Chikalata Chandanda Chakwawula kwa Akolinto 8:1-13
8 Sambano pangani ja yakulya yakupelechedwa kwa milungu jakusepa, wosopewe tukujimanyilila chenene ngani jeleji. Nambotu kumanyilila yindu kukusamtendekasya mundu kuŵa jwakulikwesya, nambo kwanonyela ŵane kukusalimbikasya.
2 Naga mundu jwine akuganisya kuti akumanyilila yindu, jwalakwejo nganaŵepe kuyimanyilila chenene.
3 Nambo naga jwine akusamnonyela Mlungu, jwelejo akusaŵa jwakumanyika kwa Mlungujo.
4 Sambano pangani jakulya yakulya yakupelechedwa kwa milungu jakusepa, wosope tukumanyilila kuti milungu jakusepajo jili jangali masengo ata panandi. Tukumanyililasoni kuti Mlungu ali jumo.
5 Ŵandu ŵajinji akusaŵecheta kuti kwana milungu jejinji, chinga kwinani kapena pachilambo chapasi. Kwa jemanjajo nikuti milungu jipali jejinji soni achambuje ŵajinji.
6 Nambo kwa m’weji, Mlungu ali jumo, jwali Atati. Jwalakwe ni juŵapanganyisye yindu yosope soni m’weji tuli ŵakwe. Nambosoni tukwete Ambuje ŵampepe, ŵali Yesu Klistu. Yindu yosope yapanganyidwe kupitila mwa jwalakwejo soni m’weji twapali kupitila mwa jwalakwejo.
7 Nambope, ŵakusamanyilila yeleyi ngaŵa wosope. Kwa ŵane, ligongo lyakuti kala ŵatindiŵalilaga milungu jakusepa, pakulya yakulya yakupelechedwa kwa milungujo akusayiwonaga mpela akujitindiŵalilape. Kwa jemanjaji, ligongo lyakuti chikumbumtima chawo nganichijiganyidwa, chikusatamila kwalagasya.
8 Nambo yakulya nganiyiŵa yitutendekasisye kuŵandikana ni Mlungu. Naga ngatukulya, pangali chatukwasa, soni naga tukulya pangali chatukupata.
9 Nambo msamale kuti ufulu wenu pakusagula yindu ukajonanga chikumbumtima cha mundu jwangalimba.
10 Pakuŵa naga jemanja ŵamkumanyilila yindu mkulya yakulya m’nyumba ja milungu jakusepa, ŵane ni kumwona, ana chikumbumtima cha mundu jwangalimba ngachimlimbikasya kulya yakulya yakupelechedwa kwa milungujo?
11 Myoyo ligongo lyakumanyilila kwenu yindu mkumjonanga mundu jwangalimba, mlongo mjenu jusyesyene jwele Klistu ŵam’wilile.
12 Naga mkumlemwechesya mlongo mjenu m’litala lyeleli soni mkuwulasya chikumbumtima chakwe changalimba, nikuti mkumlemwechesya Klistu.
13 Myoyo naga yakulya yikonanga chikulupi cha mlongo mjangu, ngasindyasoni nyama ata panandi, ni chakulinga chakuti ngajonanga chikulupi cha mlongo mjangujo.
