IQumrhu Elilawulayo liqela labazalwana abambalwa abakhokela amaNgqina KaYehova emhlabeni wonke. Lenza le misebenzi:

•   Lijongene nomsebenzi wokwenza iimpapasho ezisekelwe eBhayibhileni, iintlanganiso nezikolo zamaNgqina KaYehova.—Luka 12:42.

•   Lijongene nomsebenzi wamaNgqina KaYehova owenziwa emhlabeni wonke, likhokela nakumsebenzi wokushumayela, nendlela ezisetyenziswa ngayo izinto ekunikelwe ngazo.

 IQumrhu Elilawulayo lilandela umzekelo ‘wabapostile nabadala baseYerusalem’ bexesha lamaKristu okuqala, ababesenzela ibandla lamaKristu izigqibo ezibalulekileyo. (IZenzo 15:2) Njengaloo madoda athembekileyo exesha lamaKristu okuqala, abazalwana abakwiQumrhu Elilawulayo afumana ukhokelo eBhayibhileni kuba ayaqonda ukuba uYehova uThixo umisele uYesu Kristu njengeNtloko yebandla.—1 Korinte 11:3; Efese 5:23.

Ngoobani abazalwana abakwiQumrhu Elilawulayo?

 Abazalwana abakwiQumrhu Elilawulayo nguKenneth Cook, Omnci., uGage Fleegle, uSamuel Herd, uGeoffrey Jackson, uJody Jedele, uStephen Lett, uGerrit Lösch, uJacob Rumph, uMark Sanderson, uDavid Splane, noJeffrey Winder. Bakwikomkhulu lehlabathi eWarwick, eNew York, eU. S. A.

Lisebenza njani iQumrhu Elilawulayo?

 IQumrhu Elilawulayo liye lamisela iikomiti eziyi-6 ukuze zenze imisebenzi eyahlukahlukeneyo. Umzalwana ngamnye kubo usebenza kwenye yezi komiti okanye ngaphezulu.

•   IKomiti Yabanxibelelanisi: Le komiti ijongene nezinto zomthetho, iintlekele, naxa amaNgqina kaYehova etshutshiswa ngenxa yezinto azikholelwayo, nezinye iimeko zongxamiseko ezichaphazela amaNgqina KaYehova.

•   IKomiti Yabasebenzi: Ijongene namalungiselelo entsapho yaseBheteli.

•   IKomiti Yokupapasha: Ijongene nomsebenzi wokwenza iincwadi zeBhayibhileni, ukuzipapasha, nokuzithumela. Kunye nomsebenzi wokwakha iindawo esikhonzela kuzo, iiofisi zokuguqulela, namasebe.

•   IKomiti Yenkonzo: Ijongene nomsebenzi wethu wokushumayela ‘iindaba ezilungileyo ezingoBukumkani.’—Mateyu 24:14.

•   IKomiti Yokufundisa: Ikhokela umsebenzi wokulungiselela izinto eziqinisa ukholo esizifumana kwiintlanganiso, kwizikolo, kwizinto ezirekhodiweyo nakwiividiyo.

•   IKomiti Yokubhala: Ijongene nokulungiselelwa kweencwadi eziprintiweyo, ezikwiwebhsayithi yethu nomsebenzi wokuguqulela.

 Ukongezelela kulo msebenzi wenziwa zezi komiti, iQumrhu Elilawulayo lidibana veki nganye ukuze lithethe ngezinto ezidingwa yintlangano. Xa lidibene, lithetha ngeZibhalo lize livumele umoya oyingcwele kaThixo ulikhokele xa lisenza izigqibo limanyene.—IZenzo 15:25.

Ngoobani abancedisa iQumrhu Elilawulayo?

 NgamaKristu athembekileyo ancedisa iikomiti zeQumrhu Elilawulayo. (1 Korinte 4:2) Anobuchule namava kumsebenzi wekomiti nganye asebenza kuyo, ibe abakhona nakwintlanganiso yalo yeveki. Nangona engenzi zigqibo, la maKristu ayacebisa futhi eze nenkcazelo eyongezelelekileyo. Alandela izigqibo zekomiti aze ajonge iziphumo zezo zigqibo. Anokunikwa nemisebenzi liQumrhu Elilawulayo yokuba aye kwiindawo ngeendawo emhlabeni okanye anikele iintetho kwiintlanganiso zonyaka okanye kwigredi yaseGiliyadi.