Ayimwene Jandanda 17:1-24
17 Sambano Eliya*+ jwa ku Tisibe juŵatamaga ku Giliyadi+ ŵamsalile Ahabu kuti, “Nditu ngulumbila pameso pa Yehofa Mlungu jwaumi jwa Ayisalayeli jwele une ngusamtumichila, kwa yaka yeleyi ngapapagwa mangame kapena kugwa wula mpaka une ndili mbechete.”+
2 Kaneko Yehofa ŵaŵechete kwa Eliya kuti,
3 “Mtyoche akuno ni mjawule kungopokolyuŵa soni mkajuŵe ku Chitiŵi cha Keliti* chachili kungopokolyuŵa kwa Yolodani.
4 Mkamweje mesi ga mu lusulo kweleko soni une chinagalamule makungulu kuti gakampeje yakulya kweleko.”+
5 Ndaŵi jijojo jwalakwe ŵanyakwiche ni kutenda mwakamulana ni maloŵe ga Yehofa. Jwapite kuja kutama mungulugulu Chitiŵi cha Keliti* chachili kungopokolyuŵa kwa Yolodani.
6 Nambosoni makungulu gayikaga kukumpa jwalakwejo mkate* soni nyama kundaŵi ni ligulo, soni jwamwaga mesi kutyochela mu lusulo.+
7 Nambo pali papitile masiku, lusulolo lwajumwile+ ligongo wula nganijigwaga m’chilambomo.
8 Kaneko Yehofa ŵaŵechete kwa Eliya kuti,
9 “Mnyakuche ni mjawule ku Salefati jwa ku Sidoni soni mkatame kweleko. Une chingamlamule jwamkongwe jwamasije kweleko kuti akampeje yakulya.”+
10 Myoyo jwalakwe jwanyakwiche ni kwawula ku Salefati. Jwalakwe ali ayiche pamlango wakwinjilila mumsindamo ŵam’weni jwamkongwe jwamasije ali mkulokotanya sasu. Myoyo ŵamŵilasile jwamkongwejo ni kumsalila kuti, “Chonde angayile panandi mesi mkapu kuti mwe.”+
11 Jwamkongwejo paŵajawulaga kuti akajigale mesigo, Eliya ŵamŵilasile jwalakwejo ni kumsalila kuti, “Chonde mkayichesoni ni mkate.”
12 Pelepo jwamkongwejo jwajanjile kuti, “Nditu ngulumbila pameso pa Yehofa Mlungu jwawo jwali jwaumi, une nganingola mkate. Ngambile kola utandi wammyala mu lulo lwekulungwa soni mawuta gamnono mu lulo lwamwana.+ Sambano ngulokotanya sasusi kuti ngateleche kanekakwe kakulya une ni mwanache jwangu. Yeleyi chiyikaŵe yakulya yakumalisya, kaneko tuwe.”
13 Eliya ni ŵamjanjile jwalakwejo kuti, “Mkajogopa mjawule mkatende yamsasileyo. Nambo chandanda mundelechele mkate wamwana wakusyungulila ni yindu yayipaliyo, kaneko ni myiche nawo mkatewo kwa une. Panyuma pakwe mteleche yakulya ya mmwejo ni mwanache jwenujo.
14 Pakuŵa Yehofa Mlungu jwa Isalayeli aŵechete kuti, ‘Utandi wawuli mu lulo lwekulungwalo ngawumala soni mawuta gagali mu lulo lwamwanalo ngagamala mpaka pa lisiku lyele Yehofajo chachiyikasya wula pachilambo chapasi.’”+
15 Pelepo jwamkongwejo ŵanyakwiche ni kuja kutenda yaŵasasile Eliyayo. Mwamti jwalakwe pampepe ni ŵandu ŵa m’nyumba jakwe soni Eliyajo ŵalile kwa masiku gejinji.+
16 Utandi wawaliji mu lulo lwekulungwa wula nganiwumala, soni mawuta gagaliji mu lulo lwamwana gala nganigamala mwakamulana ni yaŵaŵechete Yehofa kupitila mwa Eliya.
17 Panyuma pa yeleyi, mwanache jwa jwamkongwejo jwatandite kulwala, soni ulwelewo wakusile mnope mwamti mpaka mwanachejo jwawile.+
18 Pelepo jwamkongwejo ŵamwusisye Eliyajo kuti, “Ana wawo mundu jwa Mlungu jusyesyene, une naleŵele chichi? Ana ayiche kukungumbusya une yakulemwa yangu soni kukumwulaga mwanache jwangu?”+
19 Eliya ŵamjanjile jwamkongwejo kuti, “Mumbe akuno mwanachejo.” Kaneko Eliya ŵamjigele mwanachejo mmyala mwa mamagwewo ni kwawula najo kuchipinda cha pamsakasa* chaŵatamaga Eliyajo ni ŵamgoneche mwanachejo pabedi jakwe.+
20 Jwalakwe jwapopesile kwa Yehofa kuti, “Wawo Yehofa Mlungu jwangu,+ ligongo chichi akundile kuti jwamkongwe jwamasije jwangutama najoju asimane ni yakusawusya? Ligongo chichi akundile kuti mwanache jwakwe awe?”
21 Kaneko jwalakwe ŵamkumbatile mwanachejo kwa maulendo gatatu ni kupopela kwa Yehofa kuti, “Wawo Yehofa Mlungu jwangu, chonde atende yakuti umi wa mwanacheju uwujile.”
22 Yehofa ŵapikene kuŵenda kwa Eliyako,+ mwamti umi wa mwanachejo wawujile soni jwaŵele umi.+
23 Eliya ŵamjigele mwanachejo ni kutuluka mu chipinda cha pamsakasa chila ni kwinjila m’nyumba. Kaneko ŵampeleche mwanachejo kwa mamagwe soni Eliyajo jwaŵechete kuti, “Mlole, mwanache jwenu aju ali umi.”+
24 Pelepo jwamkongwejo ŵamjanjile Eliyajo kuti, “Sambano manyilile kuti yisyene wawojo ali mundu jwa Mlungu,+ soni kuti maloŵe gaŵechete Yehofa kupitila mwa wawojo gali gasyesyene.”
Maloŵe Gamwiŵanda
^ Kugopolela kuti “Mlungu Jwangu Ali Yehofa.”
^ Chitiŵi chakusala pelepa chaliji chana lusulo.
^ Chitiŵi chakusala pelepa chaliji chana lusulo.
^ Mikate jakala ŵajipanganyaga ni utandi wa tiligu kapena balele.
^ Chipindachi ŵachitaŵaga pamsakasa wa nyumba. Yeleyi yakombolekaga ligongo nyumba syejinji syakala syakolaga msakasa wafulati wesyasyajile.
