პეტრეშ პირველ წერილ 5:1-14
5 უხუცესეფ, თქვანცალ უხუცესის ჩქიმ თოლით მაფჷ ნაძირეფ ქრისტეშ ტანჯება დო თქვანწკუმა ართო მიბღენქ დიდებას თიშ გიმოცხადებაშ დროს, ათეშენ ელაიჩანთ:
2 მუჭოთ ზედამხედველეფქ, დოჭყიშეთ თქვანდა მებარებულ ღორონთიშ შხურ. თენა ნანძალუო ვარინ, შურ დო გურით აკეთით, მუჭოთ ღორონთის ოკო; ჰარამობათ მუდგარენიშ შიბაშ გურშენ ვარინ, ალალ გურით.
3 ვეუნჩაშათ თინეფს, მით ღორონთის ოკუთვნ, თეშ მანგიორო მაგალით რდათჷ შხურშო,
4 დო, მუჟამსით უნჩაშ ჭყიშ ქუმურს, მიღენთ დიდებაშ გვირგვინს, ნამუთ დღას ვეგლელებ.
5 თქვა ხოლო, ახალგაზრდეფ, ქურჩქილით უნჩაშ კათას. არძაქ თანდაბლურო მექცით ართიანს. მუშენდა ღორონთ დუდძირგალეფს ოწინააღმდეგ, მარა თანდაბალეფს იჭყოლოფუანს.
6 თანდაბლურო დემორჩილით ღორონთიშ ძალიერ ხეს, ნამდა მუშ დროს ქიმერჩან დიდება,
7 დო არძა თქვან ოწუხებელ თის გეგნოჩით, მუშენდა თინა ზრუნენს თქვანდე.
8 თოლ ვემკოდვათ დო კურცხას რდათჷ! თქვან ნტერ, ეშმაკ, გილესოფუ მუჭოთ მაღირთალ ლომ დო გორუნს, მი გინოყინტას.
9 მანგარას ქეწუდირთით თის ძალიერ რწმენათ, მუშენდა გიჩქუნა, ნამდა თქვანცალ ოტანჯებელს თქვან საჯიმალო ხოლო ხვადუ მთელ ქიანას.
10 ჭიჭე ხანს დეტანჯებუთ, მარა უკულ, ირნერო მოჭყოლოფე ღორონთ, მიდგაქ ქრისტეწკუმა ართო სადღამუშო დიდებაშო გიშარგორეს, გათენს თქვან მომზადებას. თინა ძალას ქიმერჩანა, გუგამანგარენა დო ქიმგეხვარებუნა, ნამდა ბოლოშახ ართგურეფ რდათჷ.
11 თიშ რე ძალა სადღამუშოთ! ამინ!
12 სილვანუსიშ* ხეთ, მით ჩქიმ თოლს ართგურ ჯიმა რე, მუსხირენ სიტყვა მორჭარით, მუშენდა გურშა ელაიკინითკო დო დუგარწმუნითკო, ნამდა ღორონთიქ მართალო გიჭყოლოფუეს. მუთუნით ვეჩეთხუათ თე ჭყოლოფას!
13 ბაბილონშე მოკითხვას გიჩინანა თინა*, მით თქვანცალო გიშაგორილ რე; მოკითხვას გიჩინანა ჩქიმ სქუა მარკოზ ხოლო.
14 ჸოროფათ* ქეშეხვადით ართიან.
მშვიდობა ვა მორრკებუდან მითინს, მით ქრისტეწკუმა ართობას რეთჷ!
