Buku Jandanda ja Ayimwene 11:1-43
11 Nambo Mwenye Solomoni ŵatandite kunonyela achakongwe ŵamitundu jine ŵajinji kupwatika pa mwanache jwamkongwe jwa Falawo jula. Jwalakwe ŵanonyele achakongwe ŵa Chimowabu, ŵa Chiamoni, ŵa Chiedomu, ŵa Chisidoni, soni ŵa Chihiti.
2 Achakongweŵa ŵaliji ŵakutyochela ku mitundu jele Yehofa ŵasalile Ayisalayeli ya mitundujo kuti, “Mkaja kuwanganyichilana ni jemanjajo,* soni jemanjajo akaja kuwanganyichilana ni jemanja. Pakuŵa jemanjajo chachimnyenjelela nditu kuti mtande kukuya milungu jawo.” Nambo Solomoni nganasaka kwaleka achakongwewo, mwamti ŵapitilisye kwanonyela.
3 Jwalakwe ŵakwete achakongwe ŵakuchimbichika ŵakwana 700, soni achakongwe ŵane ŵapambali ŵakwana 300. Mwamti mwapanandipanandi achakongweŵa ŵasokonasyaga mtima* wakwe.
4 Solomoni paŵakalambalaga achakongweŵa ŵamtendekasisye jwalakwe kukuya milungu jine. Mwamti nganamtumichilaga* Yehofa Mlungu jwakwe ni mtima wakwe wosope mpela muŵatendele Daudi, babagwe.
5 Solomoni jwatindiŵalilaga mlungu jwamkongwe jwa Asidoni lina lyakwe Asitoleti. Nambosoni mlungu jwakunyalaya jwa Aamoni lina lyakwe Milikomu.
6 Nambosonitu Solomoni ŵatesile yindu yayaliji yakusakala pameso pa Yehofa, soni jwalakwe nganamtumichila Yehofa ni mtima ŵakwe wosope mpela muŵatendele Daudi babagwe.
7 Pandaŵiji Solomoni ŵamtaŵile malo gakwela mlungu jwakunyalaya jwa Amowabu lina lyakwe Kemosi. Ŵataŵilesoni malo gane gakwela ga mlungu jwakunyalaya jwa Aamoni lina lyakwe Moleki. Maloga ŵagataŵile petumbi kusogolo kwa msinda wa Yelusalemu.
8 Yeleyi ni yaŵatendele achiŵamkwakwe wosope ŵa mitundu jine ŵele ŵapelekaga mbopesi syakukoposya lyosi kwa milungu jawo.
9 Yehofa ŵamtumbilile mnope Solomoni ligongo lyakuti jwalakwe ŵalesile kumkuya* Yehofa Mlungu jwa Ayisalayeli, jwele ŵawonechele kwa jwalakwe kaŵili kose
10 kukumkalamusya pakwamba ya ngani jeleji kuti akakuya milungu jine. Nambo jwalakwe nganapikanila yaŵamlamwile Yehofayi.
11 Sambano Yehofa ŵamsalile Solomoni kuti, “Ligongo lyakuti mtesile yeleyi soni ligongo lyakuti nganimsunga chilanga changu soni kupikanila yosope yanamlamwile, nditu une chinjiwusumula umwenyewu mmyala mwenu ni kuwupeleka kwa jumo jwa ŵakutumichila ŵenu.
12 Nambope ligongo lya Daudi baba ŵenu une ngandenda yeleyi mmwejo pamli chiŵela umi. Chinjisumula umwenyewu pawuchiŵa mmyala mwa mwanache jwenu.
13 Nambo une ngasisumula umwenye wosope. Mbumba* jimo chinjijipeleka kwa mwanache jwenu. Chinjitenda yeleyo ligongo lya Daudi jwakutumichila jwangu soni ligongo lya Yelusalemu msinda wanawusagwile.”
14 Kaneko Yehofa ŵatesile yakuti paŵe mundu jwakulimbana ni Solomoni. Mundujo ŵaliji Hadadi jwa ku Edomu, soni jwatyochelaga m’liŵasa lya umwenye lya ku Edomuko.
15 Daudi paŵagomeche Aedomu, Yowabu juŵaliji mlongola jwa gulu ja asilikali ŵapite kuja kusilila mitembo ja ŵandu ŵaŵawulajidwe. Kaneko jwalakwe ŵatandite kumwulaga jwamlume jwalijose jwa ku Edomu.
16 (Yowabu pampepe ni Ayisalayeli wosope ŵatemi kweleko kwa myesi 6 mpaka pele jwalakwe ŵamalisisye kwawulaga achalume wosope ŵa ku Edomu.)
17 Nambo Hadadi ŵatisile pampepe ni ŵakutumichila ŵa Chiedomu ŵaŵaliji ŵa babagwe. Jemanjaji ŵatilile ku Iguputo. Pandaŵiji Hadadi ŵaliji ali kamnyamata.
18 Myoyo jemanjajo ŵatyosile ku Midiyani ni kwawula ku Palana. Ku Palanako ŵajigele ŵandu ŵane ni kwawula nawo ku Iguputo kwa Falawo mwenye jwa ku Iguputoko. Mwenyewo ŵampele jwalakwe nyumba soni ŵalamwile kuti jwalakwe apocheleje yakulya, nambosoni ŵampele malo.
19 Falawo ŵamnonyele mnope Hadadi, mwamti jwalakwe ŵampele Hadadijo mpwawo jwa ŵamkwakwe kuti amlombe. Ŵamkwawo ŵa Falawowo lina lyawo lyaliji Tapenesi.
20 Pali papite ndaŵi apwawo ŵa Tapenesi ŵala ŵaŵeleche mwanache jwamlume lina lyakwe Genubati. Mwamti Tapenesi ŵamjigele mwanachejo ni kumlelaga* ku nyumba ja Falawo. Genubati ŵatamaga m’nyumba ja Falawo pampepe ni ŵanache ŵa Falawojo.
21 Hadadi ŵapikene ali ku Iguputo kuti Daudi amsichile m’malembe mpela muyaŵelele ni achingolo ŵakwe, soni kuti Yowabu jwamkulungwa jwa asilikali jula awile. Myoyo Hadadi ŵamsalile Falawo kuti, “Chonde angunde kuti njawuleje ku chilambo cha kumangwetu.”
22 Nambo Falawo ŵamwusisye jwalakwejo kuti, “Mmwejo mkusoŵa chichi, kuti mpaka msacheje kuwujila ku chilambo cha kumangwenu?” Pelepo jwalakwe ni ŵajanjile kuti, “Pangali changusoŵa, nambo chonde angunde kuti njawuleje.”
23 Mlungu jwatesilesoni yakuti paŵe mundu jwine jwakulimbana ni Solomoni. Munduju lina lyakwe lyaliji Lesoni mwanache jwa Eliyada, juŵatisile kwa ambuje ŵakwe Hadadesa mwenye jwa ku Soba.
24 Daudi paŵagomeche ŵandu ŵa ku Soba, Lesoni ŵasongangenye ŵandu, soni jwalakwe ŵaŵele mlongola jwa gulu ja ŵachiswamba. Myoyo jemanjajo ŵapite ku Damasiko soni ŵatamilichiche kweleko ni kutanda kulamulila ku Damasikoko.
25 Lesoni ŵaŵele ali mkulimbana ni Ayisalayeli kwa masiku gosope gele Solomoni ŵaliji mkulamulila, konjechesya pa yakusawusya yaŵayikasisye Hadadi. Nambosoni jwalakwe ŵaŵengaga mnope Ayisalayeli mundaŵi jele jwalakwejo ŵalamulilaga ku Siliya.
26 Ni papalisoni Yelobowamu mwanache jwa Nebati jwa mu mbumba* ja Efulayimu. Jwalakwe ŵaliji jwakutyoche ku Seleda soni ŵaliji jwakutumichila jwa Solomoni. Mamagwe ŵaliji jwamkongwe jwamasije lina lyawo Seluwa. Nombenajo ŵatandite kumjimuchila Mwenye Solomoni.
27 Jwalakweju ŵamjimuchile Mwenye Solomoni ligongo lyakuti Solomonijo ŵataŵile Liwunjili,* soni ligongo lyakuti jwalakwe ŵataŵile mbali jajaliji jangawugala ja lutenje lwa msinda wa Daudi, babagwe.
28 Yelobowamu jweleju ŵaliji mundu jwalunda soni jwamachili. Myoyo Solomoni paŵayiweni kuti mnyamataju ŵaliji jwakulimbichila masengo, jwalakwe ŵamŵisile kuti aŵe jwakwalolela ŵandu ŵaŵakamulaga masengo gakwakanganichisya panyumba* ja Yosefe.
29 Pandaŵijo Yelobowamu ŵakopweche mu Yelusalemu, soni jwakulochesya Ahiya jwa ku Silo ŵamsimene jwalakwe petala. Ahiya ŵaliji ali awete chakuwala chanyuwani, soni jemanjajo ŵaliji ŵaŵilipe mumgunda.
30 Ahiya ŵakamwile chakuwala chanyuwani chaŵawetecho ni kuchipapulanya mapisi gakwana 12.
31 Kaneko Ahiya ŵamsalile Yelobowamu kuti, “Mjigale mapisi gakwana 10 aga, pakuŵa Yehofa Mlungu jwa Ayisalayeli aŵechete kuti, ‘Une nguwupapula umwenyewu ni kuwutyosya mmyala mwa Solomoni. Mwamti une chinjimpa mmwejo mbumba syakwana 10 sya Isalayeli.
32 Nambo jwalakwe chachisigala ni mbumba jimo ligongo lya jwakutumichila jwangu Daudi soni ligongo lya Yelusalemu msinda wele une nawusagwile pasikati pa mbumba syosope sya Isalayeli.
33 Chindende yeleyi ligongo lyakuti jemanjaji andesile une ni kutanda kumtindiŵalila Asitoleti mlungu jwamkongwe jwa Asidoni. Jemanjaji akumtindiŵalilasoni Kemosi mlungu jwa Amowabu, soni Milikomu mlungu jwa Aamoni. Mwamti jemanjaji ngakwenda m’matala gangu mwakutenda yindu yayili yakuŵajilwa pameso pangu, soni ngakukuya yosope yangusasalila kapena kupikanila malamusi gangu mpela muŵatendele Daudi babagwe Solomoni.
34 Nambo une ngasindyosya umwenye wosopewo mmyala mwakwe. Nambo chinjimtendape jwalakwe kuŵa mlongola kwamasiku gosope ga umi wakwe. Chinjitenda yeleyi ligongo lya jwakutumichila jwangu Daudi jwele namsagwile, pakuŵa jwalakwe ŵapikanile malamusi gangu soni ŵakuyisye yosope yanamsalile.
35 Une chinjiwutyosya umwenye mmyala mwa mwanache jwakwe ni kuwupeleka kwa mmwejo. Umwenyewo uchiŵa wa mbumba 10 sya Isalayeli.
36 Une chinjipeleka mbumba jimo kwa mwanache jwakwe ni chakulinga chakuti jwakutumichila jwangu Daudi apitilisye kuŵa ni nyali pameso pangu mu Yelusalemu, pakuŵa msinda welewu nawusagwile kuti uŵe wangu ni chakulinga chakuti mbiche mwelemo lina lyangu.
37 Une chinjimjigala mmwejo, soni mmwejo chimchilamulila yindu yosope yamkusaka. Nambosoni chimchiŵa mwenye ni kwalamulilaga Ayisalayeli.
38 Chinjiŵa ni mmwejo naga mkutenda yosope yangumlamula, kwenda m’matala gangu, soni kutenda yayili yakuŵajilwa pameso pangu. Une chinjiŵa ni mmwejo naga mkutenda yeleyi mwakupikanila malamusi gangu mpela muŵatendele jwakutumichila jwangu Daudi. Nambosoni ŵanache ŵenu chachilamulila kwandaŵi jelewu mpela mwayiŵelele ni ŵanache ŵa Daudi, soni une chinjitenda yakuti mmwejo mwalamulile Ayisalayeli.
39 Une chinjatesya sooni ŵanache ŵa Daudi ligongo lya yeleyi. Nambo ngasinatesya soonisyo ndaŵi syosope.’”
40 Myoyo Solomoni ŵasakaga kumwulaga Yelobowamu, nambo Yelobowamujo ŵatilile ku Iguputo kwa Sisaki mwenye jwa ku Iguputoko. Mwamti ŵatemi ku Iguputoko mpaka pandaŵi jele Solomoni ŵawile.
41 Mbili josope ja Solomoni pampepe ni yosope yaŵatesile jwalakwe soni lunda lwakwe yalembedwe m’buku jakusala ya mbili ja Solomoni.
42 Ulewu wa ndaŵi jele Solomoni ŵalamulile Ayisalayeli wosope ku Yelusalemu waliji yaka 40.
43 Kaneko Solomoni ŵawile mpela mwayaŵelele ni achinangolo ŵakwe soni jwalakwe ŵamsichile mu msinda wa Daudi babagwe. Panyuma pakwe Lehobowamu juŵaliji mwanache jwakwe jwaŵele mwenye mmalo mwa jwalakwejo.
Maloŵe Gamwiŵanda
^ Kapena kuti “mkaja kulombana ni jemanjajo.”
^ Kapena kuti “achakongwewo ŵakwete machili gakumsokonasya mnope jwalakwe.”
^ Kapena kuti “nganalipelekaga kwa.”
^ Kapena kuti “mtima wakwe watyosile kwa Yehofa.”
^ Alole Kugopolela kwa Maloŵe Gane.
^ Kagopolele kanesoni, “ŵamlekasisye konga.”
^ Alole Kugopolela kwa Maloŵe Gane.
^ Mu Chihebeli akusati, “mil·lohʼ′.” Maloŵe gelega gakusagopolela kuti “kugumbasya.”
^ Pelepa akwamba ŵandu ŵa mu mbumba ja Yosefe.
