Ana Akusaka Kumanyilila Yisyesyene?
YISYESYENE pakwamba ya cici? Pakwamba ya mawusyo gane gakusosekwa mnope gakusaliwusya ŵandu. Komboleka kuti wawojo akusaliwusyaga mawusyo mpela aga:
-
Ana Mlungu yisyene akusatuganicisyaga?
-
Ana ngondo ni yipwetesi yicimala kwene?
-
Ana cikusatendekwa cici kwa m’weji pati tuwile?
-
Ana cipali cembeceyo cilicose pakwamba ya ŵandu ŵawe?
-
Ana mbopeleje camtuli kuti Mlungu ambikaneje?
-
Ana mpaka mmbe jwakusengwa camtuli pa umi wangu?
Ana mpaka akapate kwapi kwanga kwa mawusyo gelega? Naga akwawusya ŵandu ŵakulekanganalekangana cacajanga mwakulekanganalekangana. Atamose ali ŵawusisye acimlongola ŵa dini, cacajangasoni mwakulekanganalekangana. Kwanga kwine kukusaŵa mpela kwakamucisya nambo mkupita kwa ndaŵi kukusaŵa kwangakamucisya.
Nambo pana buku jimo jajikusajanga cenene. Buku jeleji jikusasala yisyesyene. Yesu Klistu paŵapopelaga kwa Mlungu ŵaŵecete kuti: “Maloŵe gawo gali usyesyene.” (Yohane 17:17) Moŵa agano Maloŵe gelego tukugamanyilila kuŵa Baibulo Jeswela. M’kacipepalaka, mwakata capikane kwanga kwakupikanika, soni kusyesyene kwa Baibulo pa mawusyo gali penaniga.
Ana Mlungu Yisyene Akusatuganicisyaga?
ANA LIGONGO CICI ŴANDU AKUSALIWUSYA CIWUSYO CELECI?: Ligongo tukutama m’cilambo cangalwe ni cangali cilungamo. Dini syejinji sikusajiganya kuti Mlungu akusatendekasyaga kuti tuyiwoneje yipwetesi yeleyi.
YAJIKUSAJIGANYA BAIBULO: Mlungu jwangatendekasya cindu cakusakala. Lilemba lya Yobu 34:10 likusati: “Kuli kwakutalika ni Mlungu jwakuwona kutenda cindu cakusakala, ni Jwamaciligose kutenda cangali cilungamo!” Mlungu akwete lisosa lyambone kwa ŵandu. Ni ligongo lyakwe Yesu ŵatujiganyisye kupopela kuti: “Atati ŵetu ŵa kwinani, . . . ucimwene wawo ujise. Kusaka kwawo kutendekwe, m’cilambo mpela kwinani.” (Matayo 6:9, 10) Mlungu akusatuganicisyaga mnope mwati ŵatesile cindu cakulema mnope pakusaka kuti lisosa lyakwe likombolece.—Yohane 3:16.
Alolesoni Genesis 1:26-28; Yakobo 1:13; soni 1 Petulo 5:6, 7.
Ana Ngondo ni Yipwetesi Yicimala Kwene?
ANA LIGONGO CICI ŴANDU AKUSALIWUSYA CIWUSYO CELECI?: Ngondo jikwendelecela kumala ŵandu. Wosopewe tukusasimana ni yipwetesi.
YAJIKUSAJIGANYA BAIBULO: Mlungu akusala ya ndaŵi jacacitendekasya mtunjelele pacilambo capasi cosope. Mlungu pacacitanda kulamulila cilambo capasi, ŵandu “ngasalijiganyasoni ngondo.” M’malo mwakwe “cacisyana mawupanga gawo kuti gaŵe yakulimila.” (Yesaya 2:4) Mlungu cacimasya ungali cilungamo uliwose ni yipwetesi yosope. Baibulo jikusaŵeceta yayicitendekwa kuti: “[Mlungu] tacasyula misosi jawo mmeso mwawo. Ciwa ngasicipagwasoni, atamuno kulila malilo, kapena kulila kapena kuyiwona yipwetesi, yindu yandanda [kupwatikapo yindu yangali cilungamo ni yipwetesi ya moŵa agano] yili yipite.”—Ciunukuko 21:3, 4.
Alolesoni Masalmo 37:10, 11; 46:9; soni Mika 4:1-4.
Ana Cikusatendekwa Cici kwa M’weji Pati Tuwile?
ANA LIGONGO CICI ŴANDU AKUSALIWUSYA CIWUSYO CELECI?: Dini syejinji sya m’cilamboci sikusajiganya kuti cindu cine mkati mwa mundu cangawa mundujo ali awile. Ŵane akusakulupilila kuti ŵandu ŵawe komboleka kwawulasya ŵandu ŵacijumi, nambosoni kuti Mlungu akusajelusya ŵandu ŵakulemwa mwakwalagasya kwangamala ni yipwetesi yangalwe ku moto wakogoya wa helo.
YAJIKUSAJIGANYA BAIBULO: Naga ŵandu awile ŵangakola umi, ŵangakombola kupikana, ŵangalola, ŵangaŵeceta, soni ŵangaganisya cilicose. Pa Mlaliki 9:5 pakusasala kuti: “Ŵawe pangalikose cakusacimanyilila.” M’yoyo ŵandu ŵawe ngakomboleka kwawulasya, atamose kwakamucisya ŵandu ŵacijumi.—Masalmo 146:3, 4.
Alolesoni Genesis 3:19 soni Mlaliki 9:6, 10.
Ana Cipali Cembeceyo Cilicose Cakwamba ya Ŵandu Ŵawe?
ANA LIGONGO CICI ŴANDU AKUSALIWUSYA CIWUSYO CELECI?: Tukusasaka kuŵa cijumi, soni tukusasaka kuti tusangalaleje ni umi yalumo ni ŵatukusanonyela. Kuli kwacipagwa kumbila tuli tuwonegene ni ŵandu ŵatwanonyelaga ŵaŵawile.
YAJIKUSAJIGANYA BAIBULO: Ŵandu ŵajinji ŵaŵawile cacajimusya. Yesu ŵasasile kuti ‘ŵandu wosope ŵele ŵali m’malembe [“gacikumbucilo,” NW] tacigapikana maloŵe gakwe ni tacikopoka m’malembe mwawo.’ (Yohane 5:28, 29) Mwakamulana ni lisosa lyandanda lya Mlungu, ŵandu ŵacacajimusya cacikola upile wakutama m’paladaiso pacilambo capasi. (Yesaya 65:21-25) Yine mwa yindu yambone yamsogolo yili umi wangalwala, soni wangamala kwa ŵandu ŵakupikanila. Baibulo jikusaŵeceta kuti: “Ŵakulungama cacipocela cilambo capasi, ni cacitama mwelemo kwandaŵi josope.”—Masalmo 37:29.
Alolesoni Yobu 14:14, 15; Luka 7:11-17; soni Masengo 24:15.
Ana Mbopeleje Camtuli Kuti Mlungu Ambikaneje?
ANA LIGONGO CICI ŴANDU AKUSALIWUSYA CIWUSYO CELECI?: Ŵandu ŵa mu dini syosope akusapopelaga. Nambope, ŵajinji akusayiwona kuti Mlungu jwangajanga mapopelo gawo.
YAJIKUSAJIGANYA BAIBULO:
Yesu ŵatujiganyisye kuti tuŵambaleje kuwilisyawilisya maloŵe m’mapopelo getu. Jwalakwe ŵaŵecete kuti, “pamkupopela, mkatotoganyaga maloŵe.” (Matayo 6:7) Naga tukusaka kuti Mlungu apikanileje mapopelo getu, tukusosekwa kuti tupopeleje mwakamulana ni litala lyakusaliwona jwalakwe kuŵa lyakuŵajilwa. Kuti tutende yeleyi, tukusosekwa kulijiganya lisosa lya Mlungu ni kupopelaga mwakamulana ni lisosalyo. Pa 1 Yohane 5: 14 pakusasala kuti: “Pakuŵa akusatupikana patukuŵenda cindu cilicose malinga ni lisosa lya [Mlungu].”
Alolesoni Masalmo 65:2; Yohane 14:6, 14; soni 1 Yohane 3:22.
Ana Mpaka Mmbe Jwakusengwa Camtuli pa Umi Wangu?
ANA LIGONGO CICI ŴANDU AKUSALIWUSYA CIWUSYO CELECI?: Ŵajinji akusakulupilila kuti mpaka aŵe ŵakusengwa naga ali akwete mbiya, ali ŵakumanyika, kapena ali ŵakusalala. Ni akusalingalinga kuti ayipate yeleyi nambope kumbesi kwakwe akusaliwona kuti nganaŵa ŵakusengwa.
YAJIKUSAJIGANYA BAIBULO: Yesu ŵasasile mwampaka mundu aŵele jwakusengwa paŵaŵecete kuti: “Ŵakusengwa ŵandu ŵele ŵakusamanyilila kulaga kwawo kwa yausimu.” (Matayo 5:3, NW) Mundu mpaka aŵe jwakusengwa naga akulingalinga kutenda yakuti apate yakusosecela mnope ni kumasya sala jakwe jakusaka kumanyilila yisyesyene ya Mlungu ni lisosa lyakwe kwa jwalakwe. Yinduyi yili m’Baibulo. Kuyimanyilila yeleyi mpaka kutukamucisye kulekanganya yayili yakusosekwa mnope ni yangasosekwa mnope. Kunda kuti usyesyene wa m’Baibulo wutulongoleje mu yatukusasagula kutenda ni mundamo kukusakamucisya kola umi wakusengwa kusyesyene.—Luke 11:28.
Alolesoni Miyambo 3:5, 6, 13-18 soni 1 Timoteyo 6:9, 10.
Aku kugambile kuŵa kulola mwakata mwajikwanjila Baibulo mawusyo 6 gala. Ana akusaka kumanyilila yejinji? Naga ali jumo jwa ‘ŵandu ŵele ŵakusamanyilila kulaga kwawo kwa yausimu,’ mwangakayicila casace. Mpaka aliwusye mawusyo gane mpela gakuti: ‘Naga Mlungu akusatuganicisyaga, nambi wuli kutandila kalakala, akundile kuti yindu yakusakala, soni yipwetesi yitendekweje? Ana mpaka ndende wuli kuti liŵasa lyangu liŵe lyakusangalasya?’ Baibulo jikusajanga cenene mawusyo gelega ni gane gejinji.
Nambope, ŵandu ŵajinji moŵa agano ŵanganonyela kulola m’Baibulo ligongo ngakujimanyilila cenene. Ana mpaka asace kwakamucisya kwanga mawusyo kutyocela m’Baibulo? Mboni sya Yehofa sikwakamucisya ŵandu m’matala gaŵili.
Litala lyandanda, lili kwapa buku jakuti Kodi Baibulo Limaphunzitsa Chiyani Kwenikweni? (Ciceŵa) Litala lyaŵili lili kwajiganya Baibulo kwalulele panyumba jawo. Mwalulele, jwa Mboni sya Yehofa jwakusatama ciŵandika kumangwawo, jwali jwakuŵajilwa kwiganya Baibulo komboleka kwikaga kunyumba kwawo, kapena malo galigose gambone kwa wawojo, kwandaŵi jamnono mlungu uliwose kuti atagulilaneje ya m’Baibulo. Kutenda yeleyi kwakamucisye ŵandu mamiliyoni gamajinji pacilambo cosope. Ŵajinji kumbesi kwakwe ayikene pakuŵeceta mwakusengwa kuti: “Mbatile usyesyene!”
Pangali cipanje cakusosekwa mnope mpela celeci. Usyesyene wa m’Baibulo wukusatugopola ku yakulupilila misimu, yindu yakusokonesya, soni ku ndetemu syangali mate. Ukusatukamucisya kola cembeceyo, tukusamanyilila lisosa lya umi wetu, soni tukusaŵa ŵakusengwa. Yesu ŵaŵecete kuti: “Timciwumanyilila usyesyene, nipo usyesyene tiucimpa ulukosyo kapena kuti tiucimgopola.”—Yohane 8:32.
Mwine Mpaka Ayisache Ayi
SANJA JA MLONDA
Kuwungunya Yisyesyene
Patupikene ngani jaunami soni jangadalilichika, pana litala lyampaka tulikuye kuti tupate yisyesyene yayiwusyo yakusosekwa mnope yakwamba umi
AJIMUCHE!
Yampaka Atende Kuti Aŵeje Ŵakusangalala
Mlungu Jwamachili akusatusalila yindu yampaka yitukamuchisye kuŵa ŵakusangalala apano mpaka msogolo.
ESSENTIAL BIBLE TEACHINGS
Ana Ŵawe ali Mundamo Jamtuli?
Baibulo jikusatusalila ya ndaŵi jele ŵandu ŵajinji chachijimuka ku ŵawe mpela muyaŵelele ni Lasalo.
YAKWAMBA M’WEJI
Ligongo Chichi Tukusosekwa Kulijiganya Baibulo?
Baibulo jikwakamuchisya ŵandu ŵajinji pachilambo chosope kupata kwanga kwa yiwusyo yakusosekwa mnope paumi. Ana akusaka kuŵa jumo mwa ŵandu ŵelewa?
YAJIKUSAJIGANYA BAIBULO
Atande Kulijiganya Baibulo
Atande kulijiganya Baibulo mwakambilana soni mwalulele ni mundu jwine.
