Buku Jandanda ja Ayimwene 13:1-34
13 Mundu jwine jwa Mlungu jwatumidwe ni Yehofa kuti atyoche ku Yuda ni kwawula ku Beteli. Ali ayiche kweleko, ŵamsimene Yelobowamu ali ajimi pamalo gakupelechela mbopesi kuti apeleche mbopesi syakoposya lyosi.
2 Kaneko jwalakwe ŵaŵechete maloŵe gakutyochela kwa Yehofa gakutembelela malo gakupelechela mbopesigo, gakuti, “Mmwe malo gakupelechela mbopesi, mmwe malo gakupelechela mbopesi, Yehofa aŵechete kuti, ‘Mwanache jwamlume lina lyakwe Yosiya chachipagwa m’nyumba ja Daudi. Jwalakwe chachajigala ŵakutaga mbopesi ŵa m’malo gakwela, ŵakusapelekaga mbopesi syakoposya lyosi pa mmwejo, ni kwapelekasoni mbopesi pa mmwejo, soni jwalakwe chachigajocha mawupa ga ŵandu pa mmwejo.’”
3 Palisiku lyeleli, mundu jwa Mlungujo jwasasile ya chakusimonjesya chachichitendekwe. Jwalakwe jwatite, “Pakusaka kusimichisya yeleyi, Yehofa aŵechete kuti chatende chakusimonjesya achi: Mlole! Malo gakupelechela mbopesigo chigagaŵanyiche, mwamti liwu* lyalili pamalogo chilimwasikanganye.”
4 Mwenye Yelobowamu paŵagambile kupikana maloŵe ga mundu jwa Mlungu jwakuwonajo ali mkugatembelela malo gakupelechela mbopesi ga ku Beteliko, mwenyewo ŵajongwele mkono wawo kuwutyosya pa malo gakupelechela mbopesigo ni kuŵecheta kuti, “Amkamule jwelejo.” Ndaŵi jijojo, mkono waŵamlanjile nawo munduwo wajumwile, mwamti ŵalepele kuwupindasoni.
5 Kaneko malo gakupelechela mbopesigo gagaŵikangene soni liwu lyalyaliji pamalopo lyamwasikangene, mwakamulana ni chakusimonjesya chele Yehofa ŵasasile kupitila mwa mundu jwa Mlungu jwakuwonajo.
6 Sambano mwenyewo ŵamŵendile mundu jwa Mlungu jwakuwonajo kuti, “Chonde, mumŵende Yehofa Mlungu jwenu kuti asalalile mtima, soni mumbopelele kuti mkono wangu uwujile muwaŵelele.” Pelepo mundu jwa Mlungu jwakuwonajo ŵamŵendile Yehofa kuti ŵasalalile mtima mwenyewo, mwamti mkono wa mwenyewo wawujile mpela muwaŵelele pandanda.
7 Kaneko mwenyewo ŵamsalile mundu jwa Mlungu jwakuwonajo kuti, “Kwende kunyumba kuti mkalye yakulya soni kuti ngampe mtuka.”
8 Nambo mundu jwa Mlungu jwakuwonajo ŵajanjile mwenyewo kuti, “Atamose ali ambele hafu ja chipanje chawo chosope, une nganimba njawile yimpepe ni wawo soni nganimba ndile mkate kapena kumwa mesi akuno.
9 Pakuŵa Yehofa ŵandamwile une kuti, ‘Mkaja kulya mkate kapena kumwa mesi, soni pakuwuja mkaja kupita litala lyamwapitile pakwawula.’”
10 Myoyo jwalakwe ŵanyakwiche ni kupitila litala line, mwamti nganapitila litala lyaŵapitile pakwawula ku Beteli.
11 Sambano papali jwakulochesya jwine jwamkalambale juŵatamaga ku Beteliko. Ŵanache ŵachalume ŵa jwakulochesyaju ŵayiche kunyumba ni kwasalila baba ŵawowo yindu yosope yaŵatesile mundu jwa Mlungu jwakuwona jula ku Beteli palisiku lyelelyo, soni maloŵe gosope gaŵaŵechete jwalakwe kwa mwenye. Ali agambile kumala kwalondechesya baba ŵawowo yeleyi,
12 baba ŵawowo ni ŵawusisye jemanjajo kuti, “Ajinjilile kwapi mundujo?” Myoyo ŵanachewo ŵalanjile baba ŵawowo litala lyaŵajinjilile mundu jwa Mlungu jwakuwona jwakutyochela ku Yudajo.
13 Pelepo jwakulochesyajo ŵasalile ŵanache ŵakwewo kuti, “Ambichile chakutamila pa bulupo.” Jemanjajo ŵaŵichile chakutamila baba ŵawowo pabulupo. Kaneko baba ŵawowo ŵakwesile pabulujo.
14 Jwakulochesyajo ŵamkuyiye mundu jwa Mlungu jwakuwona jula ni ŵamsimene ali atemi pasi pa chitela chekulungwa. Kaneko ŵamwusisye jwalakwejo kuti, “Ana wawojo ali mundu jwa Mlungu jwakuwona jwatyochele ku Yuda?” Mundujo ni ŵajanjile kuti, “Elo ndili une.”
15 Jwakulochesyajo ni ŵamsalile mundujo kuti, “Kwende tulongane kumangwetu kuti mkalye mkate.”
16 Nambo mundujo jwajanjile kuti, “Une nganimba mbujile yimpepe ni wawo kapena kwawula kunyumba jawo soni nganimba ndile mkate kapena kumwa mesi yimpepe ni wawojo akuno.
17 Pakuŵa Yehofa ŵasalile une kuti, ‘Mkaja kulya mkate kapena kumwa mesi kweleko. Nambosoni pakuwuja mkaja kupita litala lyamwapitile pakwawula.’”
18 Pelepo jwakulochesyajo ŵamsalile mundujo kuti, “Unejisoni ndili jwakulochesya mpela wawojo, mwamti lilayika lisalile une maloŵe gakutyochela kwa Yehofa gakuti, ‘Mkamsalile kuti awuje yimpepe ni mmwejo ni kwawula najo kumangwenu ni chakulinga chakuti akalye mkate ni kumwa mesi.’” (Pelepa ŵamlambwisye.)
19 Myoyo mundujo ŵapite yimpepe ni jwakulochesyajo kukulya mkate soni kumwa mesi ku nyumba jakwe.
20 Jemanjaji ali mkulya patebulo, Yehofa ŵaŵechete kupitila mwa jwakulochesya jwamkalambalejo.
21 Myoyo jwakulochesyajo, ŵamsalile mundu jwa Mlungu jwakuwona jwakutyochela ku Yuda jula kuti, “Yehofa aŵechete kuti, ‘Ligongo lyakuti nganimpikanila yaŵamsalile Yehofa, soni nganimtenda yaŵamlamwile Yehofa Mlungu jwenujo,
22 mwamti mwawujile ni kuja kulya mkate soni kumwa mesi ku malo gele ŵamsalile kuti, “Mkaja kulya mkate kapena kumwa mesi,” mtembo wenu ngasiwuŵichidwa m’malembe ga achinangolo ŵenu.’”
23 Mundu jwa Mlungu jwakuwona jula ali amalisisye kulya soni kumwa, jwakulochesya jwamkalambalejo ŵaŵisile chakutamila pa bulu kuti jwakulochesya juŵamsalile kuti awujile jula akwele.
24 Kaneko mundu jula ŵawutandite ulendo. Nambo ali mwitala, jwalakwe ŵasimene ni lisimba ni lyamwuleje, mwamti mtembo wakwe wagonile petala papopo, soni bulu juŵakwesile jula jwagambile kwima pambali pakwe. Nombenalyo lisimbalyo lyagambile kwima pambali pa mtembowo.
25 Ŵandu ŵane paŵapitaga ŵawuweni mtembowu uli petalapo, soni lisimba lila lili lijimi pambali pa mtembowo. Kaneko ŵanduwo ŵayiche mumsinda muŵatamaga jwakulochesya jwamkalambale jula ni kusala ya nganiji.
26 Jwakulochesya jwamkalambale juŵamsalile munduju kuti awujile jula paŵagambile kupikana ya nganiji jwaŵechete kuti, “Ali mundu jwa Mlungu jwakuwona jula jwele nganapikanila yaŵamlamwile Yehofa. Myoyo Yehofajo atendekasisye kuti lisimba limkamule ni kumwulaga. Yeleyi yitendekwe mwakamulana ni maloŵe ga Yehofa gaŵamsalile jwalakwe.”
27 Kaneko jwalakwe ŵasalile ŵanache ŵakwe kuti, “Ambichile chakutamila pa bulu.” Myoyo ŵanacheŵo ŵaŵisile chakutamilacho.
28 Jwakulochesya jwamkalambalejo ŵanyakwiche ni kuwutanda ulendo, mwamti ŵawusimene mtembo ula uli petala palapala, soni bulu ni lisimba lila yaliji yili yijimi pambali pa mtembowo. Lisimbalyo nganililya mtembowo kapena kumkamula bulujo.
29 Jwakulochesyajo jwanyakwile mtembo wa mundu jwa Mlungu jwakuwona jula ni kuwukwesya pa bulupo. Kaneko mtembowo ŵawujile nawo ku msinda wakwe kuti akalile malilo soni kuti akawusiche m’malembe.
30 Myoyo jwalakwe ŵawusichile mtembowo m’malembe gakwe, soni ŵandu ŵaliji mkumlilila mundujo ali mkuŵecheta kuti, “Ngondo amawone, mlongomjangu! Ngondone!”
31 Panyuma pakumŵika m’malembe, jwakulochesyajo ŵasalile ŵanache ŵakwe kuti, “Une pachinjiwapo, chimumbiche m’malembe gatumŵisile mundu jwa Mlungu jwakuwona jula. Mawupa gangu chimgaŵiche chiŵandika ni mawupa gakwe.
32 Maloŵe gaŵaŵechete jwalakwe gakutyochela kwa Yehofa gakutembelela malo gakupelechela mbopesi ga ku Beteli, soni maloŵe gakusitembelela nyumba syosope syakutindiŵalila milungu syasili mmalo gakwela ga m’misinda ja ku Samaliya gachitendekwa nditu.”
33 Atamose kuti yeleyi yatendekwe, Yelobowamu nganaleka kutenda yindu yakusakala. Jwalakwe jwapitilisye kwasagula ŵandu wamba kuti aŵe ŵakutaga mbopesi ŵakuti atumichileje m’malo gakwela. Jwalakwe ŵamŵikaga mundu jwalijose jwamsachile kuti aŵe jwakutaga mbopesi, ni kuŵechetaga kuti, “Amkunde jwelejo kuti aŵe jwakutaga mbopesi jwakutumichila m’malo gakwela.”
34 Ulemwa waŵatesile ŵandu ŵa m’nyumba ja Yelobowamuwu watendekasisye kuti jemanjaji ajonanjidwe ni ngasimanikwasoni pachilambo chapasi.
Maloŵe Gamwiŵanda
^ Kapena kuti “liwu lyamawuta.” Liwu lyeleli lyawanganyichilanaga ni mawuta kutyochela ku nyama syaŵasipelekaga mbopesi.
