Ayimwene Jandanda 15:1-34
15 Mu chaka cha 18 cha Mwenye Yelobowamu+ mwanache jwa Nebati, Abiyamu jwaŵele mwenye jwa Ayuda.+
2 Jwalakwe jwalamulile kwa yaka yitatu ku Yelusalemu. Lina lya mamagwe lyaliji Maaka+ ŵaŵaliji chisukulu cha Abisalomu.
3 Jwalakwe ŵapitilisye kutenda yakulemwa yosope yaŵatendaga babagwe, soni jwalakwe nganalipelekaga kwa Yehofa Mlungu jwakwe ni mtima wakwe wosope mpela muŵatendele Daudi, nangolo jwakwe.
4 Nambo ligongo lya Daudi,+ Yehofa Mlungu ŵampele Abiyamujo nyali mu Yelusalemu.+ Ŵatesile yeleyi mwakumsagula mwanache jwakwe kuti aŵe mwenye ni chakulinga chakuti Yelusalemu apitilisye kusimanikwa.
5 Yaliji myoyo ligongo lyakuti Daudi ŵatesile yindu yambone pameso pa Yehofa soni jwalakwe ŵatesile yosope yele Mlungu ŵamlamulaga m’masiku gosope ga umi wakwe kulekapo ngani ja Uliya Mhiti.+
6 Nambosoni m’masiku gosope ga umi wakwe,+ Lehobowamu ŵatamilaga kumenyana ngondo ni Yelobowamu.
7 Mbili josope ja umi wa Abiyamu soni yosope yaŵatesile, yalembedwe m’buku ja mbili ja mundaŵi ja mamwenye ga ku Yuda.+ Papalisoni ngondo pasikati pa Abiyamu ni Yelobowamu.+
8 Kaneko Abiyamu jwawile mpela mwayaŵelele ni achinangolo ŵakwe soni ŵamsichile m’malembe mu Msinda wa Daudi. Kaneko mwanache jwakwe lina lyakwe Asa,+ ŵaŵele mwenye mmalo mwa jwalakwejo.+
9 Mu chaka cha 20 cha ulamusi wa Yelobowamu mwenye jwa Ayisalayeli, Asa jwatandite kwalamulila Ayuda.
10 Jwalakwe jwalamulile ku Yelusalemu kwa yaka 41. Lina lya angangagwe lyaliji Maaka+ chisukulu cha Abisalomu.
11 Asa ŵatesile yindu yakuŵajilwa pameso pa Yehofa+ mpela muŵatendele Daudi, nangolo jwakwe.
12 Jwalakwe ŵatyosisye m’chilambomo achalume ŵaŵatendaga uhule m’malo gawo gakulambilila milungu jaunami.+ Ŵatyosisyesoni milungu jakunyalaya* josope jele achinangolo ŵakwe ŵapanganyisye.+
13 Jwalakwe ŵayikene pakwatyosya angangagwe ŵakongwe lina lyawo a Maaka+ paudindo wawo wakuŵa mama ŵawo mwenye. Jwalakwe ŵatesile yeleyi ligongo lyakuti anganga ŵakweŵa ŵasepile mlungu jwakunyalaya juŵamkamulichisyaga masengo pakulambila njalamila japadela.* Asa ŵamgwisisye mlungu jwakunyalayajo+ ni ŵajile kukumjocha ku Chitiŵi cha Kidiloni.+
14 Nambo nganatyosya malo gakwela.+ Atamose kuti yaliji myoyo, Asa ŵamtumichile Yehofa ni mtima wakwe wosope* soni kwa umi wakwe wosope.*
15 Jwalakwe ŵayiche nayo ku nyumba ja Yehofa yindu yaŵayiswejesye jwalakwejo soni babagwe. Yinduyi yaliji silifa, golide, soni yiwiya* yine yakulekanganalekangana.+
16 Asa ni Basa+ mwenye jwa Ayisalayeli ŵatamilaga kumenyana ngondo.
17 Myoyo Mwenye Basa ŵa ku Isalayeli ŵapite kukwajimuchila ŵandu ŵa ku Yuda. Jwalakwe ŵatandite kutaŵa* msinda wa Lama+ ni chakulinga chakuti pakapagwa jwalijose jwakukopoka kapena kwinjila mu dela ja Asa mwenye jwa ku Yuda.+
18 Pelepo Asa ŵajigele silifa josope soni golide juŵasigele m’yipinda yakusunjila chipanje cha m’nyumba ja Yehofa soni m’yipinda yakusunjila chipanje cha ku nyumba ja mwenye ni kuyipeleka kwa ŵakutumichila ŵakwe. Kaneko Mwenye Asa ŵatumile jemanjaji kwa Beni-hadadi mwenye jwa ku Siliya+ juŵatamaga ku Damasiko. Beni-hadadi ŵaliji mwanache jwa Tabilimoni, soni Tabilimoni ŵaliji mwanache jwa Hesiyoni. Asa ŵatumile ŵakutumichila ŵakweŵa kuti akamsalile Beni-hadadi kuti,
19 “Pasikati pa une ni mmwejo soni pasikati pa baba ŵangu ni baba ŵenu pana mkamulano. Une namtumichisye mmwejo silifa ni golide kuti yiŵe mtuka. Sambano myiche kuti mmasye mkamulano wamwatesile ni Mwenye Basa jwa ku Isalayeli. Mtende yeleyi ni chakulinga chakuti jwalakwejo aleche kulimbana ni une.”
20 Myoyo Beni-hadadi ŵapikanile yaŵaŵechete Mwenye Asa, mwamti ŵatumisye ŵakulongolela ŵa magulu ga asilikali kuti akajijimuchile misinda ja ku Isalayeli. Asilikaliwo ŵawugomeche msinda wa Iyoni,+ Dani,+ Abele-beti-maaka, dela josope ja Kineleti, soni madela gosope ga ku Nafitali.
21 Basa paŵapikene yeleyi, ndaŵi jijojo ŵalesile kutaŵa* msinda wa Lama ula, mwamti ŵapitilisye kutama ku Tilisa.+
22 Kaneko Mwenye Asa ŵasongangenye ŵandu wosope ŵa ku Yuda, mwamti pangali juŵasigele. Jemanjaji ŵajigele maganga gosope soni matabwa gaŵagakamulichisyaga masengo Basa pakutaŵa msinda wa Lama. Mwenye Asa ŵakamulichisye masengo yinduyi pakutaŵa* msinda wa Geba+ ku Benjamini soni msinda wa Misipa.+
23 Mbili josope ja umi wa Asa, machili gakwe gosope soni yosope yaŵatesile nambosoni misinda josope jaŵataŵile* yalembedwe m’buku ja mbili ja mundaŵi ja mamwenye ga ku Yuda. Nambo jwalakwe ali akalambele jwalwasile ulwele ku sajo* syakwe.+
24 Pambesi pakwe, Asa ŵawile mpela mwayaŵelele ni achinangolo ŵakwe, soni ŵamsichile m’malembe ga jemanjaji mu Msinda wa Daudi, nangolo jwakwe. Kaneko mwanache jwakwe lina lyakwe Yehosafati+ ŵaŵele mwenye mmalo mwa jwalakwejo.
25 Nadabu+ mwanache jwa Yelobowamu jwaŵele mwenye jwa Ayisalayeli mu chaka chaŵili cha ulamusi wa Mwenye Asa jwa Ayuda, soni jwalakwe jwalamulile Ayisalayeli kwa yaka yiŵili.
26 Jwalakwe jwapitilisye kutenda yindu yakusakala pameso pa Yehofa, soni jwakuyiye yaŵatendaga babagwe.+ Nambosoni jwatesile yakulemwa yakulandana ni yaŵatesile babagwe ŵaŵatendekasisye Ayisalayeli kulemwa.+
27 Basa mwanache jwa Ahiya jwa m’nyumba ja Isakala ŵamlinganyile chiwembu Nadabu, soni Basajo ŵamwuleje jwalakwe ku Gibitoni+ uwaliji msinda wa Afilisiti. Pandaŵiji Nadabujo yimpepe ni Ayisalayeli wosope ŵaliji ali asyungulile msinda wa Gibitoni.
28 Myoyo Basa ŵamwuleje Nadabu m’chaka chatatu cha ulamusi wa Mwenye Asa jwa ku Yuda, mwamti jwalakwe ŵaŵele mwenye mmalo mwa Nadabujo.
29 Jwalakwe paŵagambile kuŵa mwenye jwawuleje ŵandu wosope ŵa m’liŵasa lya Yelobowamu. Pangali atamose mundu jumo jwa m’liŵasa lya Yelobowamu juŵamlesile ni umi. Jwalakwe ŵajonasile jemanjaji mwakamulana ni maloŵe ga Yehofa gele ŵawechete kupitila mwa jwakutumichila jwakwe Ahiya jwa ku Silo.+
30 Yeleyi yaliji myoyo ligongo lya yakulemwa yaŵatesile Yelobowamu juŵatendekasisyesoni Ayisalayeli kulemwa, soni ligongo lyakuti jwalakwe ŵamtumbilikasisye mnope Yehofa Mlungu jwa Isalayeli.
31 Mbili josope ja umi wa Nadabu soni yosope yaŵatesile yalembedwe m’buku ja mbili ja mundaŵi ja mamwenye ga ku Isalayeli.
32 Asa ni Basa mwenye jwa Ayisalayeli ŵatamilaga kumenyana ngondo.+
33 Mu chaka chatatu cha ulamusi wa Mwenye Asa jwa ku Yuda, Basa mwanache jwa Ahiya jwaŵele mwenye ku Tilisa ni kwalamulilaga Ayisalayeli wosope. Jwalakwe jwalamulile kwa yaka 24.+
34 Nambo jwalakwe jwapitilisye kutenda yindu yakusakala pameso pa Yehofa,+ soni jwakuyiye yaŵatendaga Yelobowamu nambosoni jwatesile yakulemwa yaŵatendekasisye Ayisalayeli kulemwa.+
Maloŵe Gamwiŵanda
^ Maloŵe ga Chihebeli ga pelepa mpaka galandane ni maloŵe gakuti “ndoŵe.” Maloŵega ŵagakamulichisyaga masengo pakulosya kuti chinducho chili chakunyalaya mnope.
^ Alole mbali jakuti, Kugopolela kwa Maloŵe.
^ Kapena kuti “ŵalipeleche kwa Yehofa kwa umi wakwe wosope.”
^ Mu Chihebeli ŵatiga, “kwa masiku gakwe gosope.”
^ Ŵane akusati “yisuso.”
^ Kapena kuti “kuwulimbisya; kutaŵasoni.”
^ Kapena kuti “kuwulimbisya; kutaŵasoni.”
^ Kapena kuti “pakuwulimbisya; pakutaŵasoni.”
^ Ŵane akusati “kumakawu.”
^ Kapena kuti “jaŵajilimbisye; jaŵajitaŵilesoni.”
