Buku Jandanda ja Ayimwene 10:1-29
10 Sambano mwenye jwamkongwe jwa ku Seba jwapikene yakwamba kupikanika kwa Solomoni soni kuti kupikanika kwakweko kwayiche ligongo lya lina lya Yehofa. Myoyo jwalakwe ŵayiche kuti amlinje Solomoni mwakumwusya yiwusyo yakusawusya.
2 Jwalakwe ŵakopochele ku Yelusalemu ni gulu jekulungwa ja ŵamasengo. Ŵayichesoni ni ngamila sili sinyakwile mawuta ga basamu, golide jwamjinji mnope soni maganga ga mtengo wapenani. Jwalakwe ŵayiche kwa Solomoni ni kuŵechetana najo yosope yayaliji mumtima mwakwe.
3 Solomoni ŵamjanjile jwalakwejo yiwusyo yakwe yosope, mwamti pangali chachasawisye mwenyewo* kulondesya.
4 Mwenye jwamkongwe jwa ku Sebajo paŵaluweni lunda losope lwa Solomoni, kupwatikapo nyumba jaŵataŵile,
5 yakulya ya patebulo jakwe, yaŵatiga pakutama ŵakutumichila ŵakwe pandaŵi jakulya, yaŵatendaga ŵakupelechela yakulya patebulo soni kawale kawo, yaŵatendaga ŵakupelechela yakumwa, soni mbopesi syakutinisya syaŵasipelekaga ndaŵi syosope pa nyumba ja Yehofa, jwalakwe ŵasoŵile chakuŵecheta.
6 Myoyo jwalakwe ŵasalile mwenyewo kuti, “Yosope yanapikene ndili m’chilambo chakumangwetu yakwamba yindu yakombwele kutenda soni pakwamba ya lunda lwawo yili yakuwona.
7 Nambotu une nganingulupililaga yanapikeneyo mpaka pambichepa ni kulilolela jika ni meso gangu. Apano nayiweni kuti yanapikeneyo yaliji yamnono mnope. Wawojotu akwete lunda ngaŵa masanje soni uchimbichimbi wawo uli wekulungwa kulekangana ni yanapikene.
8 Ŵana upile ŵandu ŵawo, soni ŵana upile ŵakutumichila ŵawo ŵakusajima pameso pawo ndaŵi syosope ni kupikanilaga lunda lwawo.
9 Achimbichikwe Yehofa Mlungu jwawo jwele ŵanonyele wawojo ni kwaŵika pampando waumwenye wa Isalayeli. Ligongo lyakuti Yehofa akwete chinonyelo chakulupichika pa Ayisalayeli, jwalakwe ŵasagwile wawojo kuti aŵe mwenye ni chakulinga chakuti ŵalamulileje ŵanduŵa chenene ni kutendaga yindu yachilungamo.”
10 Kaneko mwenye jwamkongwejo ŵampele Mwenye Solomoni golide jwakwana matalenti* 120, mawuta gejinji ga basamu soni maganga ga mtengo wapenani. Mwenye jwamkongwe jwa ku Sebajo ŵampele Mwenye Solomoni mawuta gejinji, mwamti kwangali ndaŵi jine pele kwayichesoni mawuta gejinji mpela gelega.
11 Yombo ya Hilamu yayanyakulaga golide kutyochela ku Ofili yayikagasoni ni matabwa gejinji ga chitela cha aligamu kutyochela ku Ofiliko. Nambosoni yayikaga ni maganga ga mtengo wapenani mnope.
12 Pakamulichisya masengo matabwa ga aligamuga mwenyewo ŵapanganyisye njalamila sya nyumba ja Yehofa, soni njalamila sya nyumba ja mwenye. Ŵapanganyisyesoni yakwimbila yangonji, soni yakwimbila yangonji yamtundu wine ya ŵandu ŵakwimba. Kutandila pandaŵi jelejo mpaka lelojino matabwa ga chitela cha aligamu mpela gelega nganigayichejepo kapena kuwoneka.
13 Mwenye Solomoni ŵampele Mwenye jwamkongwe jwa ku Seba chindu chilichose chiŵachikumbisile soni chilichose chiŵaŵendile. Mwenyewo ŵampele yeleyi kupwatika pa yindu yaŵampele kala mwenye jwamkongwejo mwakusaka kwawo. Panyuma pakwe mwenye jwamkongwejo jwawujile ku chilambo chakumangwakwe pampepe ni ŵakutumichila ŵakwe.
14 Winji wa golide juŵayikaga kwa Solomoni pachaka chilichose jwaŵaga jwakusitopa matalenti gakwana 666 ga golide.
15 Ngaŵalanjila golide juŵapelekaga ŵamalonda ŵakwendajenda, juŵapataga kutyochela kwa ŵamalonda ŵane, kwa mamwenye gosope ga ku Alabiya soni juŵapelekaga nduna sya m’chilambocho.
16 Mwenye Solomoni ŵapanganyisye yakuchijila yekulungwakulungwa yagolide jwam’wanganye ni yisyano yine. Yakuchijilayi yapali 200. (Chakuchijila chilichose ŵachipanganyisye ni golide jwakwana masekeli* 600.)
17 Ŵapanganyisyesoni yakuchijila yamwanamwana* yakwana 300 yagolide jwam’wanganye ni yisyano yine. (Chakuchijila chamwana chilichose ŵachipanganyisye ni golide jwakwana mamina* gatatu.) Kaneko mwenyewo ŵayiŵisile yakuchijilayi mu Nyumba ja Ngalango ja Lebanoni.
18 Mwenyewo ŵapanganyisyesoni mpando wekulungwa waumwenye. Ŵapanganyisye mpandowu pakamulichisya masengo misengo ja ndembo, soni ŵawupakesye golide jwambone mnope.
19 Papali masitepe 6 gakwelela ku mpandowu, soni penani pampandowo papali kamsakasa kesyungulile. Mbali syosope syampandowo syakwete mwakusajika makono. Nambosoni mumbali mwa yakusajichila makonoyo ŵajimichemo masimba gaŵili, line mbali jine linesoni mbali jineji.
20 Papalisoni yiwanichisyo ya masimba yakwana 12 yaŵayijimiche pa masitepe 6 gala. Pasitepe jilijose paŵaga masimba gaŵili, line mbali jine line mbali jineji. Pangali umwenye wine uliwose wawakwete mpando mpela welewu.
21 Migawo josope jaŵamwelaga Mwenye Solomoni jaliji jagolide, soni yiwiya yosope ya ku Nyumba ja Ngalango ja Lebanoni yaliji yagolide jwambone mnope. Pangali chilichose chaŵapanganyisye ni silifa pakuŵa m’masiku ga Solomoni silifa jwawonekaga kuŵa jwangali mate.
22 Yaliji myoyo ligongo lyakuti mwenyewo ŵakwete yombo ya ku Talisi yayajendaga panyasa pampepe ni yombo ya Hilamu. Kamo pa yaka yitatu yiliyose yombo ya ku Talisiyi yayikaga yili yinyakwile golide, silifa, misengo ja ndembo, majani, soni yijuni yakolanjidwa kuti pikoko.
23 Mwenye Solomoni ŵakwete chipanje chejinji soni lunda kupunda mamwenye gane gosope ga pachilambo chapasi.
24 Mwamti ŵandu wosope ŵapachilambo chapasi ŵasosagasosaga upile wakusimana ni Solomoni kuti apikane lunda lwakwe lwele Mlungu ŵaŵisile mumtima mwakwe.
25 Ŵanduŵa paŵayikaga ŵajigalaga mituka mpela: yindu yasilifa, yindu yagolide, yakuwala, yida yangondo, mawuta ga basamu, mahachi, soni abulu. Jemanjaji ŵatendaga yeleyi chaka chilichose.
26 Solomoni ŵapitilisye kupata magaleta* soni mahachi* gejinji. Jwalakwe ŵakwete magaleta gakwana 1,400 soni mahachi* gakwana 12,000. Jwalakwe ŵayisunjile yeleyi ku misinda jakusunjila magaleta jajaliji chiŵandika ni mwenyewo ku Yelusalemu.
27 Mwenyewo ŵatendekasisye kuti ku Yelusalemu kusimanikweje silifa jwamjinji mpela maganga, soni ŵatendekasisye kuti matabwa ga mkungusa gaŵe gejinji mpela yitela ya mkuju ya ku Sefela.
28 Mahachi ga Solomoni ŵagaŵilasyaga kutyochela ku Iguputo. Gulu ja ŵamalonda ŵakwendajenda ŵa mwenyewo jasumaga mahachigo m’magulu* pa mtengo waŵawutamilikasisye.
29 Ligaleta lililyose lyasumile kutyochela ku Iguputo ŵalisumaga pa mtengo wa mbiya syasilifa syakwana 600, soni hachi ŵajisumaga pa mtengo wa mbiya syasilifa syakwana 150. Kaneko jemanjajo ŵayisumisyaga yeleyi kwa mamwenye gosope ga Ahiti soni kwa mamwenye ga Asiliya.
Maloŵe Gamwiŵanda
^ Mu Chihebeli ŵatiga, “pangali chachaliji chakusisika kwa mwenyewo.”
^ Talente jimo jaŵaga jakusitopa makilogalamu 34.2 Alole Yakumbesi B14.
^ Sekeli jimo jaŵaga jakusitopa magalamu 11.4. Alole Yakumbesi B14.
^ Ndaŵi syejinji ŵakunyakula mipamba ni ŵaŵanyakulaga yakuchijila yeleyi.
^ Mina jakujikolanga mu Malemba ga Chihebeli jaŵaga jakusitopa magalamu 570. Alole Yakumbesi B14.
^ Magaleta gali ngolo syakuwutidwa ni mahachi.
^ Kapena kuti “ŵakwela pa mahachi.”
^ Kapena kuti “ŵakwela pa mahachi.”
^ Kagopolele kanesoni, “kutyochela ku Iguputo soni ku Kuwe. Ŵamalonda ŵa mwenyewo ŵayisumaga yeleyi kutyochela ku Kuwe.” Komboleka pelepa akwamba ku Kilikiya.
