Impendulo esuka eBhayibhileni

 IBhayibhile ithi uThixo ufuna ukusinika “ithemba nekamva.” a (Yeremiya 29:11) Esinye isizathu esibangela ukuba uThixo asinike iBhayibhile kukuba ufuna “ukunyamezela kwethu nokuthuthuzelwa ziZibhalo kusincede sibe nethemba.” (Roma 15:4) Njengokuba siza kubona, iBhayibhile isinika amacebiso ukuze sibe nethemba, size sikwazi ukulungisa iingxaki zethu zemihla ngemihla njengokuba isithembisa ngekamva elihle.

Kweli nqaku

•  IBhayibhile isenza njani sibe nethemba?

•  Leliphi ithemba iBhayibhile elinika abantu?

•  Iivesi zeBhayibhile ezithetha ngethemba

 IBhayibhile isenza njani sibe nethemba?

 Isichazela izinto esimele sizenze ukuze siphucule ubomi bethu, ize loo nto isenze sibe nethemba. Makhe sijonge eminye imizekelo.

•   Funda iBhayibhile ukuze ufumane amacebiso. INdumiso 119:105 ithi: “Ilizwi lakho lisisibane ezinyaweni zam, nokukhanya endleleni yam.” Isibane esikhanya kakuhle singasinceda senze izinto ezimbini. Singasinceda sikwazi ukubona into ekufutshane, nento ekude. Ngendlela efanayo, imigaqo yeBhayibhile iyasinceda sikwazi ukuzilungisa ngokukhawuleza iingxaki esinazo, size sibe nethemba yonke imihla. Izinto esizifunda eBhayibhileni zingasipha amandla zize ‘zivuyise intliziyo.’ (INdumiso 19:7, 8) Enye into, iBhayibhile isichazela ngezithembiso zikaThixo ezimangalisayo ngomhlaba nangekamva labantu. Elo themba lingasinika uvuyo olungapheliyo nokwaneliseka.

•   Vumela abanye ukuba bakuncede. Xa sineengxaki ibe singenathemba, sisenokuzibhekelisa kwintsapho nakubahlobo. IBhayibhile ithi ayibobulumko ukwenza loo nto, kuba singaphela sele singazenzi kakuhle izinto. (IMizekeliso 18:1) Abantu abasithandayo bangakwazi ukusinceda sicinge kakuhle. Bangakwazi nokusicebisa ngendlela esinokumelana ngayo neengxaki esinazo. (IMizekeliso 11:14) Enye into abanokuyenza kukusithuthuzela, basonwabise, basiphe namandla okunyamezela de izinto zibe bhetele.—IMizekeliso 12:25.

•   Thandaza kuThixo. IBhayibhile ithi: “Wuphosele kuYehova umthwalo wakho, yena uza kukuxhasa. Soze avumele ilungisa liwe.” b (INdumiso 55:22) UYehova ubizwa ngokuba “nguThixo onika ithemba.” (Roma 15:13) Ungathandaza kuye umxelele ‘onke amaxhala onawo,’ uqinisekile ukuba ukukhathalele. (1 Petros 5:7) Kwakhona iBhayibhile ithi: “Uza kuniqinisa, anomeleze, aze anenze nizinze.”—1 Petros 5:10

•   Zinyamezele iingxaki ukuze ziqinise ithemba lakho. IBhayibhile ithembisa ithi: “Umntu ondimamelayo [mna Thixo] uza kuhlala ekhuselekile, aze angaphazanyiswa kukoyika intlekele.” (IMizekeliso 1:33) Xa inkanyamba yahlasela indlu yelinye ibhinqa laseOstreliya elinguMargaret, lalahlekelwa zizinto ezininzi. Endaweni yokuba likhathazeke kakhulu, lafunda isifundo esibalulekileyo sokuba izinto esinazo zezokwexeshana. Emva koko lazimisela ukujonga izinto ezibalulekileyo, intsapho, abahlobo, ukukhonza uThixo namathemba aseBhayibhileni.—INdumiso 37:34; Yakobi 4:8.

 IBhayibhile ibathembisa ntoni bonke abantu?

 IBhayibhile ithembisa umhlaba uza kulungiswa, nabantu baza kuphila kamnadi. Ibe elo themba sele liza kwenzeka. Ngokwenene, iingxaki abantu abajongene nazo namhlanje zibonisa ukuba siphila ‘kwimihla yokugqibela’ yeli hlabathi. (2 Timoti 3:1-5) Ngokukhawuleza uThixo uza kukuphelisa ukungabi nabulungisa nezinto ezibuhlungu. Le nto uza kuyenza ngorhulumente obizwa ngokuba buBukumkani bukaThixo. (Daniyeli 2:44; ISityhilelo 11:15) UYesu wayecinga ngalo rhulumente wasezulwini xa wayethetha amazwi kumthandazo wakhe ongumzekelo: “Mabufike uBukumkani bakho. Makwenzeke nasemhlabeni ukuthanda kwakho.”—Mateyu 6:9, 10.

 UThixo uyicacisa kakuhle injongo yakhe eBhayibhileni. Nazi iingxaki eziza kupheliswa buBukumkani bukaThixo:

•   Indlala iza kuphela. “Umhlaba uza kuvelisa isiqhamo sawo.”—INdumiso 67:6.

•   Izifo ziza kuphela. “Akakho umhlali wakhona oza kuthi: ‘Ndiyagula.’”—Isaya 33:24.

•   Ukufa kuza kuphela. UThixo “uza kuzosula zonke iinyembezi emehlweni [abantu], kungabi sabakho kufa, kungabi sabakho kuzila nakukhala nantlungu. Izinto zangaphambili azisekho.”—ISityhilelo 21:3, 4.