შურო გაზეთ გეგნოფაფჩით, ტელევიზორ ჩუვართით დო რადიოს ქუმურჩქილეთ-და, ბგებულენთ, ნამდა კრიმინალს, ჩხუპის დო ტერორიზმის მეუღ ქიანა. დეფიქრი სქან პრობლემეფშენ ხოლო. ეგება ლახალა გაწუხენს-და, ვარდა საჸოროფო კოჩ გაფუნ-და ღურელი. შილებე სი ხოლო ართ ღორონთიერ კოჩცალო, იობცალო, გინაფლენდე დუდის, ნამუშ ცხოვრება გაჭირებათ რდუ ეფშა (იობი 10:15).

დეფიქრი:

  • თეცალ ცხოვრება ოკოდუო ღორონთის ჩქიმო დო მთელ კაცობრიობაშო?

  • მუჭო ოკო მივერუე პრობლემეფს?

  • ქოარსებენსო მუთუნნერ იმენდი, ნამდა დედამიწას მშვიდობიან ცხოვრება დღას ქიჸუაფუ?

ბიბლია თე კითხვეფიშ ზუსტ პასუხეფს მარზენა.

 ბიბლია მოგურუანა, ნამდა ღორონთი დედამიწას ბრელ მუთუნს დოთირანს:

„გელუწიმინდას თინეფს ირნერ ჩილამურს თოლეფშე დო ვეჸუაფ ღურა, ვართ ნგარა, თვალუა დო ჭუა“ (გამოცხადება 21:4)

„ქულა ირემცალო გილასხაპუნდას იჸი“ (ესაია 35:6)

„ჸვერეს თოლსინთე ქუმაკათუ“ (ესაია 35:5)

„არძა, მით ონთხორუეს რენან . . . კილელენა“ (იოანე 5:28, 29)

„ნამთინ მახორუ ვა თქუანს, ლეხი ვორექია“ (ესაია 33:24)

„ხვეიანო იჸუაფ მარცვლეულ დედამიწას“ (ფსალმუნი 72:16)

 ბიბლიაშ გურაფა ჯგირობუას მოიღანს

ვეჩქარა თიშ რაგად, ნამდა თინა მუთ წოხოლენ გვერდეფს რე მოჩამილინ, ირფელ ზღაპარ რე. თეს ირფელს ღორონთი მოპირუნა. ბიბლია მირაგადნა, მუჭო შეასრულენს ღორონთი მუშ დუნაპირებუს.

მარა ბიბლიაშ გურაფა ხვალე თეშ გურშენ ვა რე ჯგირი. ბიბლია მოხვარნა, ამდღა იპჸუათ უმოს კმაყოფილქ ჩქინ ცხოვრებათ. ართ წუთით დეფიქრი, მუსხი პრობლემა გიღუ დო მუსხი ოსოფინალ გაფუ თე ცხოვრებას. შილებე ოჯახის პობლემეფი გიღუდას, ფინანსურო გიჭირდას, ჯგირ ჯამრთელობა ვაიღუდას ვარდა მითინ ხოლოშიან გაფდას ღურელი. ბიბლია კათას ოხვარ, მერუან ამდღარ პრობლემეფს, ცხოვრებას ეუქექუანს დო პასუხენს მნიშვნელოვან კითხვეფს:

  • მუ რე ჩქინ ტანჯებაშ მიზეზი?

  • მუჭო მივერუათ ამდღარ პრობლემეფს?

  • მუ ოკო ვაკეთათ, უმოს ბედნერ ოჯახურ ცხოვრება ქომღუდანი?

  • ქოარსებენსო მუთუნ ღურაშ უკული?

  • დღას ქობძირუნთო ჩქინ ღურელეფს?

  • მუ მარწმუნენა თიშა, ნამდა ღორონთი შეასრულენს მუშ დუნაპირებუს?

 თე წიგნის ქოკითხულენქ-და, ალბათ გიღუ სურვილ ქიგეგე, მუს ოგურუანს ბიბლია. თე წიგნი მიგეხვარებუ თეშ გაგებას. ქიდეკვირ, ნამდა აბზაცეფიშ ბოლოს კითხვეფ რე მოჩამილ. მილიონობით კოჩი დიდ ინტერესით მსჯელენს ბიბლიურ თემეფშენ კითხვა-პასუხეფით იეჰოვაშ მოწმეეფწკუმა. იმენდ მიღუნა, ნამდა სი ხოლო მიგეწონებუ თენა. ღორონთი დოხვამანს სქან მონდომას დო ბიბლიაშე ნაგურეფ შურ დო გურს ეიფშანს!