Ayimwene Jandanda 14:1-31
14 Pandaŵijo Abiya mwanache jwa Yelobowamu jwalwasile.
2 Myoyo Yelobowamu ŵasalile ŵamkwakwe kuti, “Mnyakuche, ni mlichenje kuti ŵandu akamanyilila yakuti mli ŵamkwakwe Yelobowamu, soni mjawule ku Silo. Jwakulochesya Ahiya ali kweleko. Jwalakwe ni juŵaŵechete yakwamba une kuti chinjiŵa mwenye jwa ŵanduŵa.+
3 Pamkwawulapo mjigale mitanda 10 ja mkate,* makeke soni libotolo lya uchi ni mkasimane ni jwalakwejo. Jwalakwejo ni juchakamsalile mmwejo yachiyimtendechele mnyamataju.”
4 Ŵamkwakwe Yelobowamu ŵatesile yaŵatumidweyo. Jwalakwe ŵanyakwiche ni kwawula ku Silo+ mwamti ŵayiche ku nyumba ja Ahiya. Pandaŵiji Ahiya nganalolaga ligongo ŵaliji ali akalambele.
5 Nambo Yehofa ŵamsalile Ahiya kuti, “Akwika ŵamkwawo Yelobowamu kwa mmwejo kuti amwusye yakwamba mwanache jwawo ligongo mwanachejo akulwala. Myoyo une chinamsalile mmwejo yakuti mumjanje jwalakwe.* Jwalakwe pachayiche, chalisise kuti mkammanyilila.”
6 Ahiya paŵagambile kupikana masegwe ga kwenda kwa jwamkongwejo pandaŵi jiŵayikaga pa mlango, Ahiyajo ŵaŵechete kuti, “Jinjilani ŵamkwakwe Yelobowamu. Ligongo chichi mkulisisa kuti ŵandu akammanyilila? Unetu mbochele utenga wakupweteka wakuti namsalile mmwejo.
7 Mjawule mkamsalile Yelobowamu kuti, ‘Yehofa Mlungu jwa Isalayeli aŵechete kuti, “Une namkwesisye mmwejo pasikati pa ŵandu ŵenu ni kumtenda kuti mŵe jwakulongolela jwa ŵandu ŵangu Ayisalayeli.+
8 Kaneko une nasumwile mbali jekulungwa ja umwenye wa m’nyumba ja Daudi ni kuwupeleka kwa mmwejo.+ Nambo mmwejo nganimsaka kuŵa mpela jwakutumichila jwangu Daudi. Pakuŵa jwalakwejo ŵasunjile malamusi gangu soni jwalakwe ŵanguyaga une ni mtima wakwe wosope. Nambosoni jwalakwe ŵatesile yindu yambonepe pameso pangu.+
9 Nambo mmwejo mtesile yakusakala mnope kupunda wosope ŵaŵapali mmwejo mkanimŵe kuŵa mwenye. Nambosoni mmwejo mlipanganyichisye mlungu jwine soni yiwanichisyo yachisyano ni chakulinga chakuti mundumbilikasye une.+ Nambosoni mmwejo mgalawiche ni kundeka une.+
10 Pa ligongo lyeleli une chiyikasye yakogoya pa nyumba ja Yelobowamu, soni chinamwulaje jwamlume jwalijose jwa m’liŵasa lya Yelobowamu, atamose jwalijose jwanganaŵa akombwele kulichenjela soni jwalijose jwanganakola machili. Une chinjijipyajila nyumba ja Yelobowamu+ mpela yakusati mundu pakupyajila ndoŵe mpaka syosope sili simasile.
11 Mundu jwalijose jwa m’nyumba ja Yelobowamu juchachiwila mumsinda, mbwa sichilya mtembo wakwe. Soni jwalijose juchachiwila kwitinji, yijuni yamwinani yichilya mtembo wakwe, pakuŵa Yehofa aŵechete yeleyi.”’
12 “Sambano mnyakuche mwujileje kumangwenu. Pachimkagambe kuponda sajo* syenu mumsindamo mwanachejo chakawe.
13 Ayisalayeli wosope chakamlile jwalakwe soni chakamsiche m’malembe, pakuŵa mu liŵasa lyosope lya Yelobowamu jwelejupe ni juchaŵichidwe m’malembe. Yili myoyo ligongo lyakuti m’nyumba josope ja Yelobowamu ali mundu jwelejupe jwele Yehofa Mlungu jwa Isalayeli achiweni chindu chambone mwa jwalakwe.
14 Lichiyika lisiku lyele Yehofa chachisagula mwenye jwakuti jwalamulileje Ayisalayeli. Mwenye jweleju chachajonanga ŵandu wosope ŵa m’nyumba ja Yelobowamu,+ mwamti lisikuli lisigele panandi kwika.
15 Yehofa chachapa chilango* Ayisalayeli mwakwatenganya mpela mwalikusatendela litete palikutenganyika m’mesi. Soni jwalakwe chachatyosya Ayisalayeli pachilambo chambone chelechi chele ŵachipeleche kwa achinangolo ŵawo.+ Nambosoni jwalakwe chachabalalikanganya jemanjaji mpaka lisi line lya Lusulo*+ ligongo jemanjaji ŵapanganyisye njalamila syapadela*+ pakusaka kumtumbilikasya Yehofa.
16 Jwalakwe chachaleka Ayisalayeli ligongo lya yakulemwa yatesile Yelobowamu soni yakulemwa yele Yelobowamujo ŵatendekasisye Ayisalayeli kulemwa.”+
17 Pelepo ŵamkwawo Yelobowamuwo ŵanyakwiche ni kuwujilaga mpaka ŵayiche ku Tilisa. Paŵayiche pa mlango wa nyumba jakwe, mwanachejo jwawile.
18 Myoyo ŵamsichile m’malembe mwanachejo, mwamti Ayisalayeli wosope ŵamlilile jwalakwe mwakamulana ni maloŵe ga Yehofa gaŵaŵechete kupitila mwa jwakutumichila jwakwe Ahiya juŵaliji jwakulochesya.
19 Mbili jine ja umi wa Yelobowamu, yaŵatesile pa kuputa ngondo+ soni yaŵatite pakulamulila yalembedwe mu buku ja mbili ja mundaŵi ja mamwenye ga ku Isalayeli.
20 Ulewu wa ndaŵi jele Yelobowamu ŵalamulile waliji yaka 22. Panyuma pakwe jwalakwe ŵawile mpela mwayaŵelele ni achinangolo ŵakwe.+ Kaneko mwanache jwakwe lina lyakwe Nadabu, jwaŵele mwenye mmalo mwakwe.+
21 Pandaŵiji Lehobowamu mwanache jwa Solomoni jwaliji mwenye jwa Ayuda. Lehobowamujo jwaŵele mwenye ali ni yaka 41, soni ŵalamulile yaka 17 ku Yelusalemu msinda wele Yehofa ŵawusagwile+ pasikati pa mbumba syosope sya Ayisalayeli kuti kuŵe lina lyakwe.+ Mama ŵawo Lehobowamu ŵaliji ŵa mtundu wa Chiamoni+ soni lina lyawo ŵaliji Naama.
22 Ayuda ŵatendaga yindu yakusakala pameso pa Yehofa,+ soni jemanjaji ŵamtumbilikasisye mnope jwalakwe mwakutenda yakulemwa yakupunda yaŵatesile achinangolo ŵawo.+
23 Nombenawo ŵataŵaga malo gakwela, yipilala yapadela, soni njalamila syapadela*+ pa litumbi lililyose lyelewu+ soni pasi pa chitela chilichose chewutalile masamba.+
24 M’chilambomo mwapalisoni achalume ŵaŵatendaga uhule m’malo gawo gakulambilila milungu jaunami.+ Jemanjaji ŵatendaga yindu yosope yakunyalaya yajatendaga mitundu jele Yehofa ŵajitopwesye pameso pa Ayisalayeli.
25 Mu chaka chamsano cha ulamusi wa Mwenye Lehobowamu, Mwenye Sisaki+ jwa ku Iguputo ŵayiche kukulimbana ni Yelusalemu.+
26 Jwalakwe ŵajigele chipanje cha m’nyumba ja Yehofa soni ŵajigele chipanje cha m’nyumba ja mwenye.+ Jwalakwe jwajigele yosope kupwatikapo yakuchijila yosope yagolide yajwapanganyisye Solomoni.+
27 Myoyo Mwenye Lehobowamu ŵapanganyisye yakuchijila yachisyano cha kopa kuti yijinjile mmalo mwa yakuchijila yagolideyi, soni ŵayipeleche mmyala mwa achakulungwakulungwa ŵa alonda ŵaŵalondelaga mlango wakwawula ku nyumba ja mwenye kuti ayiloleleje.
28 Pandaŵi jilijose jele mwenye ayiche ku nyumba ja Yehofa, alondawo ŵanyakulaga yakuchijilayo soni kaneko ŵayiwuchisyaga ku chipinda cha alonda.
29 Mbili jine ja umi wa Lehobowamu soni yosope yajwatesile yalembedwe mu buku ja mbili ja mundaŵi ja mamwenye ga ku Yuda.+
30 Lehobowamu ni Yelobowamu+ ŵatamilaga kumenyana ngondo.
31 Kaneko Lehobowamu jwawile mpela mwayaŵelele ni achinangolo ŵakwe, soni jwalakwe ŵamsichile m’malembe ga achinangolo ŵakwe mu Msinda wa Daudi.+ Mama ŵakwe ŵaliji Muamoni+ soni lina lyawo lyaliji Naama. Kaneko mwanache jwakwe lina lyakwe Abiyamu*+ jwaŵele mwenye mmalo mwa jwalakwe.
Maloŵe Gamwiŵanda
^ Mikate jakala ŵajipanganyaga ni utandi wa tiligu kapena balele.
^ Kapena kuti “kuti mumjanje yamtiyamti.”
^ Ŵane akusati “makawu.”
^ Ŵane akusati “chamuko.”
^ Lwelelu luli lusulo lwa Filate.
^ Alole mbali jakuti, Kugopolela kwa Maloŵe.
^ Alole mbali jakuti, Kugopolela kwa Maloŵe.
^ Ŵamkolangagasoni kuti Abiya.
