Buku Jandanda ja Ayimwene 16:1-34
16 Sambano Yehofa jwaŵechete maloŵe gakumsisya Basa kupitila mwa Yehu mwanache jwa Hanani. Maloŵego galiji gakuti,
2 “Une namtyosisye mmwejo pa luwundu ni kumŵika kuti mŵe mlongola jwa ŵandu ŵangu Ayisalayeli. Nambo mmwejo mwapitilisye kukuya yindu yaŵatendaga Yelobowamu soni mwatendekasisye ŵandu ŵangu Ayisalayeli kuti alemwe, mwamti jemanjajo ŵandumbilikasisye une ni yakulemwa yawoyo.
3 Myoyo une chinampyajile Basa yimpepe ni ŵandu wosope ŵa m’nyumba jakwe. Chindendekasye kuti nyumba jakwe jiŵe mpela nyumba ja Yelobowamu mwanache jwa Nebati.
4 Mundu jwalijose jwa m’nyumba ja Basa juchachiwila mumsinda mbwa sichilya mtembo wakwe, soni jwalijose jwa m’nyumba jakwe juchachiwila mwitinji yijuni yamwinani yichilya mtembo wakwe.”
5 Mbili josope ja umi wa Basa, yosope yaŵatesile soni machili gakwe yalembedwe m’buku ja mbili ja mundaŵi ja achayimwene ŵa ku Ayisalayeli.
6 Kaneko Basa jwawile mpela mwayaŵelele ni achinangolo ŵakwe, soni ŵamsichile m’malembe ku Tilisa, mwamti Ela mwanache jwakwe jwaŵele mwenye mmalo mwa jwalakwe.
7 Yehofa ŵaŵechetesoni maloŵe gakumsisya Basa pampepe ni ŵandu ŵa m’nyumba jakwe kupitila mwa jwakulochesya Yehu, mwanache jwa Hanani. Jwaŵechete maloŵega ligongo lya yakusakala yosope yaŵatesile jwalakwe pameso pa Yehofa, pakuŵa Basa ŵamtumbilikasisye Mlungu ligongo lya yakulemwa yaŵatesile ni makono gakwe, mwamti ŵaŵele mpela ŵandu ŵa m’nyumba ja Yelobowamu. Nambosoni ligongo lyakuti jwalakwe ŵamwuleje Nadabu.
8 Mu chaka cha 26 cha ulamusi wa Mwenye Asa jwa ku Yuda, Ela mwanache jwa Basa jwaŵele mwenye jwa Ayisalayeli ku Tilisa. Jwalakwe jwalamulile kwa yaka yiŵili.
9 Simuli juŵaliji jwakutumichila jwakwe, soni mlongola jwa hafu ja asilikali ŵakwe ŵakwenda pa magaleta* ŵamlinganyichisye chiwembu. Pandaŵiji Elajo ŵaliji ku Tilisa ali mkumwa mpaka kukolelwa m’nyumba ja Alisa, jwele ŵaliji jwakulolela nyumba ja mwenye ku Tilisako.
10 Simuli ŵajinjile m’nyumbamo ni kumwulaga jwalakwe mu chaka cha 27 cha ulamusi wa Mwenye Asa jwa ku Yuda. Kaneko Simuli ŵaŵele mwenye mmalo mwa jwalakwejo.
11 Jwalakwe paŵagambile kuŵa mwenye ni kutama pampando wakwe waumwenye jwawuleje ŵandu wosope ŵa m’liŵasa lya Basa. Jwalakwe nganamleka ni umi jwamlume jwalijose jwa m’liŵasa lya Basa, chinga jwachibale* kapena mjakwe.
12 Myoyo Simuli ŵawuleje ŵandu wosope ŵa m’nyumba ja Basa mwakamulana ni maloŵe ga Yehofa gakusisyana ni Basa gaŵaŵechete kupitila mwa Yehu juŵaliji jwakulochesya.
13 Yeleyi yatendekwe ligongo lya yakulemwa yosope yele Basa soni mwanache jwakwe Ela ŵatesile. Yeleyi yatendekwesoni ligongo lyakuti jemanjaji ŵatendekasisye Ayisalayeli kulemwa mwakujitindiŵalila milungu jawo jangali mate, yele yamtumbilikasisye Yehofa Mlungu jwa Ayisalayeli.
14 Mbili josope ja umi wa Ela, soni yosope yaŵatesile yalembedwe m’buku ja mbili ja mu ndaŵi ja mamwenye ga ku Isalayeli.
15 Mu chaka cha 27 cha ulamusi wa Mwenye Asa jwa ku Yuda, Simuli jwaŵele mwenye kwa masiku 7 ku Tilisa. Pandaŵiji magulu ga asilikali ŵangondo galiji gali gakunjile matenti gawo kuti galimbane ni msinda wa Gibitoni wawaliji wa Afilisiti.
16 Pali papite ndaŵi magulu ga asilikali gagakunjile matenti gawo gala gapikene ŵandu ali mkuŵecheta kuti, “Simuli alinganyisye chiwembu, mwamti ŵawuleje mwenye. Myoyo paŵapikene yeleyi, Ayisalayeli wosope ŵaŵaliji ku matentiko ŵamŵisile Omuli juŵaliji mlongola jwa asilikali kuŵa mwenye jwa Ayisalayeli kutandila palisiku lyelelyo.
17 Kaneko Omuli pampepe ni Ayisalayeli wosope ŵaŵaliji ni jwalakwe ŵatyosile ku Gibitoni ni kwawula kuja kusyungulila msinda wa Tilisa kuti awugomeche.
18 Simuli paŵayiweni kuti msindawo awugomeche, ŵapite ni kuja kwinjila mu sanja jakulimba jajaliji panyumba ja mwenye. Kaneko Simulijo ŵajichomile moto nyumbajo jwalakwe ali m’momo mwamti jwawile.
19 Yeleyi yatendekwe ligongo lya yakulemwa yaŵatesile jwalakwe, pakuŵa jwalakwe ŵatesile yindu yakusakala pameso pa Yehofa mwakuya yaŵatendaga Yelobowamu. Nambosoni ligongo lyakuti jwalakwe ŵatendekasisye Ayisalayeli kulemwa.
20 Mbili josope ja umi wa Simuli soni yiwembu yakwe yalembedwe m’buku ja mbili ja mundaŵi ja achayimwene ŵa ku Isalayeli.
21 Ndaŵi jeleji ni jele ŵandu ŵa ku Isalayeli ŵagaŵikangene magulu gaŵili. Gulu jimo ja ŵandu jaliji kumbali ja Tibini mwanache jwa Ginati mwamti ŵasakaga kum’wecha umwenye, soni gulu jinejo jaliji kumbali ja Omuli.
22 Nambo ŵandu ŵaŵaliji ku mbali ja Omuli ŵapundile ŵandu ŵaŵaliji ku mbali ja Tibini mwanache jwa Ginati. Myoyo Tibinijo ŵawile mwamti Omuli ŵaŵele mwenye.
23 Mu chaka cha 31 cha ulamusi wa Mwenye Asa jwa ku Yuda, Omuli jwaŵele mwenye jwa Ayisalayeli, soni jwalakwe jwalamulile kwa yaka yakwana 12. Nambo ku Tilisa jwalamulile kwa yaka yakwana 6.
24 Jwalakwe ŵasumile kwa Semeli litumbi lya Samaliya pa mtengo wa matalente* gaŵili ga silifa, soni jwalakwe ŵataŵile msinda palitumbilyo. Msindawo ŵawupele lina lyakuti Samaliya pakuya lina lya Semeli juŵaliji msyene litumbilyo.
25 Omuli ŵapitilisye kutenda yakusakala pameso pa Yehofa, mwamti jwalakwe ŵatesile yindu yakusakala mnope kugapunda mamwenye gosope gagapali jwalakwejo mkanaŵe kuŵa mwenye.
26 Jwalakwe ŵakuyiye yosope yaŵatendaga Yelobowamu mwanache jwa Nebati. Nambosoni ŵatesile yakulemwa yaŵatendekasisye Ayisalayeli kulemwa, mwakujitindiŵalila milungu jawo jangali mate yele yamtumbilikasisye Yehofa Mlungu jwa Ayisalayeli.
27 Mbili josope ja umi wa Omuli, yosope yaŵatesile, soni yindu yamachili yaŵatesile yalembedwe m’buku ja mbili ja mundaŵi ja achayimwene ŵa ku Isalayeli.
28 Panyuma pakwe Omuli ŵawile mpela mwayaŵelele ni achinangolo ŵakwe soni ŵamsichile m’malembe ku Samaliya. Kaneko mwanache jwakwe Ahabu jwaŵele mwenye mmalo mwakwe.
29 Ahabu mwanache jwa Omuli jwaŵele mwenye jwa Ayisalayeli mu chaka cha 38 cha ulamusi wa Mwenye Asa jwa ku Yuda, soni Ahabu mwanache jwa Omulijo ŵalamulile Ayisalayeli ku Samaliya kwa yaka 22.
30 Ahabu mwanache jwa Omuli ŵatesile yakusakala mnope pameso pa Yehofa kupunda yosope yagatesile mamwenye gagapali jwalakwejo mkanaŵe kuŵa mwenye.
31 Jwalakwe jwatesile yakulemwa mpela yaŵatesile Yelobowamu mwanache jwa Nebati. Nambope yaŵatesileyi ŵayiweni kuŵa yangakwanila, mwamti jwalakwe ŵayikene pakulombela Yesebele juŵaliji mwanache jwamkongwe jwa Etibala mwenye jwa Asidoni. Nambosoni jwalakwe ŵatandite kumtumichila Baala soni kumtindiŵalila.
32 Konjechesya pelepa jwalinganyisye malo gakupelechela mbopesi ga Baala kunyumba ja Baalajo jiŵataŵile ku Samaliya.
33 Nambosoni Ahabu ŵapanganyisye njalamila japadela.* Jwalakwe ŵatesile yindu yejinji yakumtumbilikasya Yehofa Mlungu jwa Ayisalayeli kupunda yagatesile mamwenye gosope ga ku Isalayeli gagapali jwalakwejo mkanaŵe kuŵa mwenye.
34 M’masiku ga ulamusi wa Ahabu, Hiyele jwa ku Beteli ŵataŵilesoni msinda wa Yeliko. Paŵataŵile fendeshoni ja msindawu mwanache jwakwe jwandanda lina lyakwe Abilamu jwawile, soni paŵaŵisile matanga gakwe mwanache jwakwe jwakumalisya lina lyakwe Segubu jwawile. Yeleyi yatendekwe mwakamulana ni maloŵe gaŵaŵechete Yehofa kupitila mwa Yoswa mwanache jwa Nuni.
Maloŵe Gamwiŵanda
^ Magaleta gali ngolo syakuwutidwa ni mahachi.
^ Kapena kuti “jwakuwuchisya magambo ga myasi.”
^ Talente jimo jaŵaga jakusitopa makilogolamu 32.2. Alole Yakumbesi B14.
^ Alole Kugopolela kwa Maloŵe Gane.
