ROPOTOꞌWA NHIMIROPODO

Daꞌãma watsiba dzaꞌra wamhã, ĩhöiba amo nhimirotsaꞌrada wama waihuꞌu petse dzaꞌra di dza. Wa dza duré ꞌröwi rotsaꞌrata petse dzaꞌra ni ĩhöiba amo höimanadzém na, ĩhöiba amo ꞌre ĩhöimana mono ne hã ꞌre wahöimana dzaꞌra mono da duré. Aibö romnhoré petse ꞌwa daꞌrãihiwanhana na Rick Hanson na ĩtsitsi te watsuꞌu wawaptãꞌãdzém hawi daꞌãma ĩwatsiba waihuꞌu petse dzaꞌra na.

ÃMA ROTSAꞌRATA AꞌÖ: E marĩ wa, daꞌãma watsiba waihuꞌu petse dzaꞌra di, abadze norĩ daꞌãma tsiba waihuꞌu dzaꞌra õ nherẽ. Ropotoꞌwai mreme te ãma rowatsuꞌu õhõ ne te te ĩwapoto dzaꞌra na. (Gênesis 1:26) Tawamhã, Ropotoꞌwa ma tô titsẽ marĩ ĩwẽ norĩ wahöimanadzém na, ĩtsine ꞌre wahöimana dzaꞌra mono da. Niꞌwa daꞌãma datsiba dzarina ꞌre höimana mono wamhã, te te ꞌre tsidzutsi Wapotoꞌwa Jeová höimanadzé. — Provérbios 14:31.

ROPOTOꞌWAI MREME NHIMIROWAHUDU

Ropotoꞌwa te waꞌãma ꞌre tsiba dzaꞌra, duré tãma ꞌru ti wa te robdzépada dzaꞌra da. Duréihã, Israel nhihudu norĩ ma tô robdzépata dzaꞌra Egito ãma pawaꞌöbö ãna te te dama romhuri dzaꞌra mono ré, duré rop tsi ꞌre ĩrotsaꞌwari mono ãma 40 na wahum na, rotsaꞌretse ãna ꞌre höimana dzaꞌra mono ré. Ropotoꞌwai mreme nhihödö te rowatsuꞌu Ropotoꞌwa nhimirotsaꞌrada ãne: “Õ norĩ hã te te ꞌre robdzépata dzaꞌra mono ré, õhõ dzama te te ꞌre robdzépata.” (Isaías 63:9 TNM) Ropotoꞌwa hã Israel nhihudu te te ĩrobdzépatadzé tãma waihuꞌu petse di, duré ĩtsine dzaꞌra ma tô te te ꞌre robdzépata. Ropotoꞌwa tsiꞌuihö na te watsuꞌu: “Wa hã ĩ̱ma waihuꞌu petse di, te te tô ꞌre ĩrobdzépata dzaꞌra mono dzé hã.” (Êxodo 3:7) Õ hã duré te tinha: “Niꞌwa te te aiꞌupi dzaꞌra waꞌaba wamhã, te dza ĩ̱tõmo upi.” (Zacarias 2:8 TNM) Tawamhã, ãhã romnhihötö norĩ dzarina, niꞌwa te te wawi roꞌwaꞌrutu dzaꞌra wamhã, Ropotoꞌwai wi hã dza te te ĩroꞌwaꞌrutu ne.

Nimahã na hã, wa rotsaꞌrata upa dzaꞌra ni Ropotoꞌwa waꞌãma ĩtsiba õ na hã. Tane nherẽ, Ropotoꞌwai mreme te rowatsuꞌu: ‘ꞌRe ĩhöimana uꞌötsi mono hã tsaꞌẽtẽ uptabi di, waꞌãma ꞌre ĩtsiwamri mono da hã, wanhimirotsaꞌrata nhipai u. Taha ma duré uburé marĩ hã waihuꞌu petse uptabi di.’ (1 João 3:19, 20) Ropotoꞌwai ma hã tãma wawaihuꞌu petse dzaꞌra di, watsiwaihuꞌu petse dzaꞌra nhipai u. Uburé waꞌãma romhöimanadzé duré wanhimirotsaꞌrada hã tãma waihuꞌu petse di. Ropotoꞌwa te waꞌãma aiba dzaꞌra.

Ropotoꞌwai mreme te tinha:

• “Te dza ĩꞌmahö, duré Jeová te dza atsadaꞌö; te dza tiwi ĩwaptẽ te te aipawaptob da, duré atsa te dza aima tinha: ‘Ãhãta wa ĩ̱höiba!’” — ISAÍAS 58:9 TNM.

• “‘Ĩ̱ma waihuꞌu petse di ĩ̱nhimirotsaꞌrada aima dzaꞌra waꞌwa”, ãne Jeová te tinha. “Wa ĩ̱tsima wẽ romharé aihĩni ma, mare di robdzépada. Wa ĩ̱tsima wẽ te aima tsõmri dzaꞌra waꞌaba da marĩ ĩwẽ dzô ꞌre atsimipari dzaꞌra waꞌaba mono da aptoꞌoré wab da. Te dza ĩ̱dzô aihörö dzaꞌra waꞌwa duré te dza ĩ̱tẽme atsina ĩrotété dzaꞌra waꞌwa rowaptẽrẽ na, duré wa dza aiwapari dzaꞌra waꞌwa.’” — JEREMIAS 29:11, 12 TNM.

• ‘Ĩ̱dzawi na hã, ĩ̱ꞌupini tsẽme ate uꞌawi ꞌre. E da te robꞌuiꞌéré õ bö ate ĩhöiwarobo na.’ — SALMO 56:8.

 ROPOTOꞌWA TE AIꞌMADÖꞌÖ WẼ

Ropotoꞌwa te waꞌãma aiba dzaꞌra. Tahã wama waihuꞌu dzaꞌra wamhã, wa dza wanhiptete dzaꞌra ni ropire wa te ꞌwapé dzaꞌra da. Rotsaꞌrata aꞌö Maria dzô ĩwatobrodzém na. Õ hã te watsuꞌu ãne:

“Maparane wahub ré, ĩ̱ꞌra ma tô te te ꞌwapé mono câncer. Taha parimhã, ma aiꞌutõ 18 na ãma ĩwahum na. Ãne wamhã, wa tô ꞌröwi rotsaꞌrata romhöimanadzé ĩꞌuwaibaba õ na duré ĩwatsété na. Wa tô ĩ̱nhitiꞌru Jeová dzada, marĩ te te ꞌmanharĩ õ wa ĩ̱ꞌra te te petse da!

“6 na ãma wahub parimhã, wa tô ĩ̱tsiwatsuꞌu ꞌröwi ĩ̱nhimirotsaꞌrada ĩ̱tsiwaihuꞌu ma. Õ hã watsiꞌrãꞌõtõdzé hawimhã duré ĩtsimidzawi pe. Ma tô ĩ̱ꞌãma aiba, Jeová ma hã tãma ĩ̱dzawi õ na hã te tãma nharĩ mono ré. Bötö ahö na ma tô ĩ̱wapari mono, te te ĩ̱mreme wãtari ãna. Taha parimhã, ma tô ĩ̱ma höiꞌré romnhihödö te te ĩ̱pẽꞌẽdzé wadzere hã, 1 João 3:19, 20 te te ĩnharĩ hã ãne: ‘ꞌRe ĩhöimana uꞌötsi mono hã tsaꞌẽtẽ uptabi di, waꞌãma ꞌre ĩtsiwamri mono da hã, wanhimirotsaꞌrata nhipai u. Taha ma duré uburé marĩ hã waihuꞌu petse uptabi di.’ Õ hã ma tô duré ĩ̱ma ãma rowatsuꞌu Jeová ma hã uburé ĩ̱ꞌãma romhöimanadzé hã tãma ĩwaihuꞌu petse na hã.

“Taha nherẽ, ĩ̱nhitiꞌrui uꞌö wa tô ꞌre ĩ̱höimana. Tawamhã, wa tô tsõré Salmo 94:19: ‘Ĩ̱pẽꞌẽ ꞌre ĩ̱hötöꞌö dzaꞌẽtẽ na ꞌre ĩ̱höimana mono wamhã, te a hã ꞌre ĩ̱pẽꞌẽ tété uꞌötsi mo. Te duré tsaꞌẽtẽ na ĩ̱pẽꞌẽ to ĩ̱ma ꞌre ĩtsõmri mo, ĩ̱pẽꞌẽ ꞌremhã.’ Tahã ma tô ĩ̱ma tsihötö ni! Nimahã bötö pari, ĩ̱hötöꞌödzém na te tiwi rowaptẽrẽ waihuꞌu petse di. Ĩ̱ma rowẽ di, Ropotoꞌwa te te ĩ̱wapari wa duré ĩ̱ꞌãma tsiba wa.”

E niha ĩwẽ waihuꞌu wamhã Ropotoꞌwa aiꞌãma ĩtsiba na. Bété, e niha bö daꞌahö na te natsi robdzépata dzaꞌra ni. E Ropotoꞌwa te te ꞌre wahö dzaꞌra wawatsété uꞌöbö. E nimahã bötö na te dza aꞌuprotsi robdzépada. ꞌMadöꞌö ĩtsadaꞌöbödzé ĩwaꞌõno ĩhöiba amo na.