გიშაგორილი მასალაშა გინულა

სარჩევშა გინულა

 გაკვეთილ 2

მი რე ღორონთი?

მი რე ღორონთი?

1. მუშენი ოკო ფცათ თაყვანი ღორონთის?

ღორონთი იფრელიშ შემოქმედი რე. თის ვართ დაჭყაფუ უღუდ დო ვართ ბოლო აღვენუ (ფსალმუნი 90:2). ღორონთი რე ბიბლიას მოჩამილი სახიოლო ამბეშ ავტორი (1 ტიმოთე 1:11). თიქ მუჩეს სიცოცხლე დო ათეშგურშენი თაყვანი ხვალე თის ოკო ფცათ. წეკითხით გამოცხადებაშ 4:11.

2. მუნერი რე ღორონთი?

ღორონთი დღას მითინს ვაუძირ, მუშენდა თინა შური რე. შური სიცოცხლეშ უმაღლეს ფორმა რე დო თინა განსხვავებული რე დედამიწას არსებული შხვა ქმნილებეფიშ სიცოცხლეშ ფორმაშე (იოანე 1:18; 4:24). მარა მიუხედავო თეშ, ღორონთიშ აზრეფი დო გრძნობეფი მუში ქმნილებეფშე იძირე. მაგალთო, შხვადოშხვა ხილი დო ყვავილეფით ეფშა დედამიწა ღორონთიშ ჸოროფა დო სიბრძნეშა მეტყველენს. უსაზღვრო სამყარო ღორონთიშ დიდ ძალას მოძირანა. წეკითხით რომაელეფიშ 1:20.

ბიბლიაშ გურაფათ უმოსის გებგენთ ღორონთიშ პიროვნაბაშენ. ბიბლიაშე ბგებულენთ, მუ მოწონს დო მუ ვამოწონს ღორონთის, მუჭო ოქცუ ადამიანეფს დო მუჭო მოქმედენს შხვადოშხვა სიტუაციეფიშ დროს. წეკითხით ფსალმუნიშ 103:7—10.

3. უღუნო ღორონთის სახელი?

იესოქ თქუ: „ჩქინი ზეციერი მუმა, გენიწმინდას სქანი სახელქ“ (მათე 6:9). მართალი რე, ღორონთის ბრელი წოდება უღუ, მარა სახელი ხვალე ართი უღუ. თე სახელს შხვადოშხვა ნინაშა შხვადოშხვანერო თქუანა. მარგალურო ღორონთიშ სახელი ათაშ ითქუალუაფუ: „იეჰოვა“. მინ თქუანს „იაჰვე“. წეკითხით ფსალმუნიშ 83:18.

ღორონთიშ სახელი ეშაღალირ რე ბიბლიაშ ბრელი თარგმანშე დო თირელი რე ტიტულეფით უფალი დო ღორონთი. მარა გვალო დუდშე ბიბლიას ღორონთიშ სახელი დაახლოებით 7000-შა რდუ შინელი.  მუჟამს იესო ხალხის ღორონთიშ შესახებ ოგურუანდ, თინეფს ღოროთიშ სახელს ხოლო ოჩინებაფუანდ. წეკითხით იოანეშ 17:26.

4. ზრუნენსო ღორონთი ჩქინო?

იეჰოვა მოჸოროფე მუმაცალო ზრუნენს ჩქინო

ამდღარი ცხოვრებაშ გინმაჯინე, ქუმარაგადენანო, ნამდა ღორონთი ზრუნენს ჩქინო? ნამთინე იჩიებ, ნამდა ღორონთი ტანჯვას ჩქინი გამოსაცდელო უშვენს, მარა თენა ტყურა რე. წეკითხით იაკობიშ 1:13

ღორონთიქ ადამიანეფს არჩევანიშ თავისუფლება მეჩუ. მადლიერეფი ვავორდათო ოკო თიშ, ნამდა შემლებუნა ჩქი თვითონ ეიფრჩუათ, ვემსახურათ თუ ვარ ღორონთის (იესო ნავეს ძე 24:15). მარა ბრელი თიცალი შარას ირჩიენს, ნამუთ ატანჯენს დო აზარალენს ქოთ მუს დო ქოთ შხვას. იეჰოვას გურს ჭუნს თესხი უსამართლობა. წეკითხით დაბადებაშ 6:5, 6.

იეჰოვა მზრუნველი ღორონთი რე. თის ჩქინო ჯგირი ცხოვრება ოკო. ღორონთი მალას მოსპუნს ტანჯვას დო არძას, მიდგას ბრალი მიშუძუ თიშა. მარა ამდღა ღორონთის უღუ საფუძვლიანი მიზეზეფი, დროებით დუშვას ტანჯვა. თე მიზეზეფიშ გურშენი ათე ბროშურაშ მა-8 დუდის იჸუაფუ რაგადი. წეკითხით 2 პეტრეშ 2:9; 3:7, 13.

5. მუჭო დევეახლოვათ ღორონთის?

ღორონთი საშუალებას მარზენა, დევეახლოვათ მუს ლოცვაშ მეშვეობით. თინა თითოეული ადამიანიშ მიმართ ავლინენს ინტერესის (ფსალმუნი 65:2; 145:18). ღორონთი ირო მზათ რე ქუმაპატუან შეცდომეფი. მართალი რე, ირო ვამმაქციებენა სწორას, მარა ღორონთი ორწყე ჩქინი მონდომებას, ქიმიფქცუათ მუში მოსაწონო. ჩქი ვავორეთ სრულყოფილეფი, მარა შემლებუნა ღორონთწკუმა დაახლოება. წეკითხით ფსალმუნიშ 103:12—14; იაკობიშ 4:8.

სიცოცხლე ღორონთიქ მუჩეს, ათეშგურშენი არძაშ უმოსო თინა იმსახურენს ჩქინი ჸოროფას (მარკოზი 12:30). ღორონთის ჸოროფას თი შემთხვევას დუმტკიცენთ, მუჟამს მეტის ქიგეგენთ თიშგურშენი დო შეასრულენთ თიშ მოთხოვნეფს. ათაშ უმოსო დეახლოებუთ ღორონთის. წეკითხით 1 ტიმოთეშ 2:4; 1  იოანეშ 5:3.