Buku Jandanda ja Ayimwene 3:1-28
3 Solomoni ŵatesile mkamulano wa ulombela ni Falawo mwenye jwa ku Iguputo. Jwalakwe ŵalombele* mwanache jwamkongwe jwa Falawo ni ŵayiche ni kutamaga najo ku Msinda wa Daudi mpaka pandaŵi jiŵamalisisye kutaŵa nyumba jakwe, nyumba ja Yehofa, soni lutenje lwa Yelusalemu.
2 Nambo ŵandu ŵaliji mkupelekape mbopesi syawo kumalo gakwela. Yaliji myoyo ligongo lyakuti pandaŵiji ŵaliji mkanaŵe kutaŵa nyumba jakumanyika ni lina lya Yehofa.
3 Solomoni ŵapitilisye kumnonyela Yehofa mwakupitilisya kukuya malamusi gaŵampele Daudi, babagwe. Gamba kuti jwalakwe ŵapelekaga mbopesi kumalo gakwela ni kusitinisyaga kuti sikoposyeje lyosi.
4 Kaneko mwenyewo ŵapite ku Gibiyoni kukupeleka mbopesi, pakuŵa kweleko ni kwagaliji malo gakwela gakuchimbichika mnope. Kweleko Solomoni ŵapeleche mbopesi syakutinisya syakwana 1,000 pa malo gakupelechela mbopesi.
5 Ku Gibiyoniko Yehofa ŵawonechele kwa Solomoni chilo musagamisi, mwamti Mlungu ŵamsalile jwalakwejo kuti, “Msale yamkusaka kuti unejo nampe.”
6 Pelepo Solomoni ŵajanjile kuti, “Wawojo amlosisye jwakutumichila jwawo Daudi, baba ŵangu, chinonyelo chakulupichika chekulungwa mnope. Pakuŵa baba ŵanguwo ŵatumichile* wawojo mwakulupichika, mwachilungamo soni mwakuwona mtima. Wawojo akupitilisya kwalosya baba ŵanguwo chinonyelo changamala chekulungwachi mpaka lelojino. Atesile yeleyi mwakwapa mwanache jwamlume kuti atame pa mpando waumwenye wa baba ŵanguwo.”
7 Nambosonitu wawo Yehofa Mlungu jwangu ambisile une kuŵa mwenye mmalo mwa Daudi baba ŵangu, atamose kuti une ndili kamnyamata soni jwangamanyilila yindu yejinji.
8 Une jwakutumichila jwawo ndili pasikati pa ŵandu ŵawo ŵele wawojo ŵasagwile. Ŵanduŵa ali ŵajinji mnope ŵakuti nganituŵa tukombwele kwaŵalanga.
9 Myoyo ambe une jwakutumichila jwawo mtima wakupikanila kuti ngomboleje kwalamula ŵandu ŵawoŵa, soni kuti ngomboleje kumanyilila chachili chambone ni chakusakala, pakuŵa ŵani ŵampaka akombole kwalamula ŵandu ŵawo ŵangaŵalanjikaŵa?”*
10 Yaŵaŵendile Solomoniyi yamsangalesye Yehofa.
11 Kaneko Mlungu ŵamsalile jwalakwejo kuti, “Ligongo lyakuti nganimŵenda umi welewu kapena chipanje kapenasoni kuti adani ŵenu awe, nambo mŵendile kupikanichisya yindu kuti mkomboleje kulamula magambo,
12 une chinampe yamŵendileyo. Chinampe lunda soni mtima wakupikanichisya yindu, mwamti kutandila kalakala nganipasimanikweje mundu jwamti mpela mmwejo, soni kusogolo ngasasimanikwa mundu jwampelaga mmwejo.
13 Konjechesya pelepa, une chinampesoni mmwejo yindu yanganimŵenda. Chinampe chipanje soni uchimbichimbi, mwamti mundaŵi josope ja umi wenu ngasasimanikwa mwenye jwine jwakulandana ni mmwejo.
14 Nambosoni chinjimpa umi welewu naga mkwenda m’matala gangu mwakukuya malamusi gangu mpela yaŵatite baba ŵenu, Daudi.
15 Sambano Solomoni paŵajimwiche, ŵayiweni kuti syaliji sagamisi. Kaneko jwalakwe ŵapite ku Yelusalemu ni kuja kwima pasogolo pa libokosi lya chilanga lya Yehofa, soni ŵapeleche mbopesi syakutinisya ni mbopesi syamkamulano. Kaneko ŵapanganyichisye pwando ŵakutumichila ŵakwe wosope.
16 Sambano kwayiche mahule gaŵili ni kwima pameso pa mwenyewo.
17 Jwamkongwe jwandanda jwaŵechete kuti, “Ambuje ŵangu, jwamkongwe aju ni une tukusatama m’nyumba jimo. Ni une naŵeleche mwanache jwalakwe ali mnyumba pemo.
18 Palisiku lyatatu une ndili mbeleche mwanache, jwamkongweju nombenajo jwaŵeleche mwanache. Pandaŵiji twaliji ŵaŵilipe, paliji pali pangalisoni mundu jwine jwalijose m’nyumbamo.
19 Nambo chilo, mwanache jwa jwamkongweju jwawile ligongo lyakuti ŵamgonele.
20 Myoyo pasikati pa chilo jwalakweju ŵajimwiche ni kumjigala mwanache jwangu juŵagonile pambali pangu. Pandaŵiji une jwakutumichila jwawo naliji ndili mlugono. Kaneko ŵamjigele mwanache jwangujo ni kumgoneka mmyala mwakwe, ni ŵamjigele mwanache jwakwe jwam’wejo ni kumgoneka mmyala mwangu.
21 Panajimwiche kundaŵi kuti namjonjesye mwanache jwangu, nayiweni kuti mwanachejo ali jwam’we. Myoyo panamlolechesye chenene mwanachejo kundaŵiko, nayiweni kuti nganaŵa mwanache jwangu junaŵeleche.
22 Nambo jwamkongwe jwinejo jwatite, “Iyayi, mwanache jwangu ali jwaumiju, jwenu ali jwam’wejo.” Nombe jwamkongwe jwandanda jula jwaŵechetaga kuti, “Iyayi, mwanache jwenu ali jwam’wejo, jwa une ali jwaumiju.” Mwelemu ni mwaŵatiga pakukangana pameso pa mwenyewo.
23 Pambesi pakwe, mwenyewo ŵaŵechete kuti, “Jwine akuti, ‘Mwanache jwangu ali jwaumiju, jwenu ali jwam’wejo.’ Pele jwine akuŵecheta kuti, ‘Iyayi, mwanache jwenu ali jwam’wejo, jwa une ali jwaumiju.’”
24 Pelepo mwenyewo ŵatite, “Ambe akuno upanga.* Myoyo ŵanduwo ŵayiche nawo upangawo kwa mwenye.
25 Kaneko mwenyewo ŵatite, “Amkate mwanache jwaumijo pasikati, mbali jimo ampe jwamkongwe jwinejo soni mbali jinejo ampe jwamkongwe jwineju.”
26 Ndaŵi jijojo jwamkongwe jwele jwaliji msyene jwa mwanache jwaumijo, jwaŵechete mwakwachondelela mwenyewo pakuŵa chamkamwile chanasa ligongo lya mwanache jwakwejo. Ni jwatite, “Chonde ambuje ŵangu, apeleche mwanache jwaumijo kwa ajanguwo, akalinga ata panandi kumwulaga.” Nambo jwamkongwe jwinejo jwaŵechetaga kuti, “Mwaleche amkatanye pasikati, kuti akaŵa jwa une kapena jwa mmwejo.”
27 Pelepo mwenyewo ŵaŵechete kuti, “Ampeleche mwanache jwaumiju kwa jwamkongwe jwandandajo. Akalinga kumwulaga, pakuŵa mamagwe ali ŵelewo.
28 Myoyo Ayisalayeli wosope paŵapikene yaŵatesile mwenyewo pakumasya nganijo, jemanjajo ŵasimonjile mnope ni lunda lwa mwenyewo, pakuŵa jemanjajo ŵayiweni kuti lunda lwa Mlungu lwaliji ni mwenyewo kuti akomboleje kwalamula ŵandu mwachilungamo.
Maloŵe Gamwiŵanda
^ Kapena kuti “ŵamjigele mwanache jwamkongwe jwa Falawo.”
^ Mu Chihebeli ŵatiga, “ŵajesile pameso pawo.”
^ Kagopolele Kanesoni “ŵakusawusya.” Mu Chihebeli ŵatiga, “ŵakusitopa.”
^ Upanga ukusawoneka mpela chipula chekulungwa chakutema kosekose.
