I-Accessibility setting

Khetha ulwimi

Yiya kwelilandelayo

Yiya kwiziqulatho

Yiya kwinkcazelo

AmaNgqina KaYehova

IsiXhosa

UVUKANI! 2007-11

Ngaba Umele Uthembe Yonke Into?

Ngaba Umele Uthembe Yonke Into?

“Ungawathembi amaplanga abolileyo,” lawo ngamazwi ombhali wemidlalo oliNgesi, uWilliam Shakespeare. Enyanisweni, phambi kokuba unyathele kumgangatho wesikhephe owenziwe ngamaplanga kufuneka uqiniseke ukuba loo maplanga akabolanga.

LA MAZWI athethwa ngulo kaShakespeare ayavisisana nalawo abhalwa kwiminyaka emalunga nama-3 000 eyadlulayo, nguKumkani uSolomon wakwaSirayeli wamandulo owayesisilumko, athi: “Isidenge sikholelwa yonke into; abantu abakrelekrele bayawaqwalasela amanyathelo abo.” (IMizekeliso 14:15, Today’s English Version) Ewe, sisidenge kuphela esityhobeka nje ebomini samkele yonke into esiyivayo size senze izigqibo ezisekelwe kumacebiso angenasihlahla. Ukuthemba yonke into—njengokuchankcatha kumaplanga abolileyo—kunokuphumela kwintlekele yodwa. Usenokuzibuza, ‘Ngaba ukho umthombo onokuthenjwa, esinokufumana kuwo ukhokelo?

Ehlabathini lonke, abantu abazizigidi bathembele ngokupheleleyo kwincwadi endala kakhulu—ebizwa ngokuba yiBhayibhile Engcwele. Bathembele kukhokelo lwale ncwadi. Izigqibo abazenzayo zisekelwe kumacebiso ayo yaye benza ngokuvisisana neemfundiso zayo. Ngaba aba bantu kufana nokungathi bachankcatha kumaplanga abolileyo? Impendulo yalo mbuzo ixhomekeke kwindlela esiphendula ngayo umbuzo othi, Ngaba zikho izizathu ezivakalayo zokukholelwa eBhayibhileni? Lo Vukani! ukhethekileyo uthetha ngobungqina obuxhasa ezo zizathu.

Injongo yalo Vukani! asikokukunyanzela ukuba wamkele iinkolelo okanye iimbono ezithile zonqulo. Kunoko, ubonisa ubungqina obubambekayo obukhokelele izigidi zabantu ekukholelweni eBhayibhileni. Emva kokufunda amanqaku alandelayo, unokugqiba enoba ufanele ukholelwe eBhayibhileni kusini na.

Lo ngumbandela onzulu ngokwenene. Ngapha koko, ukuba ngokwenene iBhayibhile ngumthombo wokhokelo onokuthenjwa ovela kuMdali wethu, ufanele uhlolisise oko ikutshoyo iBhayibhile ukuze kungenelwe wena nabantu obathandayo.

Noko ke, okokuqala masikhankanye izinto ebalasele ngazo iBhayibhile. Ngokungathandabuzekiyo, le yincwadi ekhethekileyo ngokwenene.