I-Accessibility setting

Khetha ulwimi

Yiya kwelilandelayo

Yiya kwiziqulatho

Yiya kwinkcazelo

AmaNgqina KaYehova

IsiXhosa

UVUKANI! JANUWARI 2014

 AMAZWE NABANTU

Ukutyelela EItali

Ukutyelela EItali

I-ITALI lilizwe elinezinto ezahlukeneyo—ukusuka kumalwandle amade ukuya kwimimandla yentaba ezinamaxethuka; ihlobo eligqats’ ubhobhoyi emzantsi ukusa kubusika obuqhaqhazelis’ amazinyo emntla. Eli lizwe lineentaba-mlilo ezininzi, kodwa zimbalwa—njengeStromboli neNtaba iEtna—ezisaqhushumbayo.

I-Itali lelinye lawona mazwe anabantu abaninzi eYurophu. Lizaliswe ngabantu abaninzi abohlukeneyo njengama-Arabhu, abantu abasuka eByzantium, amaGrike, abantu baseNormandy namaFenike.

Abakhenkethi bakhwela iphenyane igondola kwimisinga yaseVenice

Eli lizwe linobuncwane obuninzi bezinto zakudala, izakhiwo nemizobo. Amabhodlo amandulo amaGrike namaRoma okanye izakhiwo ezimbejembeje zakudala ezaziwayo, zisathandwa nangoku kwiidolophu nezixeko ezininzi zaseItali. Imizobo, imifanekiso eyenziwe ngamatye emabhile kunye nemithombo eyenziwe kakuhle, yimisebenzi yeencutshe ezinjengoBernini, uMichelangelo noRaphael.

Ukutya kuyinto ebalulekileyo kubomi babantu balapha yaye kumatheko amaninzi kubakho okona kutya kuthandwayo. Amaxesha amaninzi ipasta kuqalwa ngayo, ize ilandelwe yinyama okanye intlanzi nemifuno. Ioli  yomnquma isetyenziswa kakhulu, ekubeni ixhaphakile apha. Ipizza nerisotto kukutya okwaziwayo kwaseItali.

Ipasta iyinxalenye yokutya okuthandwayo kwaseItali

Abantu baseItali baziwa ngokuba nobubele nokubuk’ iindwendwe. Abantu beli lizwe bayakuthanda ukuncokola nabanye, ngenxa yoko kuqhelekile ukubona abantu bencokola kwiindawo zeembutho okanye behamba endleleni.

Abemi abaninzi beli lizwe bathi bangamaRoma Katolika, kodwa bambalwa abaya rhoqo ecaweni. Abantu abasakwenzi oko bakuxelelwa yicawa yaye abasayithobeli imithetho ekudala ikho ngokuqhomfa noqhawulo-mtshato.

AmaNgqina kaYehova ayanda eItali. Aziwa ngokushumayela nokufundisa abantu ngeBhayibhile, nangokuphila ngemilinganiselo yayo. Kukho amabandla amaNgqina kaYehova angaphezu kwe-3 000 elizweni lonke, yaye amaninzi kuwo ashumayela nakubantu abathetha iilwimi ezingesiso isiTaliyane. Kukho imfuneko yokufundisa iBhayibhile ngeelwimi zasemzini kuba kule minyaka ilishumi idlulileyo, liye laphindeka kathathu inani labantu bamanye amazwe eItali.

NGABA UBUSAZI?

Nangona iSixeko saseVatican siseRoma, besisoloko sililizwe elizimeleyo ukususela ngo-1929 yaye ngenxa yoko, abantu baseItali basigqala njengomhlaba wasemzini.

IDolomites enamaxethuka, ekummandla wentaba okwimpuma-ntshona yaseItali