წმინდა წერილეფქ, ნამუთ ღორონთიშ სიტყვა რე, ებრაულ, არამეულ დო ბერძნულ ნინეფშა იჭარ. ღორონთიშ სიტყვაშე ჯგირობუა „არძაქ“ მიღასინ, თიშ თარგმნუა ბრელ ნინაშა რე საჭირო (მათე 24:14). 27 წიგნის, „მათეშე“ დოჭყაფილ „გიმოცხადებათ“ თებულ, „ქრისტიანულ-ბერძნულ წერილეფ“ ჯოხო, მუშენდა თინეფ პირველ საუკუნეს ღორონთიქ ქრისტიანეფს ბერძნულ ნინაშა ოჭარაფუ.

„ქრისტიანულ-ბერძნულ წერილეფიშ ახალ ქიანაშ თარგმანქ“ პირველო 1950 წანას ინგლისურ ნინაშა გიშართჷ. თინა უმენტაშო გერსხილ რე, მანგარ ცნობილ უესტკოტ დო ჰორტიშ ბერძნულ ტექსტეფშა, ნამუთ არძაშ უმოს ჯვეშ ბერძნულ ხეშნაჭარეფს მეურე. „ახალ ქიანაშ თარგმან“ მუთ შილებენ ზუსტას მეჸუნს ბერძნულ ტექსტის. თე მარგალურ თარგმან გერსხილ რე 2013 წანაშ ინგლისურ გიშაშქუმალაშა დო თინა ხოლო ზუსტას მეჸუნს ორიგინალ ტექსტის.

„ქრისტიანულ-ბერძნულ წერილეფიშ ახალ ქიანაშ თარგმანს“ ღორონთიშ დიდებულ სახელ, იეჰოვა, 237-შა რე მოშინაფილ. ღორონთიშ სახელიშ განწმენდა მანგარ მნიშვნელოვან რე დო გინასქილიდაფარო არძა ოკო შინანდას თიშ სახელს, ათეშენ, „წმინდა წერილეფიშ“ თე თარგმანს ღორონთიშ სახელ იეჰოვა დორთინაფილ რე არძა საჭირო ადგილს (მათე 6:9; რომაელეფ 10:13).

სახელ „ახალ ქიანაშ თარგმან“ გერსხილ რე ღორონთიშ დუნაპირებშა, ნამდა იჸუაფ სამართლიან ახალ ქიანა, სოდეთ არძა მიღენს ხვამას (2 პეტრე 3:13). თე გიშაშქუმალაშ მათარგმნალეფს უჸორა ღორონთ, წმინდა წერილეფიშ ავტორ, დო თიშ წოხოლე განსაკუთრებულ პასუხიშმგებლობას გინაფლენა, ნამდა თიშ აზრეფქ დო მითითებეფქ მუთ შილებენ ზუსტას იჸუას გინოჩამილქ. ბლოცულენთ, ნამდა თე თარგმანქ ქიმეხვარას ალალგურიშ ხალხის, მით ოცად, „სიმართლეშ ზუსტ რჩქინა მიღას“ (1 ტიმოთე 2:4).