Maliko 11:1-33
11 Sambano paŵaŵandichile ku Yelusalemu, jemanjajo ŵayiche pa Litumbi lya Maolifi chiŵandika musi wa Betifagi soni wa Betaniya. Pelepo jwalakwe ŵatumile ŵakulijiganya ŵakwe ŵaŵili
2 ni kwasalila kuti, “Mjawule ku musi wamkuwuwonawo, soni pachimkajinjile m’musimo, chimkamsimane bulu jwamwana jwamkambako jwele mundu jwalijose nganamkweleje. Mkamgopole ni myiche najo.
3 Naga mundu jwine akamwusye kuti, ‘Ligongo chichi mkumgopola bulujo?’ Jemanja mkajanje kuti, ‘Ambuje akumsaka, soni pachakamalisye kumkamulichisya masengo chakamwusye mwachitema.’”
4 Myoyo jemanjajo ŵapite ni ŵamsimene bulu ali amtaŵilile pamlango mumbali mwa msewu, ni ŵamgopwele.
5 Nambo ŵandu ŵaŵaliji chiŵandika pelepo ŵawusisye jemanjajo kuti, “Ligongo chichi mkumgopola bulujo?”
6 Jemanjajo ŵajanjile yiŵasalile Yesu yila, kaneko ŵakundile kuti ajawuleje.
7 Jemanjajo ŵayiche najo bulujo kwa Yesu, soni ŵakulijiganya ŵakwe ŵatandiche yakuwala yawo pa bulujo kaneko Yesu ŵakwesile.
8 Nambosoni ŵandu ŵajinji ŵatandikaga yakuwala yawo mumsewu, soni ŵane ŵatemangulaga tunyambi twamasamba ga yitela mwitinji ni kutujala mumsewumo.
9 Sambano ŵandu ŵaŵaliji pasogolo soni ŵane ŵaŵaliji panyuma ŵaliji mkugumila kuti, “Mlungu jwetu, tukwaŵenda kuti amkulupusye! Jwana upile mundu jwakwika m’lina lya Yehofa!
10 Mlungu awupe upile Uchimwene wa atati ŵetu Daudi wawukwikawo! Ŵalakwe ŵakwinani, tukwaŵenda kuti amkulupusye!”
11 Sambano paŵajinjile mu Yelusalemu ŵapite ku nyumba ja Mlungu. M’nyumbamo ŵalolitelolite yindu yosope, nambo ligongo lyakuti kwaliji kuli kuswele, jwalakwe ni ŵakulijiganya ŵakwe 12 ŵala ŵakopweche ni kwawula ku Betaniya.
12 Kundaŵi kwakwe paŵatyokaga ku Betaniya, Yesu jamkwete sala.
13 Nambo chapakutalichila myoyo, jwalakwe ŵachiweni chitela cha mkuju chili chana masamba. Yesu jwapite pachitelacho kuti akalole naga mwana yisogosi. Jwalakwe nganapata chilichose m’chitelamo, nambo masambape, pakuŵa nganijiŵa ndaŵi ja nguju.
14 Pelepo jwalakwe ŵachisalile chitelacho kuti, “Pangali mundu juchachilyasoni chisogosi kutyochela mwa m’mwejo.” Ŵakulijiganya ŵakwe ŵala ŵaliji mkupikana yeleyi.
15 Sambano jemanjajo ŵayiche ku Yelusalemu. Kweleko jwalakwe ŵapite ku nyumba ja Mlungu ni kutanda kwatopola ŵandu wosope ŵaŵasumisyaga ni kusuma yindu panyumbapo. Jwalakwe ŵagudubwisyesoni matebulo ga ŵandu ŵakuchenga mbiya soni mabenchi* ga ŵandu ŵakusumisya ngunda.
16 Nambosoni jwalakwe nganakundaga kuti ŵandu apiteje m’maluŵala ga nyumba ja Mlungujo ali ajigele yindu.
17 Jwalakwe ŵaliji mkwajiganya ŵandu soni kwasalila kuti, “Ana Malemba nganigasala kuti, ‘Nyumba jangu chachijikolanga kuti nyumba jakupopelela ŵandu ŵamitundu josope’? Nambo jemanja mjitesile kuŵa mbanga ja ŵachiswamba.”
18 Ŵakulolela ŵakutaga mbopesi soni alembi paŵapikene yeleyi, ŵatandite kusosasosa litala lyakuti amwulajile, pakuŵa jemanjaji ŵamjogopaga jwalakwejo ligongo ŵandu wosope ŵasimonjile ni yindu yaŵaliji mkwiganya soni yanonyele.
19 Pakwaswele, jemanjajo ŵakopweche mumsindawo.
20 Nambo kundaŵi kwakwe paŵaliji mkupita chiŵandika chitela cha mkuju chila, ŵachiweni chili chijumwile ni michiga jakwe.
21 Petulo pakukumbuchila yiyatendekwe yila, jwatite, “Labi, alole! Chitela chiŵachitembelele* chila chijumwile.”
22 Pelepo Yesu ŵasalile wosopewo kuti, “Mkole chikulupi mwa Mlungu.
23 Nditu ngumsalichisya jemanja kuti jwalijose jwakulisalila litumbi ali kuti, ‘Mtyoche apano mkaliponye m’nyasa,’ mundu jwelejo naga ngakukayichila mumtima mwakwe soni akwete chikulupi chakuti yaŵecheteyo chiyitendekwe, yichitendekwa nditu.
24 Ni ligongo lyakwe ngumsalila jemanja kuti, pamkupopela soni kuŵenda chindu chilichose, mkoleje chikulupi chakuti myipochele kala, ni pambesi pakwe timchiyipochela.
25 Nambosoni pamkupopela, mtandeje kaje kwakululuchila ŵane yamlemwechesye, ni chakulinga chakuti Atati ŵenu ŵali kwinani amkululuchilesoni jemanja yakulemwa yenu.”
26 *——
27 Jemanjajo ŵayichesoni ku Yelusalemu. Sambano Yesu paŵaliji mkwenda ku nyumba ja Mlungu, ŵakulolela ŵakutaga mbopesi, alembi soni achakulungwa ŵayiche kwa jwalakwejo.
28 Jemanjajo ŵamwusisye kuti, “Ana mkwete ulamusi wakutendela yeleyi? Ana mwawujigele kwapi ulamusi wakuti mtendeje yindu yeleyi?”
29 Yesu ŵajanjile jemanjajo kuti, “Unesoni chinamwusye chiwusyo chimpepe. Pachimunjanje, chinamsalilesoni kwanajigele ulamusi wangutendela yindu yeleyi.
30 Ana ubatiso wa Yohane watyochele kwinani kapena kwa ŵandu? Munjanje.”
31 Myoyo jemanjajo ŵatandite kukambilana kuti, “Naga tukwanga kuti, ‘Watyochele kwinani,’ jwalakweju chatuwusye kuti, ‘Nambi ligongo chichi nganimumkulupilila?’
32 Nambo nganituŵa tutitesoni kuti, ‘Watyochele kwa ŵandu.’” Jemanjaji ŵajogopaga gulu ja ŵandu, ligongo wosopewo ŵamwonaga Yohane kuti jwaliji jwakulochesya.
33 Myoyo jemanjajo ŵamjanjile Yesu kuti, “Ngatukumanyilila.” Pelepo Yesu jwajanjile kuti, “Unesoni nginamsalila kwanajigele ulamusi wangutendela yindu yeleyi.”
Maloŵe Gamwiŵanda
^ Kapena kuti, “chitandala.”
^ Kapena kuti, “chiŵachilwesile.”
^ Maloŵe ga mundimeji gangasimanikwa mu yakulemba yine yakala mnope. Yeleyi yikulosya kuti nganigaŵa mbali ja Malemba gakusalilidwa ni Mlungu.
