გიშაგორილი მასალაშა გინულა

დამატებითი მენიუშა გინულა

სარჩევშა გინულა

იეჰოვაშ მოწმეეფი

მარგალური

მუს მოგურუანა ბიბლია სინამდვილეს?

 დუდი 8

მუ რე ღორონთიშ სამეფო?

მუ რე ღორონთიშ სამეფო?
  • მუს იჩიებ ბიბლია ღორონთიშ სამეფოშ გურშენ?

  • მუს გაკეთენს ღორონთიშ სამეფო?

  • მუჟამ შეასრულენს სამეფო ღორონთიშ ნებას დედამიწას?

1. ნამ ნაჩინებ ლოცვას გუვარჩიენთ?

მილიონობით კოჩშო ნაჩინებ რე ლოცვა, ნამუსით „მამაო ჩვენოს“ ვარდა „უფალიშ ლოცვას“ უძახუნა. თენა რე ლოცვაშ ნიმუში, ნამუთ იესოქ მუშ მიმაჸუნალეფს დაგურუ. თე ლოცვა მანგარ მნიშვნელოვან რე, ათეშგურშენ თექ მოჩამილ პირველ სუმ საკითხის გუვარჩიენთ დო თენა მიმეხვარებუნა, ქიგებგათ, მუს მოგურუანა ბიბლია სინამდვილეს.

2. ნამ სუმ საკითხშენ ლოცვა დაგურუ იესოქ მუშ მოწაფეეფს?

2 იესოქ მუშ მოწაფეეფს დაგურუ: «თაშ ილოცით: „ჩქინ ზეციერ მუმა, გენიწმინდას სქან სახელქ. მორთას სქან სამეფოქ დო რდას სქან ნება მუჭოთ ზეცასინ, თეშ დედამიწას ხოლო“» (მათე 6:9—13). მუ მიშურს თე სუმ ოთხუალშა?

3. მუ ოკო მიჩქუდან ღორონთიშ სამეფოშ გურშენ?

3 ჩქი უკვე ბრელ მუთუნ გებგით ღორონთიშ სახელიშ, იეჰოვაშ გურშენ. თინა ხოლო ქიგებგით, მუ რე ღორონთიშ ნება — მუ აკეთ დო ანწ მუშ კეთება ულამ კაცობრიობაშო. მუს ნიშნენდ იესოშ სიტყვეფი: „მორთას სქან სამეფოქ?“ მუ რე ღორონთიშ სამეფო? მუჭო შეულებ თის ღორონთიშ სახელიშ განწმენდა? მუჭო რე დაკავშირებულ ღორონთიშ სამეფოშ მულა თიშ ნებაშ შესრულებაწკუმა?

 მუ რე ღორონთიშ სამეფო?

4. მუ რე ღორონთიშ სამეფო დო მი რე თიშ მეფე?

4 ღორონთიშ სამეფო იეჰოვაშ დაარსებულ მთავრობა რე. თე მთავრობაშ მეფე ხოლო იეჰოვაქ დარინუ. მი რე ღორონთიშ სამეფოშ მეფე? იესო ქრისტე. იესოშა, მუჭოთ მეფეშა, დედამიწას რენ ფერ ნამთინ მართველს ვემიართე. თის „მეფეეფიშ მეფე დო უფალეფიშ უფალი ჯოხო“ (1 ტიმოთე 6:15). იესოს ბრელით უმოსიშ კეთება შეულებ, ვინემ ნებისმიერ დედამიწას რენ ფერ არძაშ უჯგუშ მართველს.

5. სოვრეშე იმართველენს ღორონთიშ სამეფო დო მუს ხენჯღვერანდას იჸი თინა?

5 სოვრეშე იმართველენს ღორონთიშ სამეფო? თე კითხვაშა ადვილო მაპასუხებენა, მუჟამსით ქიგიფშინანთ, სო რე ასე იესო. გარჩქვენუ, ნამდა იესო აწამეს. თიქ დოღურ დო უკულ გათელებულქ იჸუ. თეშ უკულ იესოქ ზეცაშა მიდართუ (საქმეები 2:33). თავრეშე იძირე, ნამდა ღორონთიშ სამეფო ზეცას რე. ათეშგურშენ თის ბიბლია „ზეციურ სამეფოს“ უძახუ (2 ტიმოთე 4:18). ღორონთიშ სამეფო ზეცას რე, მარა თინა დედამიწას ხენჯღვერანდას იჸი (წეკითხი გამოცხადებაშ 11:15).

6, 7. მუშენ რე იესო არძაშ უჯგუშ მეფე?

6 მუშენ რე იესო არძაშ უჯგუშ მეფე? ართ-ართ მიზეზ თინა რე, ნამდა იესო დღას ვა ღურუ. უღურალ მართველ კოჩ ვა არსებენს. მარა იესოშენ ბიბლია იჩიებუ: „ხვალე თინა რე უღურალ დო მკვიდრენს უჭირნაფ სინთიერ ადგილს“ (1 ტიმოთე 6:16). თენა თის ნიშნენს, ნამდა ირფელ, მუდგას იესო აკეთენსინ, მარადიულ ჯგირობუას მიღანს. ჩქი დარწმუნებულ ვორეთ, ნამდა იესო მართალო ბრელ დიდებულ საქმეს გაკეთენს კოჩიშ საჯგირობუოთ!

7 ქობძირათ, მუ რე წინასწარ რაგადებულ ბიბლიას იესოშ გურშენ: „თიწკუმა იჸუაფუ იეჰოვაშ შური, სიბრძნეშ დო გაგებაშ შური, ზუკოლიშ დო ძალიერებაშ შური, რჩქინაშ  დო იეჰოვაშ შიშიშ შური; მოუჰამუანს თის იეჰოვაშ შიში. მეჯინათ ვა გასამართლენს დო ვართ ჸუჯიშ გუნაგონებუთ გიმაარგამენს. სამართლიანო გასამართლენს საწყალეფს დო სიმართლეთ გიმაარგამენს ხალხის დედამიწაშ ბაჩაჩია კათაშ გურშენ“ (ესაია 11:2—4). თე სიტყვეფშე ბგებულენთ, მუნერ სამართილიან დო ალმარინე მეფე იჸუაფუ იესო დედამიწაშ მაცხოვრებელ ხალხიშო. ქუგოკონო თეცალ მართველ რჸუნდასი?

8. მი იმეფენს იესოწკუმა ართო?

8 ღორონთიშ სამეფოშ გურშენ ხოლო ართ მუდგარენშა რე გური გაჩამალ: იესო ხვალე ვემართველენს. თიწკუმა ართო შხვა მართველეფ ხოლო იჸუაფნა. მაგალთო, მოციქულ პავლექ ტიმოთეს უწუ: „ქიფთვინენთ-და, ართო ხოლო იბმეფენთ“ (2 ტიმოთე 2:12). პავლე, ტიმოთე დო შხვა ართგურ ქრისტიანეფი იესოწკუმა ართო იმეფენა ზეციერ სამეფოს. მუსხი კოჩის მიაჩამუ თეშ საშვალება?

9. მუსხი იმართველენს იესოწკუმა ართო დო მუჟამს დიჭყ თინეფიშ გიშაგორუაქ?

9 მუჭოთ თე წიგნიშ მა-7 დუდის რდუ მოჩამილინ, მოციქულ იოანექ ძირუ „კირიბი [იესო ქრისტე] . . . სიონიშ გვალას [თიშ, მუჭოთ ზეციერ მეფეშ, მდგომარეობა] დო თიწკუმა ართო 144 000, ნამუსით ჸვას მიკოჭარნა თიშ სახელ დო თიშ მუმაშ სახელი“ (გამოცხადება 14:1, 4). თაქ რაგადი რე იესო ქრისტეშ ართგურ მიმაჸუნალეფშენ, ნამუთ ზეცას თიწკუმა ართო ქიმეფანი თიშო რენა გიშაგორილი. ზეციურ ცხოვრებაშო გათელებაშ უკულ თინეფ იჸუაფუნა „მეფეეფი . . . დედამიწაშ მართველეფი“ (გამოცხადება 5:10). მოციქულეფშე დოჭყაფილ, ღორონთი გიშმაგორუნს ართგურ ქრისტიანეფს თიშო, ნამდა თინეფიშ რიცხვიქ 144 000 ქიჸუას.

10. მუშენ ირაგადე, ნამდა იესოშ დო 144 000-იშ მართველო დორინაფათ ღორონთი კაცობრიობაშო ჸოროფას გიმოხანტუნს?

10 იესოშ დო 144 000 ქრისტიანიშ ზეციერ მართველო დორინაფათ ღორონთი კაცობრიობაშო ჸოროფას გიმოხანტუნს.  იესოს უჩქ, მუნერ რე ხალხიშ ცხოვრება დო მუ პრობლემეფს შეთმოხვადუნა თინეფი. პავლექ იესოშ გურშენ თქუ: „თიცალ მღვდელმთავარ ვა პუნა, ნამდა ვარჩქილედას ჩქინ სისუსტეეფი, თიქ ჩქინცალო ირფელს გიმიცადუ, ოღონდა ვეშუცოდებუნ ფერ რდუ“ (ებრაელები 4:15; 5:8). ქრისტეწკუმა მართველენან თინეფქ ხოლო გინიღეს დედამიწას ტანჯება დო განსაცდელი. ობრძოლუდეს არასრულყოფილებას დო მუჭოთ არძა კოჩინ თეშ, თინეფ ხოლო ილახებუდეს. შურო საეჭვო ვა რე, ნამდა თინეფს შეულებნა გურშა მიღან ხალხიშ პრობლემეფი.

მუს გაკეთენს ღორონთიშ სამეფო?

11. მუშენ თქუ იესოქ, ნამდა თიშ მოწაფეეფს ოკო ულოცებუდესკო ზეცას ღორონთიშ ნებაშ შესრულებაშ გურშენ?

11 იესოს მუშ მოწაფეეფშა ლოცვა ხვალე ღორონთიშ სამეფოშ მულაშ გურშენ ვა დუგურუაფუნ, თინა ხოლო დაგურუ, ნამდა ულოცებუდესკო ღორონთიშ ნებაშ შესრულებაშენ „მუჭოთ ზეცასინ, თეშ დედამიწას ხოლო“. ღორონთი ზეცას რე დო თიშ ნებას თექ ირო ასრულენა ართგურ ანგელოზეფი. მარა მა-3 დუდშე გებგით, ნამდა ართ-ართ უბადო ანგელოზიქ მიოტუ ღორონთიშ ნებაშ შესრულება დო ადამ დო ევა ცოდაშა ქიმიჸონ. მა-10 დუდის უმოსის ქიგებგენთ უბადო ანგელოზიშ გურშენ, ნამუსით სატანა ეშმაკი ჯოხო. ღორონთიქ სატანა დო დემონეფს, ანუ თი ანგელოზეფს, ნამუქით თის ელუდირთესინ, ზეცას მუსხირენ დროთ დოსკილადაშ ნება ქიმეჩუ. თავრეშე იძირე, ნამდა ზეცას არძა ვასრულენდ ღორონთიშ ნებას. მარა მდგომარეობა დითირუდ, მუჟამს ღორონთიშ სამეფო ქიდიჭყანდ მართველობას. იესო ქრისტე გამეფებაშ უკულ ხეთეშე ეჩხუპებუდ სატანას (წეკითხი გამოცხადებაშ 12:7—9).

12. ნამ ჟირ მნიშვნელოვან მოვლენა რე ეჭარილ გამოცხადებაშ 12:10-ის?

12 ბიბლიაშ ართ-ართ წინასწარნარაგადას ეჭარილ რე, მუქ ოკო მოხვადუკო: «ქიგებგონ ცაშე დიდ ხონარი: „ასე  ქუმორთ რსხებაქ ჩქინ ღორონთიშე, თიშ ძალიერებაქ დო სამეფოქ დო თიშ ქრისტეშ ძალაუფლებაქ, მუშენდა გითოჸოთამილქ იჸუ ჩქინ ჯიმალეფიშ ეკმაბრალებელქ [სატანაქ], ნამუთ ბრალს გედვანდ თინეფს ჩქინ ღორონთიშ წოხოლე დღაშ დო სერით!“» (გამოცხადება 12:10). ქუდეკვირიო თე ბიბლიურ მუხლის ეჭარილ ჟირ მნიშვნელოვან მოვლენას? პირველი: ღორონთიშ სამეფოქ, ნამუშ მანჯღვერალ ქრისტე რე, მართველობა ქიდიჭყუ. მაჟია: სატანაქ ზეცაშე დედამიწაშა იჸუ გითოჸოთამილქ.

13. მუქ მაჸუნ ზეცაშე სატანაშ გითოჸოთამას?

13 მუქ მაჸუნ შედეგო თე ჟირ მოვლენას? მუდგაქ ზეცას მოხვადუნ თიშ გურშენ ბიბლიას პკითხულენთ: „გოხიოლუდან, ზეცა დო თქვა, მით თექ მკვიდრენთინ!“ (გამოცხადება 12:12). ართგურ ანგელოზეფს უღუნა ხიოლიშ მიზეზ, მუშენდა სატანა დო თიშ დემონეფ ვა რენა ზეცას დო არძა სულიერ ქმნილება ღორონთიშ ართგურ რე. ზეცას მშვიდობა დო ჰარმონია მეფენს. თექ ღორონთიშ ნება ისრულებუ!

ზეცაშე სატანა დო მუშ დემონეფიშ გითორღვაფაქ დედამიწას ბრელ უბედრობა მოუღ, მარა თეს მალას მეღებუ ბოლო

14. მუქ მაჸუნ სატანაშ დედამიწაშა გითოჸოთამას?

14 მუ ირაგადე დედამიწაშ გურშენ? ბიბლია იჩიებ: „ვავა დიხას დო ზღვას, მუშენდა თქვანდა გიმილ ეშმაკიქ, მანგარ გაჟღამებულქ, მუშენდა უჩქ მუჭო ჭიჭე დრო აფუ დოსკილადირ“ (გამოცხადება 12:12). სატანა გაჟღამებულ რე, მუშენდა ზეცაშე რე გითოჸოთამილ დო ჭიჭე დრო აფუ დოსკილადირი. თის ირნერ უბედრობა ანუ „ვავა“ მოუღ დედამიწაშა. თეშ გურშენ უმოს მეტის ქიგებგენთ ანწიან დუდის. მუჟამს თე მდგობარეობას უჯინეთ, შილებე თეცალ კითხვაქ გომრჩქინდან: მუჭო შეასრულენს სამეფო ღორონთიშ ნებას დედამიწას?

15. მუ აფუ ღორონთის განზრახულ დედამიწაშო?

15 ქიგიშინ, მუ აფუ ღორონთის განზრახულ დედამიწაშო. მა-3 დუდის თეშ გურშენ რდუ რაგადი. ედემიშ ბაღის ღორონთიქ ქაძირუ მუშ განზრახვა, ნამდა თის ოკო დედამიწას  სამოთხე რდას დო მართალ კათაქ მარადიულო იცხოვრას. მარა სატანაქ ადამ დო ევა მიოჩილითუ. თეშ გურშენ ღორონთიშ განზრახვაშ შესრულებაქ გეგნიდუ, მარა თინა ვათირე. იეჰოვა კინ თი აზრიშ რე, ნამდა შესრულას სიტყვეფქ: „მართალეფი დემკვიდრენა დედამიწას დო მარადიულო იცხოვრენა თექ“ (ფსალმუნი 37:29). თეს ღორონთიშ სამეფო შეასრულენს. მუნერო მოხვადუ თენა?

16, 17. მუ ჭარუ დანიელიშ 2:44-ის ღორონთიშ სამეფოშ გურშენ?

16 ყურადღება ქიმიაქცი, მუ რე წინასწარნარაგადა დანიელიშ 2:44-ის: „თი მეფეეფიშ დროს ზეციერ ღორონთი დამყარენს სამეფოს, ნამუთ დღას ვაკოცენს. თე სამეფო შხვა ხალხის ვეგნაჩამუ. თინა მოსპუნს არძა თე სამეფოს, დო მუ მარადიულო გერდას იჸი“. მუს ბგებულენთ თავრეშე ღორონთიშ სამეფოშენ?

17 პირველი: სამეფოქ ოკო დემყარკო „თი მეფეეფიშ დროს“ ანუ თიმწკუმა, მუჟამს შხვა სამეფოეფი დიო ხოლო იარსებენდეს. მაჟია: თე სამეფოქ მარადიულო ოკო იარსებას. თიშ ადგილს დღას ვედეკინენს შხვა მთავრობა. მასმა: ჩქი ბძირუნთ, ნამდა იჸუაფ ჩხუპი ღორონთიშ სამეფო დო თე ქიანაშ სამეფოეფ შქას. თე ჩხუპის ღორონთიშ სამეფო მიგენს დო ბოლოს, კაცობრიობას, არძაშ უჯგუშ დო დღას ვანოჸვენ ფერ ართ მთავრობა აჸვენუ!

18. მუ ჯოხო ღორონთიშ სამეფო დო თე ქიანაშ მთავრობეფ შქას ჩხუპის?

18 ბიბლიაშე ბრელს ბგებულენთ ღორონთიშ სამეფო დო ამდღარ ქიანაშ მთავრობეფ შქას ჩხუპიშ გურშენ. მაგალთო, თინა მოგურუანა, ნამდა აღსასრულ მონჭაფილ იჸინ თი დროს, უბადო შურეფი ტყურას მოდვანა „მთელ ქიანაშ მეფეეფიშ“ ოჩილითაფარო. მუ რე თეშ მიზან? „ოჩხუპებელო აკოშაყარუან თინეფი [მეფეეფი] ირფელიშ შემალებე ღორონთიშ დიდ დღას“. დედამიწაშ მეფეეფი გეკიშაყარუნა თი „ადგილს, ნამუსით ებრაულო არმაგედონ ჯოხო“ (გამოცხადება 16:14, 16). თე ჟირ მუხლიშე იძირე, ნამდა  თე ქიანაშ მთავრობეფ დო ღორონთიშ სამეფო შქას ჩხუპის „არმაგედონ“ ჯოხო.

19, 20. მუ ოცილ ამდღა დედამიწას ღორონთიშ ნებაქ შესრულასინ?

19 მუს მიოჭირინუანს ღორონთიშ სამეფო არმაგედონიშ ჩხუპით? ხოლო ართშა დეფიქრი, მუ აფუ განზრახულ ღორონთის დედამიწაშო. ღორონთიშ განზრახვა რე, ნამდა სამოთხეცალ დედამიწას იცხოვრან მართალ დო სრულყოფილ ხალხიქ დო ემსახურან თის. მუ ოცილ ამდღა თექ ქიჸუასინ? პირველ რიგის თინა, ნამდა ჩქი ცოდამეფ ვორეთ, ათეშგურშენ იბლახებუთ დო ბღურუთ. თე წიგნიშ 5 დუდშე გებგით, ნამდა იესოქ ჩქი მარადიულო მიცხოვრებდესკონ თიშენ ღურუ. ალბათ, ქორშუ იოანეშ სახარებას ინოჭარილ სიტყვეფი: „ღორონთიქ თეშ ქიჸოროფუ ქიანა, ნამდა ქიმეჩ მუშ ხვალეგუნაჭყეფ სქუა, თიშენ ნამდა, მიდგას თინა წანსინ, ვა ღურას, მარადიულ სიცოცხლე უღდას“ (იოანე 3:16).

20 მაჟია მიზეზ თინა რე, ნამდა ამდღა ბრელ უბადოშ მასხუნალ კათა არსებენს. თინეფ ტყურას აღორენა, ქვირთოსანეფ რენა დო უწესო ცხოვრებას მეჸუნა. თინეფს ვაკონა ღორონთიშ მოსაწონო ცხოვრება. უბადოშ მაკეთებელ კათა ღორონთიშ ჩხუპის, არმაგედონს გენადგურებნა (წეკითხი ფსალმუნიშ 37:10). ხოლო ართ მიზეზ, მუშ გურშენ ვესრულებ ღორონთიშ ნება დედამიწას, თინა რე ნამდა, მთავრობეფ ხეს ვა უნწყუნა თეს. ბრელ მთავრობას ვა უღუ უნარი მუშ ოკეთებელ გაკეთასინ. ნამთინე სასტიკ დო კორუმპირებულ რე. ბიბლიას პირდაპირ ინოჭარ: „კოჩ კოჩის ონძალ თიშ საზიანოთ“ (ეკლესიასტე 8:9).

21. მუჭო შეასრულენს სამეფო იეჰოვაშ ნებას დედამიწას?

21 არმაგედონიშ უკულ კაცობრიობას ხვალე ართ მთავრობა აჸვენუ. თინა ღორონთიშ ნებას შეასრულენს დო ბრელ ხვამას მიღანს. მაგალთო, თინა მაშორენს ხალხის სატანა დო დემონეფს (გამოცხადება 20:1—3). იესოშ მსხვერპლ ართგურ კათას ჯგირობუას მუღანს — თინეფ დღას ვედელახებნა  დო ვა ღურნა. ღორონთიშ სამეფოშ მართველობაშ დროს ხალხი მარადიულო იცხოვრებ (წეკითხი გამოცხადებაშ 22:1—3). დედამიწა სამოთხეთ გინირთუ. თაშ ნამდა, სამეფო შეასრულენს იეჰოვაშ ნებას დედამიწას დო განწმინდენს თიშ სახელს. მუს ნიშნენს თენა? ბოლოს არძა განადიდენს ღორონთიშ სახელს.

მუჟამ დიჭყ ღორონთიშ სამეფოქ მართველობა?

22. სოვრეშე მიჩქუნა, ნამდა ღორონთიშ სამეფოს ვა მურთუმ იესო დედამიწას რდუნ თი დროს დო ვართ ზეცაშა იდუნ თიმწკუმა ხეთეშე?

22 იესოქ მუშ მიმაჸუნალეფს დაგურუ, ულოცებუდესკო ღორონთიშ სამეფოშ მოულაშენ. თავრეშე ჯგირო იძირე, ნამდა ღორონთიშ სამეფო თი დროს დიო ვარდ მოულირი. მორთუო თე სამეფოქ ხეთეშე თი დროს, მუჟამს იესოქ ზეცაშა იდუნ? ვარ, მუშენდა პეტრე დო პავლე მოციქულეფქ თქუესინ თეშ, გათელებულ იესო ქრისტეშა შესრულ ფსალმუნიშ 110:1-ს ინოჭარილ წინასწარნარაგადაქ: «იეჰოვაქ ჩქიმ უფალს უწუ: „დოზოჯ ჩქიმ მორძგვშე, სოიშახ სქან ნტერეფს სქან კუჩხიშ თუდო ვეთოირაგუანქ“» (საქმეები 2:32—35; ებრაელები 10:12, 13). თაშ ნამდა, მუსხირენ დროქ ოკო გემკორთუკო.

ღორონთიშ სამეფო შეასრულენს იეჰოვაშ ნებას დედამიწას ხოლო, მუჭოთ ზეცას ისრულებუნ თეშ

23. ა) მუჟამ დიჭყუ ღორონთიშ სამეფოქ მართველობა? ბ) მუს გებგენთ ანწიან დუდშე?

23 მუსხი ხანქ ოკო მიკორთუკო ღორონთიშ სამეფოშ მულაშახ? მა-19 დო მა-20 საუკუნეეფს ბიბლიაშ ალალგურიშ მარკვიებელეფქ გიმოთვალეს, ნამდა თე პერიოდიქ 1914 წანას  ოკო გეთუკო (ქოძირით გეძინელ თემეფი „1914 წანა — მნიშვნელოვან თარიღი“). 1914 წანას მოხვალამირ მოვლენეფქ დამტკიც, თინეფ ვაჩილათენან. ბიბლიურ წინასწარნარაგადუეფიშ შესრულება ოძირანს, ნამდა 1914 წანას ქრისტექ გინირთ მეფეთ დო თიქ ქიდიჭყუ ღორონთიშ სამეფოშ მართველობა. თავრეშე ვორწყეთ, ნამდა ფცხოვრენთ დროშ თი ჭიჭე პერიოდის, ნამუთ სატანას აფუ დოსკილადირ (გამოცხადება 12:12; ფსალმუნი 110:2). შემლებნა ბჯერდან, ღორონთიშ სამეფო მალას ირფელს გაკეთენს, დედამიწას ღორონთიშ ნება შეასრულას თიშენ. ქუგოხიოლუნო თე ამბე? ქორჯერსო თენა? ანწიან დუდს ქობძირუნთ, მუჭო ბიბლია მართალო ოგურუანს თეს.