Ŵawoneje ŵakupikanila ŵawo mwakuŵajilwa. Akulupilileje kuti ŵakulupilila acimjawo akusasaka kutenda yindu yakumsangalasya Yehofa. Atamose pakuŵeceta ngani jakwamba ya camuko, candanda akusosekwa kuyamicila kaje yindu yambone yakusatendaga.

Anandiyeje yindu yangasosekwa mungani jawo. Mpaka asale ngani sine syangasosekwa mnope nambo ni cakulinga cakuti agombelecesye ciwundo cine cakwe. Kaŵecete ka ngani jawo josope kaŵeje kakuŵajilwa.

Akamulicisyeje cenene masengo Maloŵe ga Mlungu. Mpaka akolanje yindu yatesile Yehofa munyumamu, yakutenda apano soni yacacitenda kwa ŵandu kusogoloku. Akusosekwa kwasalila ya cembeceyo soni kwalimbikasya ŵakupikanila ŵawo.