Chikalata Chandanda Chakwawula kwa Akolinto 14:1-40
14 Mlinjilileje kukola chinonyelo, nambosoni mpitilisyeje kusosasosa* mituka jakutyochela kwa Mlungu, mnopemnope mtuka wakuti mkomboleje kulochesya.
2 Mundu jwakuŵecheta chiŵecheto chachilendo, ngakusaŵa ali mkuŵecheta kwa ŵandu nambo kwa Mlungu, pakuŵa pangali jwakusapikana yakuŵechetayo atamose kuti akusaŵecheta yindu yakusisika ni chikamuchisyo cha msimu.
3 Nambope, mundu jwakusalochesya akusiŵalimbikasya ŵandu, kwakamuchisya soni kwatamika mitima pasi ni maloŵe gakwe.
4 Mundu jwakusaŵecheta chiŵecheto chachilendo akusalilimbikasya jika, nambo mundu jwakusalochesya akusawulimbikasya mpingo.
5 Sambano nganonyele kuti jemanja wosope mŵecheteje yiŵecheto yachilendo, nambo mpaka yiŵe chenene kuti mŵe ŵakulochesya. Yisyene, mundu jwakulochesya akusampunda jwakuŵecheta yiŵecheto yachilendo, akaŵe naga jwakuŵechetajo akuyigopolela yakuŵechetayo kuti yilimbikasye mpingo.
6 Achalongo achimjangu, naga ngwika kwa jemanja ndili mkuŵecheta chiŵecheto chachilendo, ana mpaka yimkamuchisye chichi yeleyo? Nambo naga ngusaka kumkamuchisya, ngusosekwa mbecheteje kwa jemanja ni maloŵe ganapochele kutyochela kwa Mlungu, kapena ni lunda lwakumanyilila yindu, soni ni lunda lwakwiganya kapena kulochesya.
7 Yili yakulandana ni yindu yangali umi yele yikusakoposya maloŵe, mpela chitolilo kapena chida chakwimbila cha ngonji. Naga jwakwimbajo ngakuchengachenga maloŵe, ana jwine mpaka amanyilile chamtuli nyimbo jajikwimbidwa ni chitolilo kapena chida cha ngonjicho?
8 Naga lipenga likulila mwangapikanika chenene, ana ŵani ŵampaka akosechele ngondo?
9 Myoyo, naga jemanja ngamkuŵecheta yindu yakupikanika, ana jwine mpaka amanyilile uli yamkuŵechetayo? Kusala yisyene, timchigamba kwasa maloŵe genu pachabe.
10 Pachilambopa, pana yiŵecheto yejinji yayikuŵechetedwa, nambo pangali ata chimo chachili changapikanika.
11 Pakuŵa naga ngangupikanichisya yindu yayikuŵechetedwayo nikuti chinjiŵa mlendo kwa mundu jwakuŵechetajo soni jwakuŵechetajo chachiŵa mlendo kwa une.
12 Yili myoyosoni ni jemanja, pakuŵa mkusachilila kupata mituka jakutyochela kwa Mlungu, msosesoseje mituka jampaka jilimbikasye mpingo.
13 Myoyo, jwalijose jwakuŵecheta chiŵecheto chachilendo apopeleje kuti akombole kuchigopolela.
14 Pakuŵa naga ngupopela m’chiŵecheto chachilendo, ngupopela ligongo lya mtuka wa msimu weswela, nambo munganisyo mwangu jwangapikanichisya yanguŵechetayo.
15 Ana sambano ngusosekwa kutenda chichi? Ngusosekwa mbopeleje ni mtuka wa msimu, nambo chimbopelejesoni m’chiŵecheto changusapikana.* Ngusosekwa njimbeje nyimbo ni mtuka wa msimu, nambo chinjimbejesoni m’chiŵecheto changusapikana.*
16 Pamkumyamichila Mlungu ni mtuka wa msimu, ana mundu jwine jwali chiŵandika mmwejo chachiŵecheta uli kuti “Ame” pa kuyamika kwenuko naga ngakumanyilila yamkuŵecheta?
17 Yili yisyene kuti mkuyamichila m’litala lyambone, nambo yeleyi ngayikumlimbikasya mundu jwinejo.
18 Nguyamika Mlungu kuti ngusaŵecheta yiŵecheto yachilendo yejinji kupunda jemanja wosope.
19 Nambo atamose yili myoyo, mpaka nonyele kuŵecheta maloŵe msanope m’chiŵecheto changusapikana* kuti galimbikasye ŵane mumpingo, kulekangana ni kuŵecheta maloŵe 10,000 mu chiŵecheto chachilendo.
20 Achalongo achimjangu, ngamkusosekwa kuŵa mpela ŵanache pa kupikanichisya kwenu yindu, nambo mŵeje mpela ŵanache pa yindu yakusakala, soni mŵeje ŵachikulile pa kupikanichisya yindu.
21 Mu Chilamusi mwana maloŵe gakuti, “Yehofa akuti, ‘Chinjiŵecheta ni ŵandu ŵeleŵa m’yiŵecheto ya ŵandu ŵachilendo soni chinjiŵecheta nawo m’maloŵe ga achalendo, nambo jemanjaji ngasambikanilape.’”
22 Myoyo, yiŵecheto yachilendo yili yakwatendekasya ŵangakulupilila kuti akulupilile, ngaŵaga kwajiganyichisya ŵakulupilila. Nambo yakulochesya yili ya ŵandu ŵakulupilila ngaŵaga ŵangakulupilila.
23 Naga mpingo wosope wusongene pampepe soni jwalijose akuŵecheta chiŵecheto chachilendo, kaneko ŵandu ŵane kapena ŵangakulupilila akwika, ana ŵanduwo ngasaŵecheta kuti jemanja mtesile masoka?
24 Nambo naga jemanja wosope mkulochesya kaneko jwangakulupilila kapena mundu jwine akwika, jemanja timchimjamuka mundujo soni timchimtendekasya kuti aliwungunye mumtima mwakwe.
25 Pelepo yindu yakusisika ya mumtima mwakwe yichimanyika, mwamti chachitindiŵala mpaka ngope jakwe pasi ni kumchimbichisya Mlungu, soni chachiŵecheta kuti, “Nditu Mlungu ali ni jemanja.”
26 Sambano tutendeje wuli achalongo achimjangu? Pamsongene pampepe, jwine akusaŵa kuti akwete salimo, jwine chijiganyo, jwinesoni maloŵe gapochele kutyochela kwa Mlungu, jwine chiŵecheto chachilendo soni jwine kugopolela. Nambo yosope yitendekweje m’litala lyakuti yalimbikasyeje ŵane.
27 Naga ŵane akusaka kuŵecheta chiŵecheto chachilendo, ŵandu ŵaŵili kapena ŵatatupe ni ŵakusosekwa kuŵecheta, nambo aŵecheteje mwakuchengana soni jwine agopoleleje.
28 Naga pangali jwakugopolela, ngakusosekwa kuŵecheta chiŵecheto chachilendo mumpingo nambo aŵecheteje chamumtima kwa Mlungu jwakwe.
29 Myoyosoni ŵandu ŵaŵili kapena ŵatatu alochesyeje, soni ŵanewo amanyilile ngopolelo jakwe.
30 Nambo naga mundu jwine jwatemi pasi akupochela maloŵe gakutyochela kwa Mlungu, jwandandajo aleche kuŵecheta.
31 Pakuŵa wosope mpaka mlochesye nambo jwalijose pandaŵi jakwe, ni chakulinga chakuti ŵane wosope alijiganye ni kuŵa ŵakulimba.
32 Sonitu mituka jakutyochela kwa Mlungu ja ŵakulochesya jikusosekwa kulamulilidwa ni ŵakulochesyawo.
33 Pakuŵa Mlungu ali Mlungu jwamtendele soni jwalakwe jwangatendekasya kuti yindu yisokonechele.
Mpela mwayikuŵelaga m’mipingo josope ja ŵaswelawo,
34 achakongwe akaŵechetaga chilichose mumpingo, pakuŵa jemanjaji ngakukundidwa kuti aŵecheteje. Mmalomwakwe jemanjaji akusosekwa kuŵa ŵakupikanila mpela mwachikusaŵechetela Chilamusi.
35 Nambo naga pana yakusaka kulijiganya, akawusye achiŵamkwawo kunyumba, pakuŵa yili yakutesya sooni kuti jwamkongwe aŵecheteje mumpingo.
36 Ana maloŵe ga Mlungu gatyochele kwa jemanja, kapena gayiche kwa jemanjape basi?
37 Naga jwine akuganisya kuti ali jwakulochesya kapena akwete mtuka wakutyochela kwa Mlungu, akusosekwa kumanyilila kuti yindu yangumlembelayi yili lilamusi lyakutyochela kwa Ambuje.
38 Naga jwine akukana kukuya yeleyi, Mlungu tachimkanasoni jwelejo.*
39 Myoyo achalongo achimjangu mpitilisye kusosasosa mtuka wakulochesya, nambo mkalekasyaga ŵakusaka kuŵecheta yiŵecheto yachilendo.
40 Nambo yindu yosope yitendekweje mwakuŵajilwa soni mwakulondeka.*
Maloŵe Gamwiŵanda
^ Kapena kuti, “mlimbichileje kusosasosa.”
^ Maloŵe gakwe gandanda, “chimbopelejesoni ni nganisyo syangu.”
^ Maloŵe gakwe gandanda, “chinjimbejesoni ni nganisyo syangu.”
^ Maloŵe gakwe gandanda, “kuŵecheta maloŵe msanope ni nganisyo syangu.”
^ Kagopolele kanesoni, “Naga jwine ngakumanyilila yeleyi, chachitama jwangamanyilila myoyo.”
^ Kapena kuti, “mwakulongosoka.”
