwa mwenye.
6 Ahisali jwaliji jwakulolela nyumba ja mwenye soni Adonilamu mwanache jwa Abada ŵalolelaga ŵandu ŵaŵakamulaga masengo gakwakanganichisya.
7 Solomoni ŵakwete nduna syakwana 12 sisyalongolelaga Ayisalayeli wosope. Ndunasi ni syasyapelechelaga yakulya kwa mwenye soni kwa ŵandu ŵa m’nyumba jakwe. Nduna jilijose jasosekwaga kupeleka yakulya kwa mwesi umo pa chaka.
8 Mena gawo galiji aga: Mwanache jwa Hula juŵalolelaga dela ja matumbi ja Efulayimu;
9 mwanache jwa Dekeli juŵalolelaga ku Makasi, ku Saalibimu, ku Beti-semesi soni ku Eloni-beti-hanani;
10 mwanache jwa Hesedi juŵalolelaga ku Aluboti (jwalakwe ŵalolelaga dela ja Soko soni dela josope ja Hefa);
11 mwanache jwa Abinadabu juŵalolelaga madela gosope gakuseleleka ga Doli (jweleju ŵalombele Tafati juŵaliji mwanache jwamkongwe jwa Solomoni);
12 Baana mwanache jwa Ahiludi jwalolelaga ku Taanaki, ku Megido soni dela josope ja Beti-seyani. Dela jeleji jatesile malile ni dela ja Saletani chakwiŵanda kwa Yeseleeli, kutyochela ku Beti-seyani kuja kwika ku Abele-mehola mpaka ku chigawo* cha Yokimeyamu.
13 Mwanache jwa Gebeli ŵalolelaga ku Lamoti-giliyadi (jwalakwe ŵakwete misi ja matenti ja Yayili mwanache jwa Manase. Misi jeleji jaliji ku Giliyadi, chigawo chosope cha Agobu chaliji chakwe. Chigawochi chaliji ku Basana soni chakwete misinda jekulungwakulungwa jakwana 60 jijakwete ndenje soni mageti gakola yisyano yakopa).
14 Ahinadabu mwanache jwa Ido jwalolelaga ku Mahanaimu.
15 Ahimasi ŵalolelaga ku Nafitali (jwalakwe ŵalombele Basemati juŵaliji mwanache jwine jwamkongwe jwa Solomoni).
16 Baana mwanache jwa Husayi, ŵalolelaga ku Aseli soni ku Beloti.
17 Yehosafati mwanache jwa Paluwa jwalolelaga ku Isakala.
18 Simeyi mwanache jwa Ela, ŵalolelaga ku Benjamini.
19 Gebeli mwanache jwa Uli, ŵalolelaga dela ja Giliyadi, dela ja Sihoni mwenye jwa Aamoli soni dela ja Ogi mwenye jwa Basana. Papalisoni nduna jimo jajalolelaga nduna syosope sya m’madelasi.
20 Ayuda soni Ayisalayeli ŵatupile mnope mpela mchenga wa mungulugulu nyasa. Jemanjaji ŵalyaga soni kumwa ni kusangalalaga.
21 Solomoni ŵalamulilaga mauchimwene gosope kutyochela ku Lusulo* mpaka ku dela ja Afilisiti soni mpaka kuja kwika ku malile ga chilambo cha Iguputo. Jemanjaji ŵayikaga najo misongo* soni ŵamtumichile Solomoni kwa masiku gosope ga umi wakwe.
22 Palisiku lilisyose ŵandu ŵa m’nyumba ja Solomoni ŵalyaga utandi wetililiche wakwana milingo 30 ja koli* soni utandi wine wakwana milingo 60 ja koli,
23 ng’ombe syakwana 10 syakulichisya mwichinga, ng’ombe syakwana 20 syakulichisya kwitinji soni ngondolo syakwana 100, ngaŵalanjila njati, mbaŵala, ngolombwe soni mtundu wine wa yijuni yakunakana mnope.
24 Jwalakwe ŵalamulilaga chilichose cha ku lisi alino lya Lusulo* kutyochela ku Tifisa mpaka ku Gasa kupwatikapo mamwenye gosope ga lisi alino lya Lusulo. Jwalakwe ŵaliji pamtendele ni yigawo yosope yayasyungulile.
25 M’masiku gosope ga Solomoni, Ayuda soni Ayisalayeli wosope ŵatamaga mwangajogopa chilichose. Jwalijose jwatamaga pasi pa chitela chakwe cha mpeleya soni pasi pa chitela chakwe cha mkuju kutandila ku Dani mpaka ku Beele-seba.
26 Solomoni ŵakwete machinga gakwana 4,000* ga mahachi gagawutaga magaleta* gakwe soni ŵakwete mahachi* gane gakwana 12,000.
27 Nduna syelesi syapelekaga yakulya kwa mwenye Solomoni soni kwa jwalijose juŵalyaga patebulo ja mwenye Solomoni. Nduna jilijose jakamulaga masengo gakwe kwa mwesi umo soni jalolechesyaga kuti kwa mwesi welewo pangali chilichose chachikusoŵa.
28 Jemanjaji ŵajawusyaga balele soni manyasi gakuti mahachi gosope pampepe ni mahachi gane gakuwuta magaleta galyeje kulikose kwagasosechelaga, jwalijose jwayikaga ni yindu yeleyi mwakamulana ni winji waŵasosekwaga kupeleka.
29 Mlungu ŵampele Solomoni lunda lwejinji soni kupikanichisya yindu kwekulungwa mnope. Ŵampelesoni mtima wakupakombola kulondesya chenene yindu yejinji mpela mchenga wa mungulugulu nyasa.
30 Lunda lwa Solomoni lwaliji lwejinji mnope kupunda lunda lwa ŵandu wosope ŵa kungopokolyuŵa soni kupunda lunda losope lwa ku Iguputo.
31 Jwalakwetu jwaliji jwalunda mnope kumpunda mundu jwalijose; jwaliji jwalunda kumpunda Etani jwa m’liŵasa lya Esila. Nambosoni ŵaliji jwalunda kumpunda Hemani, Kalikoli ni Dalida ŵanache ŵa Maholi mwamti mbili jakwe japikaniche kwa ŵandu ŵa m’mitundu josope jajasyungulile.
32 Jwalakwe ŵalembile* misyungu jakwana 3,000 soni nyimbo syakwe syaliji syakwana 1,005.
33 Jwalakwe ŵaŵechetaga yakwamba yitela kutandila ni chitela cha mkungusa cha ku Lebanoni mpaka kachitela ka hisope kakakusamela pepupa. Ŵaŵechetagasoni yakwamba yinyama, yijuni,* yakwaŵa soni somba.
34 Ŵandu ŵakutyochela ku mitundu josope ŵayikaga kuti apikane lunda lwa Solomoni, pa ŵandu ŵaŵayikagaŵa papalisoni mamwenye gapachilambo chosope gagapikene ya lunda lwakwe.
Maloŵe Gamwiŵanda
^ Ku Mozambique akusati “província.”
^ Lwelelu luli lusulo lwa Filate.
^ Kapena kuti, “Mituka.”
^ Koli jimo jaŵaga malita 220. Alole Yakumbesi B14
^ Lwelelu luli lusulo lwa Filate.
^ Nambalaji jikusasimanikwa m’mipukutu jine soni m’machaputala gane ga Baibulo gagakulondesya ngani jakulandanajo. Mipukutu jine pelepa jikusati 40,000.
^ Magaleta gali ngolo syakuwutidwa ni mahachi.
^ Kapena kuti, “Achalume 12,000 ŵakwela pa mahachi .”
^ Kapena kuti, “ŵaŵechete.”
^ Kapena kuti, “Yaguluka yamwinani.”
