Buku Jandanda ja Ayimwene 18:1-46
18 Pali papite ndaŵi, m’chaka chatatu, Yehofa ŵaŵechetene ni Eliya ni kumsalila kuti, “Mnyakuche, mjawule mkawonechele pameso pa Ahabu ligongo une chingwisye wula pachilambo chapasi.”
2 Myoyo Eliya ŵanyakwiche ni kuja kuwonechela pameso pa Ahabu. Pandaŵiji ku Samaliya sala jaliji jili jiyiche pakogoya mnope.
3 Pandaŵi jijijisoni Ahabu ŵamŵilasile Obadiya juŵaliji jwakulolela nyumba ja mwenye. (Obadiya jweleju ŵaliji mundu jwakumjogopa mnope Yehofa,
4 soni pandaŵi jele Yesebele ŵawulagaga ŵakulochesya ŵa Yehofa, Obadiya jweleju ŵajigele ŵakulochesya ŵakwana 100 ni kwagaŵanya m’magulu gaŵili ga ŵandu 50. Kaneko ŵasisile kumbanga, ŵane mbanga jine ŵanesoni mbanga jine, mwamti ŵapaga mkate soni mesi.)
5 Kaneko Ahabu ŵamsalile Obadiya kuti, “Mnyakuche ni mjendejende m’chilambochi. Mpite m’malo mosope mwamuli yisima ya mesi soni mosope mwayili yitiŵi.* Mwine kweleko chitukapate manyasi gakwanila kulichisya mahachi soni abulu ŵetu kutendela kuti yinyama yetu yosope yikawa.”
6 Myoyo jemanjajo ŵagaŵene mbali syakwinjilila m’chilambocho. Ahabu ŵajinjilile mbali jine, nombenajo Obadiya ŵajinjililesoni kumbali jine.
7 Sambano Obadiya ali mwitala Eliya ŵayiche kuti asimane najo. Ndaŵi jijojo Obadiyajo ŵammanyilile jwalakwe, mwamti ŵatindiŵele ni kwinama mpaka ngope jakwe pasi ni kuŵecheta kuti, “Ambuje ŵangu Eliya, yisyene ali wawo?”
8 Jwalakwe ni ŵajanjile kuti, “Elo ndili une. Mjawule mkasalile ambuje ŵenu kuti, ‘Eliya juyiche.’”
9 Nambo Obadiyajo ŵajanjile kuti, “Ana une ndemwisye chichi kuti ambeleche une jwakutumichila jwawo mmyala mwa Ahabu kuti akambulaje?
10 Nditu ngulumbila pameso pa Yehofa Mlungu jwaumi, pangali chilambo ata chimo kwele ambuje ŵanguwo nganatumisyako ŵandu kuti akasosesose wawojo. Naga ŵandu ŵa m’chilambomo aŵechete kuti, ‘Jwalakwejo nganaŵa akuno,’ ambuje ŵanguwo ŵatendekasyaga ŵandu ŵa m’chilambomo kulumbila naga yili yisyene kuti nganiŵapata wawojo.
11 Sambano wawo apa akuti njawule ngasalile ambuje ŵangu kuti wawojo ayiche.
12 Unetu pachingambe kutyoka apano ni kwaleka wawojo, msimu wa Yehofa chiwajigale wawojo ni kwajawusya kumalo gele une nganimba nagamanyi. Mwamti une pachinjawule kukumsalila Ahabu, jwalakwejo ni kwika ni ngasimana wawojo, nditu jwalakwe chambulaje une. Nambotu une jwakutumichila jwawo mbele ndili mkumjogopa Yehofa kutandila ndili mnyamata.
13 Ana wawo ambuje ŵangu nganapikana yanatesile pandaŵi jele Yesebele ŵawulagaga ŵakulochesya ŵa Yehofa? Unetu najigele ŵakulochesya ŵa Yehofa ŵakwana 100 ni kwagaŵanya m’magulu gaŵili ga ŵandu 50. Kaneko nasisile mumbanga, ŵane mbanga jine ŵanesoni mbanga jine, mwamti napitilisye kwapa mkate soni mesi.
14 Sambano wawo apa akuti njawule ngasalile ambuje ŵangu kuti wawojo ayiche. Ŵelewotu chambulaje une basi.”
15 Nambo Eliya ŵajanjile kuti, “Nditu ngulumbila pameso pa Yehofa Mlungu jwaumi jwakusalamulila yakwinani soni jwangusamtumichila, lelo chimbonechele kwa Ahabu.”
16 Myoyo Obadiyajo ŵapite kukusimana ni Ahabu ni kumsalila yeleyi, mwamti Ahabu ŵapite kukusimana ni Eliyajo.
17 Ahabu paŵagambile kumwona Eliyajo ŵaŵechete kuti, “Ana mli mmwejo eti? Mmwejotu mwatendekasisye Ayisalayeli kulaga mnope.”
18 Pelepo Eliyajo ŵajanjile kuti, “Unetu nganindendekasya kuti Ayisalayeli alaje. Nambo wawojo ni ŵandu ŵa m’nyumba ja baba ŵawo ni ŵatendekasisye. Jemanja mlesile kupikanila malamusi ga Yehofa soni mtandite kukuya yiwanichisyo ya Baala.
19 Sambano mwasonganganye Ayisalayeli wosope kuti akasimane ni une ku Litumbi lya Kalimeli. Mwasonganganyesoni ŵakulochesya 450 ŵa Baala soni ŵakulochesya 400 ŵakutindiŵalila njalamila japadela* ŵakusalya pa tebulo ja Yesebele.”
20 Myoyo ŵatumisye maloŵe kwa Ayisalayeli wosope soni ŵasongangenye ŵakulochesyawo ku Litumbi lya Kalimeli.
21 Kaneko Eliya ŵaŵandichile ŵandu wosopewo ni kwasalila kuti, “Ana chimpitilisye kuŵa ŵakayichila mpaka chakachi? Naga Yehofa ali Mlungu jwakuwona mumkuye jwalakwe, nambo naga Baala ni jwali Mlungu jwakuwona mumkuyeje jwalakwejo.” Nambo ŵanduwo nganamjanga kalikose.
22 Jwalakwe ŵapitilisye kuŵecheta kuti, “Jwakulochesya jwa Yehofa jwasigele ndili unepe basi. Nambo ŵakulochesya ŵa Baala apali achalume ŵakwana 450.
23 Myoyo ŵakunde ŵandu kuti atupe ŵanache ŵa ng’ombe ŵaŵili soni ŵakulochesyawo asagulepo ng’ombe jimo. Ajikatanyekatanye ni kujiŵika pasasu nambo akapambapo moto. Une chilinganye ng’ombe jakusigalajo ni kujiŵika pasasu nambo ngambambapo moto.
24 Kaneko jemanja mŵilanje mu lina lya mlungu jwenu, soni une chimbilanje mu lina lya Yehofa. Mlungu jwachajanje mwakutumisya motojo, jwelejo ni juchalosye kuti ali Mlungu jwakuwona.” Pelepo ŵandu wosope ŵajanjile kuti, “Yamŵecheteyi yili yambone.”
25 Sambano Eliya ŵasalile ŵakulochesya ŵa Baalawo kuti, “Mtande jemanja kusagula mwanache jumo jwa ng’ombe soni mumlinganye ligongo jemanja mpali ŵajinji. Kaneko mŵilanje mu lina lya mlungu jwenu, nambo ngamkusosekwa kupamba moto.”
26 Myoyo jemanjajo ŵajigele mwanache jwa ng’ombe juŵasagwilejo ni kumlinganya. Mwamti jemanjaji ŵapitilisye kuŵilanga pa lina lya Baala kutandila kundaŵi mpaka musi, ŵaŵechetaga kuti, “Wawo Baala, atujanje!” Nambo nganipapikanika maloŵe galigose soni pangali juŵajanjile. Jemanjaji ŵapitilisye kugulukaguluka ali mkusyungulila malo gakupelechela mbopesi gaŵapanganyisyego.
27 Kaneko musi, Eliya ŵatandite kwaseka jemanjajo ni kuŵechetaga kuti, “Amŵilanje mwakwesya maloŵe mnope, pakuŵa jwalakwejo ali mlungu! Mwine yipali yakuyiganichisya, kapena mwine apite kuchimbusi,* kapenasoni mwine akugona ni akusosekwa kuti jwinejwakwe amjimusye!”
28 Jemanjajo ŵapitilisye kuŵilanga mwakwesya maloŵe mnope kwineku ali mkulikatakata ni yipula soni mapanga mwakamulana ni mwambo wawo, mpaka myasi jatandite kwendelela pa yilu yawo.
29 Lyuŵa palyajawulaga cha kwigulo jemanjaji ŵapitilisyepe kutenda yindu mpela ŵamasoka,* mpaka ŵayikene ligulo ndaŵi jakupeleka mbopesi jambeju. Nambo nganipapikanika maloŵe galigose soni pangali juŵajanjile. Pangali jwalijose juŵaliji mkwapikanila.
30 Panyuma pakwe Eliya ŵasalile ŵandu wosopewo kuti, “Aŵandichile akuno.” Myoyo ŵandu wosopewo ŵamŵandichile jwalakwe. Kaneko jwalakwe ŵalinganyisye malo gakupelechela mbopesi ga Yehofa gele ŵaliji ali agagwisisye.
31 Kaneko Eliya ŵajigele maganga gakwana 12 mwakamulana ni mbumba* sya ŵanache ŵa Yakobo jwele Yehofa ŵamsalile kuti, “Lina lyenu chiliŵe Isalayeli.”
32 Jwalakwe ŵajigele magangaga ni kutaŵila malo gakupelechela mbopesi pakusaka kuchimbichisya lina lya Yehofa. Kaneko jwalakwe ŵasosile ngalande kusyungulila malo gakupelechela mbopesi gosope. Ukulu wa malo gaŵasosilego waliji wakukwana kupandapo mbeju syakwana milingo jiŵili ja seya.*
33 Kaneko jwalakwe ŵaŵisile chenene sasu pamalo gakupelechela mbopesigo nambosoni ŵamkatenyekatenye mwanache jwa ng’ombe jula ni kumŵika penani pa sasusyo. Kaneko jwalakwe ŵasalile ŵanduwo kuti, “Agumbasye ni mesi m’milulo* jekulungwakulungwa jakwana mcheche ni kugakusulila pambopesi jakutinisyaji ni pasasusi.”
34 Kaneko jwalakwe ŵatite, “Atajesoni kane.” Myoyo ŵanduwo ŵatasile. Jwalakwe ŵaŵechetesoni kuti, “Atajesoni ulendo wine watatu.” Pelepo ŵanduwo ŵatasile ulendo watatu.
35 Mesigo gajendelele pamalo gosope gakupelechela mbopesigo, nambosoni jwalakwe ŵagumbesye ngalande josope jila ni mesi.
36 Pajakwanaga ndaŵi jakupeleka mbopesi ja ligulo, jwakulochesya Eliya jwasejele kusogolo ni kutanda kupopela kuti, “Wawo Yehofa, Mlungu jwa Abulahamu, Isaki soni Isalayeli. Chonde atendekasye kuti lelo yimanyiche kuti wawojo ali Mlungu mu Isalayeli muno soni kuti une ndili jwakutumichila jwawo nambosoni kuti une ndesile yindu yosopeyi ligongo lya maloŵe gawo.
37 Wawo Yehofa, chonde anjanje une. Anjanje ni chakulinga chakuti ŵandu wosopeŵa amanyilile kuti wawo Yehofa ali Mlungu jwakuwona, soni kuti wawojo akujitendekasya mitima ja jemanjaji kuti jiwujile kwa wawojo.”
38 Pelepo moto wa Yehofa wagwile kutyochela kwinani ni kocha mbopesi syakutinisya sila, sasu sila, maganga gala soni litaka. Nambosoni motowo wajumwisye mesi gosope gagaliji mungalande mula.
39 Ŵandu wosopewo paŵayiweni yeleyi, ndaŵi jijojo ŵatindiŵele ni kwinama mpaka ngope syawo pasi ni kuŵecheta kuti, “Yehofa ali Mlungu jwakuwona! Yehofa ali Mlungu jwakuwona!”
40 Kaneko Eliya ŵasalile ŵanduwo kuti, “Ŵakamule ŵakulochesya ŵa Baala! Pakasimanikwa ata jumo jwakutila!” Ndaŵi jijojo ŵanduwo ŵakamwile ŵakulochesyawo, mwamti Eliya ŵajigele jemanjajo ni kwawula nawo ku lusulo* lwa Kisoni ni ŵasikite wosopewo kweleko.
41 Sambano Eliya ŵamsalile Ahabu kuti, “Anyakuche, ajawule akalye soni kumwa pakuŵa kukupikanika lisegwe lya wula jamachili.”
42 Myoyo Ahabu ŵanyakwiche ni kwawula kukulya soni kumwa. Nambo Eliya ŵakwesile penani pa Litumbi lya Kalimeli ni kutindiŵala soni ŵaŵisile ngope jakwe pasikati pa malungo gakwe.
43 Kaneko Eliya ŵamsalile jwakutumichila jwakwe kuti, “Mjawule mkalole mbali ja kunyasa.” Myoyo jwakutumichilajo jwanyakwiche ni kwawula kukulola. Ni jwaŵechete kuti, “Kwangali chilichose.” Nambo Eliya ŵamsalilaga jwalakwejo kuti, “Mjawule mkalolesoni.” Ŵatesile yeleyi kwa maulendo 7.
44 Paulendo wa 7, jwakutumichilajo ŵatite, “Naliweni liwunde lyamwana ukulu wakwe mpela ligasa lya mundu, likukopoka kutyochela m’nyasa.” Eliya ni ŵamsalile jwalakwejo kuti, “Mnyakuche mkasalile Ahabu kuti, ‘Mtaŵilile mahachi ku ligaleta* lyenu ni mnyakuche kuti wula jikamsiŵila petala.’”
45 Kaneko kwinani kwatesile chipi ligongo lya mawunde soni mbungo jatandite kupuga, mwamti wula jamachili jatandite kugwa. Ahabu jula jwapitilisye kwenda pa ligaleta lyakwe mpaka jwapite kuja kwika ku Yeseleeli.
46 Nambo Yehofa ŵampele machili Eliya, mwamti jwalakwe jwataŵile chakuwala chakwe m’chiwunu ni kutanda kuwutuka kumpunda Ahabu jula mpaka jwapite kuja kwika ku Yeseleeli.
Maloŵe Gamwiŵanda
^ Yitiŵi yakusala pelepa yaliji yana sulo.
^ Alole Kugopolela kwa Maloŵe Gane.
^ Kagopolele kanesoni, “mwine kupali kwapite.”
^ Kapena kuti “ŵapitilisye kutenda yindu mpela ŵakulochesya.”
^ Alole Kugopolela kwa Maloŵe Gane.
^ Mlingo umo wa seya waŵaga malita 7.33. Alole Yakumbesi B14.
^ Ŵane akusati “malulo; wulo.”
^ Kapena kuti “chitiŵi chakola lusulo.”
^ Ligaleta lili ngolo jakuwutidwa ni mahachi.
