I-Accessibility setting

Khetha ulwimi

Yiya kwelilandelayo

Yiya kwiziqulatho

Yiya kwinkcazelo

AmaNgqina KaYehova

IsiXhosa

IBhayibhile Kwi-Intanethi

INGUQULELO YEHLABATHI ELITSHA YEZIBHALO EZINGCWELE

Yobhi 38:1-41

38  Waza uYehova wamphendula uYobhi ekwisaqhwithi somoya+ wathi:   “Ngubani na lo usitha icebo Ngamazwi angenakwazi?+   Khawuncede, ubhinqe esinqeni sakho njengendoda eyomeleleyo, Mandikubuze, uze wena undazise.+   Wawuphi na ekusekeni kwam umhlaba?+ Ndixelele, ukuba uyakwazi ukuqonda.   Ngubani owamisa imilinganiselo yawo, ukuba uyazi, Okanye ngubani na owawulula ulutya lokulinganisa phezu kwawo?   Zitshone entwenini iziseko+ zawo, Okanye ngubani owabeka ilitye lawo lembombo,   Xa amakhwezi+ amemelela kunye ngovuyo, Yaye bonke oonyana bakaThixo+ bakhwaza bencoma?   Yaye ngubani na owavalela ulwandle ngeengcango,+ Olwaqalisa ukuphuma njengaxa ligqabhuka esibelekweni;   Xa ndabeka ilifu njengesambatho salo Nesithokothoko njengesithandelo sokulubopha, 10  Ndaza ndabeka imimiselo yam phezu kwalo Ndabeka umvalo neengcango,+ 11  Ndaza ndahlabela mgama ndathi, ‘Ungazokufikelela apha, ungadluli;+ Yaye amaza akho adlokovayo apheleliselwa apha’?+ 12  Ngaba intsasa wayiyalela ukusukela ngemihla yakho ukuya phambili?+ Ngaba nguwe owabangela isifingo sayazi indawo yaso, 13  Ukuba sibambe iziphelo zomhlaba, Ukuze abangendawo bavuthululwe kuwo?+ 14  Uziguqula njengodongwe+ ngaphantsi kwetywina, Nezinto zima endaweni yazo njengakwisinxibo. 15  Yaye ukukhanya bayakuvinjwa abangendawo,+ Nengalo ephakamileyo iyaphulwa.+ 16  Ngaba ufikile emithonjeni yolwandle, Okanye ngaba uye wahambahamba+ ufuna amanzi anzongonzongo?+ 17  Ngaba amasango okufa+ atyhiliwe kuwe, Okanye ngaba unokuwabona amasango ethunzi elimnyama?+ 18  Ngaba uziqwalasele ngengqiqo iindawo ezibanzi zomhlaba?+ Ndixelele, ukuba uzazile zonke. 19  Iphi na ke ngoku, indlela ukukhanya okuhlala kuyo?+ Ke bona ubumnyama, iphi na indawo yabo, 20  Ukuze ubuthabathele emdeni wabo Nokuze uziqonde iindlela eziya endlwini yabo? 21  Ngaba uzazile na kuba wazalwa ngelo xesha,+ Nangenxa yokuba lininzi inani leentsuku zakho? 22  Ngaba ungenile koovimba bekhephu,+ Okanye ngaba ubona kwanoovimba besichotho,+ 23  Endibagcinele ixesha lokubandezeleka, Imini yokulwa nemfazwe?+ 24  Iphi na, ke ngoku, indlela ukukhanya okuzaba ngayo, Nomoya wasempuma+ osasazeka ngayo phezu komhlaba? 25  Ngubani owahlule umjelo ukwenzela isikhukula Nendlela yamafu esiphango,+ 26  Ukuyenza ine elizweni ekungekho mntu kulo,+ Phezu kwentlango ekungekho mntu wasemhlabeni kuyo, 27  Ukwanelisa iindawo ezibethwe sisiphango neziphanzileyo Nokubangela ingca ihlume?+ 28  Ngaba imvula inaye na uyise,+ Okanye ngubani na owazala amathontsi ombethe?+ 29  Umkhenkce uphuma esiswini sikabani na, Ke yona iqabaka+ yezulu, ngubani na eneneni oyizalayo? 30  Amanzi azifihla ngokungathi kungelitye, Naphezu kwamanzi anzongonzongo uzenza ubumbane.+ 31  Ngaba ungayibopha iqine imixokelelwane yekroza leKima, Okanye ngaba ungazikhulula na iintambo zekroza leKesile?+ 32  Ngaba ungalivelisa ikroza leMazaroti ngexesha lalo elimisiweyo? Ke lona ikroza leAsh, ngaba ungalihambisa ecaleni koonyana balo? 33  Ngaba uyayazi imimiselo yamazulu,+ Okanye ngaba igunya lalo ungalibeka emhlabeni? 34  Ngaba ilizwi lakho ungalinyusela elifini, Ukuze amanzi amaninzi akugubungele?+ 35  Ngaba ungathumela imibane ukuze iphume Ize ithi kuwe, ‘Sithi aba!’? 36  Ngubani owafaka ubulumko+ kwiingcamba zamafu, Okanye ngubani na owanikela ukuqonda+ kwizinto ezenzeka emafini? 37  Ngubani onokuwabala kanye kanye amafu ngobulumko, Okanye iingqayi zamanzi amazulu—ngubani na onokuzithulula,+ 38  Xa uthuli lugalelwa ngokungathi kukwinto etyhidiweyo, Okanye amagada omhlaba enamathela kwamanye? 39  Ngaba ungayizingelela ixhoba ingonyama Yaye ngaba unokulanelisa na iphango leengonyama ezintsha,+ 40  Xa zibuthume ezindaweni zokuzimela,+ Okanye zilalele ezindaweni ezisitheleyo? 41  Ngubani olungiselela ihlungulu ukutya kwalo+ Xa amantshontsho alo ekhala kuThixo efuna uncedo, Xa ebhadu-bhadula ngenxa yokuba kungekho nto yokutya?

Umbhalo osemazantsi