Buku Jandanda ja Ayimwene 1:1-53
1 Sambano Mwenye Daudi ŵakalambele soni ŵakwete yaka yejinji. Nambosoni atamose kuti mwenyewo ŵawunichilaga ni yakuliwunichila yejinji, nambope nganapikanaga kutukutila.
2 Myoyo ŵakutumichila ŵa mwenyewo ŵasalile Mwenye Daudiwo kuti, “Chonde atukunde kuti twasosele wawojo ambuje ŵetu mwenye jwamkongwe jwachisikana jwele nganagonejepo ni jwamlume, ni chakulinga chakuti ŵaloleleje wawojo mwenye ni kwasamalila. Jwalakwe chagoneje yimpepe ni wawojo* ni chakulinga chakuti wawojo ambuje ŵetu mwenye apikaneje kutukutila.”
3 Jemanjaji ŵawungunyisye mu Isalayeli mosope kuti apate jwamkongwe jwakusalala. Kaneko ŵampatile Abisagi jwa ku Sunemu, ni ŵayiche najo kwa mwenyewo.
4 Jwamkongweju jwaliji jwakusalala ngaŵa masanje, mwamti jwaŵele jwakwasamalila mwenyewo ni kwalolelaga. Nambo mwenyewo nganagona najo jwamkongwejo.
5 Pandaŵiji Adoniya mwanache jwa Hagiti jwaliji mkulikwesya ni kuŵechetaga kuti, “Unetu chimbe mwenye.” Jwalakwe jwalipanganyichisye ligaleta* soni ŵakwete achalume ŵakwela pa mahachi nambosoni achalume ŵane ŵakwana 50 ŵaŵawutukaga pasogolo pakwe.
6 Nambo babagwe ŵaliji mkanamjamuchejepo jwalakwejo mwakumwusya kuti, “Ligongo chichi mtesile yeleyi?” Jwalakweju jwalijisoni jwakusalala mnope. Nambosoni mamagwe ŵamŵeleche panyuma pa Abisalomu.
7 Jwalakwe ŵakamulene ni Yowabu mwanache jwa Seluya soni Abiyatala juŵaliji jwakutaga mbopesi, mwamti jemanjaji ŵamlimbikasyaga Adoniyajo ni kumkamuchisya.
8 Nambo Sadoki juŵaliji jwakutaga mbopesi, Benaya mwanache jwa Yehoyada, Natani juŵaliji jwakulochesya, Simeyi, Leyi, nambosoni achalume ŵamachili ŵakuputa ngondo ŵa Daudi nganaŵa kumbali ja Adoniya.
9 Kaneko Adoniya ŵapeleche mbopesi sya ngondolo, ng’ombe, soni yinyama yine yakwimbala ku liganga lya Soheleti, lyalyaliji chiŵandika ni ku Eni-logeli. Jwalakwe ŵaŵilanjile kweleko achapwakwe wosope ŵaŵalilji ŵanache ŵa mwenye, soni achalume wosope ŵa ku Yuda ŵaŵatumichilaga mwenye.
10 Nambo jwalakwe nganamŵilanjila Natani juŵaliji jwakulochesya, Benaya soni achalume ŵamachili ŵakuputa ngondo, nambosoni Solomoni juŵalijisoni mpwakwe.
11 Kaneko Natani ŵamwusisye Bati-seba ŵaŵaliji mamagwe ŵa Solomoni kuti, “Nambo apikene kuti Adoniya mwanache jwa Hagiti aŵele mwenye, soni kuti ambuje ŵetu Daudi ngakumanyilila ya nganiji?
12 Sambano ayiche akuno kuti une nasalile yakutenda, ni chakulinga chakuti akulupusye umi wawo soni umi wa Solomoni mwanache jwawo.
13 Ajawule kwa Mwenye Daudi ni akasalile kuti, ‘Ana wawo ambuje ŵangu mwenye ngati ŵalumbile kwa une jwakutumichila jwawo paŵasalile kuti, “Mwanache jwenu Solomoni chachiŵa mwenye panyuma pa une soni jwalakwe ni juchachitama pa mpando wangu wa umwenye”? Sano ligongo chichi Adoniya aŵele mwenye?’
14 Wawojo pachakaŵe ali mkuŵechetana ni mwenyewo unejo chingakopochele ni kusimichisya yachakaŵe ali mkuŵechetayo.”
15 Myoyo Bati-seba ŵapite kwa mwenyewo kuchipinda chawo. Mwenyewo ŵaliji ali akalambele mnope, soni Abisagi jwa ku Sunemu jula ŵaliji mkwalolela mwenyewo.
16 Kaneko Bati-seba ŵatindiŵele ni kwinama mpaka ngope jakwe pasi pameso pa mwenyewo. Ni mwenyewo ŵamwusisye jwalakwejo kuti, “Ana mkusaka kuŵenda chichi?”
17 Jwalakwe ni ŵajanjile kuti, “Ambuje ŵangu, wawojo ŵalumbile kwa une jwakutumichila jwawo pameso pa Yehofa Mlungu jwawo kuti, ‘Mwanache jwenu Solomoni chachiŵa mwenye panyuma pa une, soni jwalakwe ni juchachitama pa mpando wangu waumwenye.’
18 Nambo alole Adoniya aŵele mwenye soni wawojo ambuje ŵangu mwenye ngakumanyilila chilichose pakwamba ya nganiji.
19 Jwalakwe apeleche mbopesi sya ng’ombe, yinyama yine yakwimbala soni ngondolo. Apeleche yeleyi yejinji mnope. Jwalakwe ŵaŵilanjile ŵanache wosope ŵachalume ŵa mwenye soni Abiyatala jwali jwakutaga mbopesi, nambosoni Yowabu jwali mlongola jwa gulu ja Asilikali. Nambo jwakutumichila jwawo Solomoni nganamŵilanjila.
20 Ambuje ŵangu mwenye, sambano meso ga Ayisalayeli wosope gali pa wawojo kuti ŵasalile ŵachatame pa mpando wawo waumwenye panyuma pa wawojo ambuje ŵangu mwenye.
21 Ligongo naga ngakutenda yeleyi nikuti pandaŵi jele wawojo ambuje ŵangu mwenye chachagoneka kuti apumule yimpepe ni achinangolo ŵawo, ŵandu chachituwona kuti une ni mwanache jwangu Solomoni tuli ŵakwimuchila.”
22 Bati-seba ali mkuŵechetana ni mwenyewo, jwakulochesya Natani ŵajinjile.
23 Ndaŵi jijojo ŵandu ŵasalile mwenyewo kuti, “Jwakulochesya Natani akopochele.” Pelepo jwalakwe ŵapite kwa mwenyewo ni ŵatindiŵele ni kwinama mpaka ngope jakwe pasi pameso pa mwenyewo.
24 Kaneko Natani ŵawusisye mwenyewo kuti, “Ambuje ŵangu mwenye, ana wawojo ŵaŵechete kuti, ‘Adoniya ni juchachiŵa mwenye panyuma pangu, soni jwalakwe ni juchachitama pa mpando wangu waumwenye’?
25 Pakuŵa lelo jwalakwe apite kukupeleka mbopesi sya ng’ombe, yinyama yine yakwimbala ni ngondolo, soni jwalakwe apeleche yeleyi yejinji. Nambosoni jwalakwe ŵaŵilanjile ŵanache wosope ŵachalume ŵa mwenye, achimlongola ŵa magulu ga asilikali soni Abiyatala jwakutaga mbopesi. Jemanjaji akulya soni kumwa pampepe ni jwalakwejo kweleko, kwineku ali mkuŵecheta kuti, ‘Akole umi wa ulewu Mwenye Adoniya!’
26 Nambo jwalakwe nganambilanjila une jwakutumichila jwawo, kapena Sadoki jwakutaga mbopesi, kapena Benaya mwanache jwa Yehoyada, kapenasoni jwakutumichila jwawo Solomoni.
27 Ana ambuje ŵangu mwenye akundile yeleyi mkanaŵe kusalila une jwakutumichila jwawo ya mundu jwachatame pa mpando wawo wa umwenye panyuma pa wawojo ambuje ŵangu mwenye?”
28 Pelepo Mwenye Daudi ŵajanjile kuti, “Ambilanjile Bati-seba.” Pelepo jwalakwe ŵayiche ni kwima pameso pa mwenyewo.
29 Kaneko mwenyewo ŵalumbile kuti, “Nditu ngulumbila pameso pa Yehofa Mlungu jwaumi, jwele jwangulupwisye une mu yakusawusya yangu yosope.
30 Mpela yanatite pakulumbila kwa mmwejo pameso pa Yehofa Mlungu jwa Ayisalayeli kuti, ‘Mwanache jwenu Solomoni chachiŵa mwenye panyuma pangu, soni jwalakwe ni juchachitama pa mpando wangu wa umwenye mmalo mwangu,’ yeleyo ni yachinayitende lelo.”
31 Pelepo Bati-seba ŵatindiŵele ni kwinama mpaka ngope jakwe pasi pameso pa mwenyewo. Ni ŵaŵechete kuti, “Ambuje ŵangu Mwenye Daudi atame ni umi mpaka kalakala.”
32 Ndaŵi jijojo Mwenye Daudi ŵaŵechete kuti, “Ambilanjile Sadoki jwakutaga mbopesi, soni jwakulochesya Natani, nambosoni Benaya mwanache jwa Yehoyada.” Myoyo jemanjaji ŵayiche ni kwima pameso pa mwenye.
33 Mwenyewo ŵasalile jemanjaji kuti, “Mwajigale ŵakutumichila ŵangu, soni mumjigale mwanangu Solomoni ni kumkwesya pa bulu jwangu. Kaneko mjawule najo ku Gihoni.
34 Sadoki jwakutaga mbopesi soni jwakulochesya Natani chakamtaje jwalakwejo mawuta gakumtaga mundu pakumsagula kuti aŵe mwenye jwa Ayisalayeli. Kaneko mkagombe lipenga soni mkagumile kuti, ‘Akole umi waulewu Mwenye Solomoni!’
35 Kaneko mkamkuyeje jwalakwe pachakawujeje. Ni chachiyika akuno ni kutama pampando wangu wa umwenye. Jwalakwe chaŵe mwenye mmalo mwa une, soni une chinamtende jwalakwe kuŵa mlongola jwa Ayisalayeli soni jwa Ayuda.”
36 Ndaŵi jijojo Benaya mwanache jwa Yehoyada ŵajanjile mwenyewo kuti, “Ame. Nguŵenda kuti Yehofa Mlungu jwa wawojo ambuje ŵangu mwenye ajitichisye yeleyi.
37 Mpela yaŵatite Yehofa pakuŵa ni wawojo ambuje ŵangu mwenye, nguŵendasoni kuti Jwalakwe aŵe ni Solomoni. Soni jwalakwe atendekasye mpando waumwenye wa Solomoni kuŵa wamachili mnope kupunda mpando waumwenye wa wawojo ambuje ŵangu Mwenye Daudi.”
38 Kaneko Sadoki jwakutaga mbopesi, jwakulochesya Natani, Benaya mwanache jwa Yehoyada soni Akeleti ni Apeleti ŵapite ni kuja kumkwesya Solomoni pa bulu jwa Mwenye Daudi. Kaneko ŵayiche najo jwalakwejo ku Gihoni.
39 Jwakutaga mbopesi Sadoki ŵajigele msengo wa mawuta mu tenti ni kumtaga Solomoni pa mtwe. Kaneko jemanjaji ŵatandite kugomba lipenga, mwamti ŵandu wosopewo ŵatandite kugumila kuti, “Akole umi waulewu Mwenye Solomoni!”
40 Panyuma pakwe ŵandu wosopewo ŵamkuyisye jwalakwejo. Jemanjaji ŵaliji ali mkuwujila kwineku ali mkwimba yitolilo soni kusangalala mnope, mwamti chilambo chapasi chatenganyiche ligongo lya masegwe gawo.
41 Adoniya pampepe ni ŵandu wosope ŵaŵaŵilasile ŵapikene masegwego ali agambile kumalisya kulya. Yowabu paŵagambile kupikana kulila kwa lipenga jwawusisye kuti, “Ligongo chichi ku msinda kukupikanika masegwe mnope?”
42 Yowabu ali mkuŵecheta, Yonatani mwanache jwa Abiyatala jwakutaga mbopesi jwakopochele. Pelepo Adoniya jwatite, “Jinjilani, pakuŵa mmwejo mli mundu jwambone* nikuti myiche ni ngani jambone.”
43 Nambo Yonatani ŵamjanjile Adoniya kuti, “Iyayi, nganiyika ni ngani jambone. Ambuje ŵetu Mwenye Daudi amŵisile Solomoni kuŵa mwenye.
44 Mwenyewo ŵamsalile Sadoki jwakutaga mbopesi, jwakulochesya Natani, Benaya mwanache jwa Yehoyada soni Akeleti ni Apeleti kuti ampechesye jwalakwejo, mwamti ŵamkwesisye jwalakwejo pa bulu jwa mwenye.
45 Kaneko ali ku Gihoni, Sadoki jwakutaga mbopesi soni jwakulochesya Natani ŵamtasile Solomoni mawuta gakumtaga mundu pakumsagula kuti aŵe mwenye. Panyuma pakwe jemanjajo ŵatyosile kweleko ali mkusangalala, mwamti jwalijose mu msindamo akusangalala mnope. Ni ligongo lyakwetu akupikana masegwe.
46 Nambosoni Solomoni atemi pa mpando waumwenye.
47 Chindu chinesoni ŵakutumichila ŵa mwenye ayiche kukwayamichila ambuje ŵetu Mwenye Daudi. Jemanjaji aŵechete kuti, ‘Mlungu jwawo atendekasye lina lya Solomoni kuŵa lyakuchimbichika mnope kupunda lina lyawo. Nambosoni jwalakwe atendekasye mpando waumwenye wa Solomoni kuŵa wamachili mnope kupunda wa wawojo.’ Pelepo mwenye ŵatindiŵele ni kwinama mpaka ngope jawo pasi ali pa bedi jawo.
48 Kaneko mwenyewo ŵaŵechete kuti, ‘Achimbichikwe Yehofa Mlungu jwa Ayisalayeli jwele lelo atupele mundu jwakuti atame pa mpando wangu waumwenye, soni jwalakwe akundile kuti une nayiwone yeleyi ni meso gangu.’”
49 Pelepo ŵandu wosope ŵaŵaŵilanjidwe ni Adoniya wakamwile woga mnope, mwamti jwalijose ŵajimwiche ni kwawulaga kumangwawo.
50 Nombenajo Adoniya ŵamjogwepe mnope Solomoni. Myoyo jwanyakwiche ni kuja kukamula misengo ja pa malo gakupelechela mbopesi.
51 Kaneko utenga wayiche kwa Solomoni wakumsalila kuti, “Akunotu Adoniya akwajogopa mnope Mwenye Solomoni, mwamti jwalakwe akamwile misengo ja pa malo gakupelechela mbopesi, soni akuŵecheta kuti, ‘Nguŵenda kuti Mwenye Solomoni alumbile kaje kwa une kuti ngambulaga une jwakutumichila jwawo ni upanga.’”*
52 Pelepo Solomoni jwaŵechete kuti, “Naga jwalakwejo akutenda yindu yakuŵajilwa, atamose luwumbo lumo lwa mumtwe mwakwe ngasilugwila pasi. Nambo naga chakulemwa chichisimanikwa mwa jwalakwe, jwalakwejo chachiwa nditu.”
53 Myoyo Mwenye Solomoni ŵatumile ŵandu kuti akamjigale jwalakwejo kutyochela pa malo gakupelechela mbopesigo. Kaneko jwalakwe ŵayiche ni ŵatindiŵele ni kwinama mpaka ngope jakwe pasi pameso pa Mwenye Solomoniwo. Pelepo Solomoni ŵamsalile jwalakwejo kuti, “Jawulagani ku nyumba jenu.”
Maloŵe Gamwiŵanda
^ Mu Chihebeli ŵatiga, “chagoneje mmyala mwawo.”
^ Ligaleta lili ngolo jakuwutidwa ni mahachi.
^ Kapena kuti “jwakuŵajilwa.”
^ Upanga ukusawoneka mpela chipula chekulungwa chakutema kosekose.
