I-Accessibility setting

Khetha ulwimi

Yiya kwelilandelayo

Yiya kwiziqulatho

Yiya kwinkcazelo

AmaNgqina KaYehova

IsiXhosa

Ngoobani Abenza Ukuthanda KukaYehova Namhlanje?

 Isifundo 7

Zinjani Iintlanganiso Zethu?

Zinjani Iintlanganiso Zethu?

ENew Zealand

EJapan

EUganda

ELithuania

Kwiintlanganiso zamaKristu enkulungwane yokuqala kwakuculwa, kuthandazwa, kufundwa kuze kuxutyushwe iZibhalo,—akwenziwa zithethe. (1 Korinte 14:26) Unokulindela into enjalo nakwiintlanganiso zethu.

Zifundisa izinto eziseBhayibhileni nezisebenzisekayo. Mpela-veki nganye, ibandla liphulaphula intetho yesidlangalala yemizuzu engama-30 ebonisa indlela esimele sizisebenzise ngayo iZibhalo ebomini bethu nakumaxesha esiphila kuwo. Sonke sikhuthazwa ukuba sityhile iiBhayibhile zethu. Emva koko, kubakho iSifundo se-“Mboniselo” apho kufundwa inqaku elikuhlelo lokufundisa kangangeyure baze abantu abasebandleni bagqabaze. Le ngxubusho iyasinceda sikwazi ukusebenzisa ulwalathiso lweBhayibhile ebomini bethu. Kufundwa inqaku elifanayo kumabandla angaphezu kwali-100 000 asehlabathini lonke.

Zisinceda siphucule ubuchule bethu bokufundisa. Siphinda sihlanganisane kwintlanganiso eba ngorhatya phakathi evekini ukuze siphulaphule ucwangciso oluneenxalenye ezintathu. uqala iSifundo SeBhayibhile Sebandla semizuzu engama-30, ingxubusho yemibuzo neempendulo esenza siyiqonde ngakumbi imigaqo yeZibhalo neziprofeto zeBhayibhile. Kulandela iSikolo Sobulungiseleli Sobuthixo semizuzu engama-30 esiqalisa ngeendinyana ezithile zeBhayibhile ezilungiselelwe libandla kusengaphambili. Bandule ke abafundi ababhalise esikolweni banikele iintetho ezimfutshane. Umqhubi wesi sikolo uphulaphula ngenjongo yokuba abancede baphucule indlela abafunda nabathetha ngayo. (1 Timoti 4:13) Okokugqibela, kubakho iNtlanganiso Yenkonzo yemizuzu engama-30, apho kubakho iintetho, imiboniso nodliwano-ndlebe, apho siboniswa khona indlela yokufundisa abantu iBhayibhile.

Xa usezintlanganisweni zethu, ngokuqinisekileyo uya kuyithanda indlela efundiswa ngayo iBhayibhile.—Isaya 54:13.

  • Yintoni onokuyilindela kwiintlanganiso zamaNgqina kaYehova?

  • Ungathanda ukuya kweziphi iintlanganiso zethu eziqhutywa veki nganye?

Funda Okungakumbi

Yintoni Eyenzekayo EHolweni YoBukumkani?

Khawukhe ungene ngaphakathi.

Alungelelaniswe Njani Amabandla AmaNgqina KaYehova?

Funda ngendlela esalathiswa nesiyalelwa ngayo ebandleni.