Agalatiya 1:1-24
1 Une Paulo, ndili jwandumetume. Nganimbochela utumikiwu kutyochela kwa ŵandu kapena kupitila mwa mundu nambo nawupochele kupitila mwa Yesu Klistu soni Mlungu ŵali Atati ŵele ŵamjimwisye Yesu ku chiwa.
2 Une pampepe ni achalongo achimjetu ŵali akuno, ngujilembela mipingo ja ku Galatiya.
3 Umbone mtima wekulungwa soni mtendele wakutyochela kwa Mlungu Atati ŵetu soni Ambuje Yesu Klistu uŵe ni jemanja.
4 Jwalakwe ŵalipeleche ligongo lya yakulemwa yetu, ni chakulinga chakuti atukulupusye ku chilambo chakusakalachi,* mwakamulana ni yakusasaka Mlungu jwetu jwalisoni Atati ŵetu.
5 Kwa Mlungujo kuŵe uchimbichimbi mpaka kalakala. Ame.
6 Une ngusimonga kuti jemanja mtyosile mwachitema kwa jwele juŵamŵilasile mwa umbone mtima wekulungwa wa Klistu mwamti mkujigalika ni ngani syambone syamtundu wine.
7 Ngaŵa kuti pana ngani syambone sine, iyayi. Nambo apali ŵandu ŵane ŵakumlambusya jemanja pakusaka kusokonasya ngani syambone syakwamba Klistu.
8 Nambope naga jwalijose, chinga m’weji kapena lilayika lyakutyochela kwinani, akwika kwa jemanja ni ngani syambone syakulekangana ni ngani syambone syatwamlalichile m’weji, mundu jwelejo aŵe jwamlweseche.*
9 Mpela yandite pakumsalila, nguwilisyasoni kuti, naga jwalijose akwika kwa jemanja ni ngani syambone syakulekangana ni ngani syambone syamwapochele jemanja, mundu jwelejo aŵe jwamlweseche.
10 Ngangutenda yindu kuti ŵandu anonyeleje, nambo Mlungu. Unetu ngangutenda yindu kuti nasangalasyeje ŵandu. Yikaŵe kuti ngusaka kwasangalasya ŵandu, ngaŵele jwangaŵajilwa kuŵa jwakutumichila jwa Klistu.
11 Ngusaka mmanyilile jemanja achalongo achimjangu kuti ngani syambone syanamlalichile nganisiŵa syakutyochela kwa ŵandu.
12 Pakuŵa ngani syambonesi nganimbochela kutyochela kwa mundu, soni ngaŵa kuti mundu ŵatesile yakunjiganya, nambo Yesu Klistu ni juŵatendekasisye kuti nasimanyilile.
13 Ngumanyilila kuti jemanja mwapikene yinatendaga panaliji mu Chiyuda, yakuti nawulagasisye mnope mpingo wa Mlungu soni nasakaga kuwujonanga kwene.
14 Najawulaga pasogolo mnope mu Chiyuda kupunda achimjangu ŵane, pakuŵa naliji jwakulipeleka mnope pakuya miyambo ja achinangolo ŵangu.
15 Nambo Mlungu juŵangopwesye m’matumbo mwa mama ŵangu ni kumbilanga kupitila mu umbone mtima wakwe wekulungwa, ŵayiweni kuŵa yakuŵajilwa
16 kummanyikasya Mwanache jwakwe kupitila mwa une ni chakulinga chakuti lalichile ngani syambone syakwamba jwalakwe kwa ŵandu ŵamitundu jine. Pandaŵijo une nganimbutuchila kwa mundu jwalijose kukumwusya pakwamba ya yeleyi.
17 Nambosoni nganinjawula ku Yelusalemu kwa ŵandu ŵele ŵaŵele ŵandumetume une mkanimbe, nambo napite ku Alabiya, soni kaneko nawujile ku Damasiko.
18 Kaneko, pali papite yaka yitatu napite ku Yelusalemu kuti ngawonegane ni Kefa,* mwamti natemi najo kwa masiku 15.
19 Nambo kweleko nganimbonegana ni ŵandumetume ŵane wosope. Nagambile kuwonegana ni Yakobope, mlongo mjawo Ambuje.
20 Sambano pakwamba ya yindu yangumlembelayi, ngusaka kumsimichisya pameso pa Mlungu kuti ngangulambusya.
21 Panatyosile kweleko najinjilile ku madela ga ku Siliya soni ku Kilikiya.
22 Nambo nganimba jwakumanyika kwa ŵandu ŵa m’mipingo ja ku Yudeya ŵaŵaliji ŵakamulana ni Klistu.
23 Jemanjaji ŵagambaga kupikana kuti, “Mundu juŵatulagasyaga julatu sambano akulalichila ngani syambone syakwamba chikulupi chiŵaliji mkuchijonanga.”
24 Myoyo jemanjaji ŵatandite kumchimbichisya Mlungu ligongo lya une.
Maloŵe Gamwiŵanda
^ Kapena kuti, “ndaŵi jakusakalaji.” Alole Kugopolela kwa Maloŵe Gane.
^ Ŵane akusati “kutapana; kutembelela.”
^ Juŵakolanjidwagasoni kuti Petulo.
