ნამ საშვალებეფ მიგეხვარებნა, ბიბლიაშ კითხირ თქვანო სასიამოვნო პროცესწკუმა ართო სასარგებლო ხოლო რდას? ყურადღება ქიმიაქცით თუდო მოჩამილ ხუთ რჩევას, ნამდგაშ გიმორნაფათ ბრელქ ქიმიოჭირინუ თე მიზანს.

გეგშაგორით შესაფერის ადგილ. ბიბლიაშ ოკითხეთ დოგორით თიცალ ადგილ, სოდეთ სიწყნარე რე, ნამდა შეგალებუან ყურადღება გეგნიღათ ნაკითხირშა. თეს გეძინელ, ჯგირ განათება დო სუფთა ჰაერ მიგეხვარებნა, სარგებელ მიღათ ნაკითხერშე.

გიღდან ჯგირ განწყობა. ბიბლია ძღვინ რე ჩქინ ზეციერ მუმაშე. ათეშენ, ნაკითხერშე სარგებელს მიღენთ, მუჟამსით გაღვენუნა თიცალ განწყობა, მუნერით ჭიჭე ბაღანას უღჷ, ნამუთ მზათ რე, დიგურუას მუშ მოჸოროფე მშობელშე. ბიბლიაშ გურშენ წინასწარ შექმნილ არასწორ დამოკიდებულება ქოიღუნან-და, ქეცადით ჩეთხინუათ თინა, ნამდა ღორონთიქ მიგეხვარან, ქინანჭათ ნაკითხირს (ფსალმუნი 25:4).

კითხირიშ დოჭყაფაშახ ქილოცით. ბიბლიას ღორონთიშ აზრეფ რე ინოჭარილ, ათეშენ გასაკვირ ვა რე, ნამდა ნაკითხირიშ ინანჭაფალო ღორონთიშ მოხვარა მოსაჭირნა. ღორონთ მოპირნა, ნამდა ქომჩანა „წმინდა შურს“, მუჟამსით ფთხინთ (ლუკა 11:13). წმინდა შურ მიგეხვარებნა, ქიგეგათ ღორონთიშ აზრეფ დო დროშ მიკულაწკუმა ართო, თინა მიგეხვარებნა, ქინანჭათ ღორონთიშ სიტყვაშ სიტომბეეფს ხოლო (1 კორინთელები 2:10).

დეფიქრით ნაკითხირშე. ეცადით, ზერელეთ ვეკითხათ. თეშ გინაწონს, დეფიქრით თიშე, მუდგას კითხულენთ. ქოკითხით თქვან დუდის: ნამ თვისებეფს ვორწყექ თი პერსონაჟის, მიდგაშ გურშენ ბკითხულენქ? მუჭო შემლებ ნაკითხირიშ ცხოვრებას გიმორნაფა?

დესახით კონკრეტულ მიზნეფ. ბიბლიაქ ჯგირობუა ქუმოიღანინ, თიშ კითხირიშ დროს მიზანო გიღდან, ქიდიგურუათ თინა, მუთ გაუჯგუშენს თქვან ცხოვრებას. შეილებნა მიზანო გიღდან, ქიგეგათ უმოს მეტ ღორონთიშ გურშენ, გინირთათ უჯგუშ პიროვნებათ დო უჯგუშ მეუღლეთ. თეშ უკულ, გეგშაგორით ბიბლიაშ თიცალ მონაკვეთ, ნამუთ მიგეხვარებნა თე მიზნეფიშ მენჭირნაფას. *

თაქ გარჩიებულ ხუთ რჩევა მიგეხვარებნა, ქიდიჭყათ ბიბლიაშ კითხირ. მარა, მუჭო შეილებნა თე პროცეს უმოს საინტერესოთ გინაშქვათ? უკულიან სტატიას გარჩიებულ იჸუაფ ნამთინე რჩევა.