ჩქი, იეჰოვაშ მოწმეეფ, არძას ჸოროფათ, გემუანო დო პატიცემათ ვოქცუთ. ნამდგაინ იეჰოვაშ მოწმე ღორონთიშ მსახურებას ჯვეშობურო ვაცად ვარდა გვალო მიოტენს-და, ირნერო ვოცადუთ, ნამდა ქუვოგინაფუათ ჩქინ ჸოროფა დო ქიმვეხვარათ, კინ დართას ღორონთიშ მსახურებას (ლუკა 15:4–7).

 მარა ნამთინე შემთხვევას პიროვნებაქ შილებე თიცალ მუდგარენ გაკეთას, ნამდა კრება ქუდატებაფუან (1 კორინთელეფ 5:13). თექ ვა მოხვადასინ, ირნერო ვოცადუთ, თეიშახ ქიმვეხვარათ თის, მუშენდა მანგარო მიჸორა ჩქინ თანაქრისტიანეფ. მარა თექ იშენით ქუმოხვად დო კრებას ვედიტუეს-და, ჩქი კინ ჸოროფათ დო პატიცემათ ვოქცუთ თის, მუჭოთ თეს ბიბლიაშე ბგურაფლენთ (მარკოზ 12:31; 1 პეტრე 2:17).

მუშ გურშენ შილებე პიროვნებას კრება ქუდატებაფუან?

 ბიბლია პირდაპირ იჩიებ, ნამდა პიროვნება სერიოზულო შეცოდენს დო დაშებულს ვა ნარღენს-და, კრება ოკო ქუდატებაფუან a (1 კორინთელეფ 5:11–13). თექ კონკრეტულო ენოჭარ, მუ რე თი სერიოზულ ცოდეფ, მუდგაშ გურშენ შილებე თექ ქუმოხვადას. მაგალთო, თენეფ რე უზნეობა, შუმილიობა, კოჩიშ ჸვილუა, ძალადობა დო ხირუა (1 კორინთელეფ 6:9, 10; გალატელეფ 5:19–21; 1 ტიმოთე 1:9, 10).

 მარა სერიოზულო შეცოდუნ თი პიროვნებას კრებას პირდაპირ ვატებაფუანა. კრებაშ უხუცესეფ b დიო ირნერო ოცადუნა, ქიმეხვარან თის გიშასწორებას (რომაელეფ 2:4). თინეფ თეცალ კოჩის მთელ გურით, ჸოროფათ დო გემუანო მეურენა (გალატელეფ 6:1). თექ შილებე შემცოდველს მეხვარას, ქუგოხვადას, მუ აფჷ დაშებულ დო ინარღას (2 ტიმოთე 2:24–26). მარა, თე ირფელიშ უმკუჯინუო, თინა იშენით ქაგრძელენს ბიბლიურ ნორმეფიშ გინორთას დო დაშებულს ვა ნარღენს-და, კრებას ოკო ვედიტუან. თეშ უკულ უხუცესეფ კრებას უბრალოთ გეგმაცხადენა, ნამდა თე პიროვნება მეტო ვა რე იეჰოვაშ მოწმე.

 მუშენ რე ჯგირ, მუჟამსით დაშებულს ვა ნარღენსინ ფერ პიროვნებას კრებას ოტებაფუანა? ართ თიშენ, ნამდა თეთ კრება მეჸუნს ღორონთიშ მაღალზნეობრივ ნორმეფს დო თხილერ რე თე პიროვნებაშ გლახა გავლენაშე (1 კორინთელეფ 5:6; 15:33; 1 პეტრე 1:16). თეს გეძინელ, თე გადაწყვეტილებაშ უკულ შემცოდველქ შილებე ინარღას დაშებულ დო გეგნოჭყვიდას, დითირას (ებრაელეფ 12:11).

მუჭო ოქცუნა იეჰოვაშ მოწმეეფ თინეფს, მიდგას კრებას ოტებაფუანა?

 თიცალ ადამიანეფიშ გურშენ, მიდგას კრებას ოტებაფუანა, ბიბლიას ჭარჷ: „მეტო ვაიღუდან ურთიერთობა . . . თეცალეფწკუმა ართო ოჭკუმალ ხოლო ვა ჭკუმათ“ (1 კორინთელეფ 5:11). თაშ ნამდა, მართალ რე, ჩქი ვა მიღუნა ურთიერთობა თიწკუმა, მიდგას კრება ქუდატებაფუეს, მარა თენა თის ვა ნიშნენს, ნამდა გვალო ვაიგნორენთ თის. თეცალ პიროვნებას პატიცემათ ვოქცუთ დო მთელ გურით ბღებულენთ რელიგიურ შეხვალამეფშა, სოდეთ ნამთინე იეჰოვაშ მოწმექ შილებე ისხუნუას, ნამდა გამარჯობა ქოუწუას თის. c კრება დატებაფუესინ თი პიროვნებას კრებაშა დორთა ქაკონ-და, თინა ხოლო შეულებ, ნამდა უხუცესეფს მოხვარა ქოთხუას.

 მუ ხვადუ თიმწკუმა, მუჟამსით პიროვნებას კრებას ვეტენა, მარა თიშ მეუღლე დო არასრულწლოვან სქუალეფ იეჰოვაშ მოწმეეფ რენა? მართალ რე, თინა მეტო ვამსახურ იეჰოვას მუშ ოჯახწკუმა ართო, მარა, მუშო ოკო რაგად, თინეფ ჯვეშობურო გაგრძელენა ურთიერთობას დო ართიანშა ჸოროფათ მოქციებას.

 პიროვნებას, ნამდგას კრება დატებაფუეს, შეულებ, უხუცესეფს ქოთხუას, ქეშეხვადან. თინეფ თის ჸოროფათ ქიმეჩანა ბიბლიურ რჩევას დო გემუანო ქელუჩანა, ინარღას დაშებულ დო დართას ღორონთის (ზაქარია 1:3). მუჟამსით თინა დითირუ დო ქაძირანს, ნამდა მართალო ოკო ბიბლიურ ნორმეფით ცხოვრება, შეულებ, კინ დირთას კრებაშა. კრება მთელ გურით ქაპატიენს თის დო გურშა გეუქექუანს, მუჭოთ თენა კორინთელ ქრისტიანეფქ აკეთეს, მუჟამსით შემცოდველქ ინარღჷ დაშებულ დო დირთჷ კრებაშა (2 კორინთელეფ 2:6–8).

მუს იჩიებუნა თინეფ, მიდგას ულირს კრება დატებაფუეს

 დეკვირით, მუს იჩიებ ნამთინე იეჰოვა მოწმე, მიდგას ულირს კრება დატებაფუეს დო უკულ კინ დართჷ ღორონთის:

 „თიშ უკულ, მუთ კრებაშა დორთა გეგნოპჭყვიდ, ფიფქრენდჷ, უხუცესეფ ირფელს გექთოპკითხენდეს, მუს ვორთუდ თი წანეფიშ დინახალე, მუჟამსით კრებას ვა ვორდჷ. მარა თინეფქ მიწუეს, მთელ ყურადღება თიშა გეგნიბღიკო, ასე მუს გუვაკეთენდჷ. თე სიტყვეფიშ მორჩქილაფაქ შურ მომიდგჷ“ – მარია, შეერთებულ შტატეფ.

 „კრებას შურ ოლუდ ჩქიმ დორთაშა, დუდ მანგარ დაფასებულო იბგინ. ჩქიმ სულიერ და დო ჯიმალეფქ ქუმოგინაფუეს, ნამდა ქოთ იეჰოვას დო ქოთ მუნეფს პატიებულ აფუდეს ჩქიმდა. თექ მიმეხვარ ულირშე ნაბეტან ვეპწუხიკო დო მთელ ყურადღება მომავალშა გეგნიბღიკო. უხუცესეფ ხოლო ირო მზათ რდესჷ ჩქიმ მახვარებელო. თინეფ გურშა ელამკინანდეს დო მარწმუნენდეს, ნამდა იეჰოვას უჸორქ დო ძვირფას ვორექ თიშო“ – მალკომ, სიერა-ლეონე.

 „მოხიოლ, ნამდა იეჰოვას თეშმანწარას უჸორს მუშ ხალხ დო თაშ ოცად, მუშ ორგანიზაციას სიწმინდე რდასჷ. პიროვნებას კრებას ოტებაფუანან თენა, მიმაჯინუ თოლშო შილებე ნაბეტან ჸინჩ მერნათ იძირედას, მარა სინამდვილეს თეშ კეთება საჭირო დო ჸოროფაშ მაძირაფალ ხოლო რე. მანგარ მარდულ ვაფუქ ჩქინ ზეციერ მუმას, მით თეცალ ჸოროფათ მომრენა დო მზათ რე პატიებაშო“ – სანდი, შეერთებულ შტატეფ.