I-Accessibility setting

Khetha ulwimi

Yiya kwelilandelayo

Yiya kwiziqulatho

Yiya kwinkcazelo

AmaNgqina KaYehova

IsiXhosa

Iindaba Ezilungileyo Ezivela KuThixo!

 Isifundo 2

Ngubani UThixo?

Ngubani UThixo?

1. Kutheni sifanele sinqule uThixo?

UThixo wenyaniso nguMdali wezinto zonke. Akanasiqalo, engasoze abe naso nesiphelo. (INdumiso 90:2) UnguMthombo weendaba ezilungileyo eziseBhayibhileni. (1 Timoti 1:11) Ekubeni uThixo esinike ubomi, sifanele sinqule yena yedwa.—Funda iSityhilelo 4:11.

2. Unjani uThixo?

Akakho umntu owakha wambona uThixo kuba unguMoya, nto leyo ethetha ukuba ubomi bakhe buphakame ngaphezu kwaso nasiphi na isidalwa esiphila emhlabeni. (Yohane 1:18; 4:24) Noko ke, ubuntu bukaThixo sibubona kwizinto azenzileyo. Ngokomzekelo, iindidi ezikhoyo zeziqhamo neentyatyambo zisibonisa uthando nobulumko anabo. Ubukhulu bendalo yonke busibonisa amandla akhe.—Funda amaRoma 1:20.

IBhayibhile inokukufundisa okungakumbi ngobuntu bukaThixo. Ngokomzekelo, isixelela oko uThixo akuthandayo nangakuthandiyo, indlela abaphatha ngayo abantu nezinto azenzayo kwiimeko ezahlukeneyo.—Funda iNdumiso 103:7-10.

3. Ngaba uThixo unalo igama?

UYesu wathi: “Bawo wethu osemazulwini, malingcwaliswe igama lakho.” (Mateyu 6:9) Nangona uThixo enezibizo ezininzi, igama lakhe linye. Libizwa ngeendlela ezahlukahlukeneyo. NgesiXhosa kuthiwa “nguYehova.” Kodwa abanye bathi “Yahweh.”—Funda iNdumiso 83:18.

Igama likaThixo liye lakhutshwa kwiiBhayibhile ezininzi kwaza kwasetyenziswa izibizo ezithi Nkosi okanye Thixo. Kodwa xa kwakubhalwa iBhayibhile, igama likaThixo lalivela  izihlandlo ezingama-7 000. Xa wayexelela abantu ngoThixo, uYesu wabazisa igama likaThixo.—Funda uYohane 17:26.

Njengalo tata unothando, uThixo ufuna sonwabe ixesha elingenasiphelo

4. Ngaba uYehova usikhathalele?

Ngaba ukuxhaphaka kokubandezeleka kuthetha ukuba uYehova nguThixo ongakhathaliyo? Abanye abantu bathi usenza sibandezeleke ukuze asivavanye, kodwa bubuxoki obo.—Funda uYakobi 1:13.

UThixo unike uluntu inkululeko yokuzikhethela. Ngaba asiyixabisi inkululeko esinayo yokuzikhethela ukukhonza uThixo? (Yoshuwa 24:15) Kodwa abanye bakhetha ukwenza izinto ezimbi ebantwini, ngoko abantu abaninzi bayabandezeleka. UYehova uba buhlungu xa ebona ukungabikho kokusesikweni okunjalo.—Funda iGenesis 6:5, 6.

UYehova nguThixo osikhathaleleyo. Ufuna sibunandiphe ubomi. Kungekudala uza kuphelisa ukubandezeleka nabo bakubangelayo. Okwangoku, unesizathu sokuvumela ukubandezeleka okwexeshana. Kwisifundo 8, siza kufunda ngeso sizathu.—Funda eyesi-2 kaPetros 2:9; 3:7, 13.

5. Sinokusondela njani kuThixo?

UYehova uthi masisondele kuye ngomthandazo. Unomdla kuye ngamnye wethu. (INdumiso 65:2; 145:18) Ukulungele ukusixolela. Uyayiphawula imigudu esiyenzayo yokumkholisa, nakuba maxa wambi sisenza iimpazamo. Ngoko ke nakubeni singafezekanga, sinokusondela kuThixo.—Funda INdumiso 103:12-14; Yakobi 4:8.

Ekubeni uYehova esinike ubomi, simele simthande ngaphezu kwakhe nabani na. (Marko 12:30) Njengoko ubonisa ukuba uyamthanda uThixo ngokufunda okungakumbi ngaye nangokwenza oko akufunayo, uya kusondela ngakumbi kuye.—Funda eyoku-1 kaTimoti 2:4; 1 Yohane 5:3.

Funda Okungakumbi

Ngaba UThixo Unalo Igama?

UThixo unezibizo ezininzi, ezinye zazo nguSomandla, uMdali nesithi Nkosi. Kodwa igama likaThixo lisetyenziswa ngaphezu kwezihlandlo eziyi-7 000 eBhayibhileni.