Ropotoꞌwa ma poto dahöiba hã datsiꞌuihö na datsitséptöꞌö da. Datsiꞌuꞌa wamhã, dahöiba waptu na te dza ãma tsãnaꞌrata ni datsiꞌmadöꞌö da: te dza tsadzö dawapru hã dawi watobro tõ da, te dza tsito ĩꞌwaꞌre, duré dahö ĩté te dza tsima ꞌmaꞌmanha.

ÃMA ROTSAꞌRATA AꞌÖ: Ropotoꞌwa ma poto wahöiba hã watsiꞌuihö na watsitséptöꞌö dzaꞌra da. Tawamhã, wa dza umnhatsi dzaꞌra ni õ hã dza te te ĩwapawaptob dzaꞌra na ꞌröwi wapẽꞌẽ na robdzeiꞌõꞌdzém na watsipetse dzaꞌra da. “Te petse ĩpẽꞌẽdzé dzaꞌra norĩ hã; duré te wede ĩꞌwaꞌre norĩ hã.” (Salmo 147:3 TNM) Robdzépata wamhã, e niha aima waihuꞌu petse di dza ã bötö mono na hã duré aptoꞌoré hã Ropotoꞌwa aipẽ hã te te ĩpetse na hã dza.

ROPOTOꞌWAI MREME NHIMIROWAHUDU

Ropotoꞌwa te aima ropitsutu: “Aipahi tõ, atsiré wa ꞌre ĩ̱höimana. Aihötöꞌö tõ, wa hã ate Ropotoꞌwai wa. Wa dza atsiptete, ĩ̱he, wa dza aipawapto.” (Isaías 41:10 TNM) Niꞌwai ma hã Jeová te te ãma ĩrotsaꞌrata na tãma waihuꞌu petse wamhã, te dza rowẽ na ꞌre höimana, duré te dza tsiptete ropire mono hã te te ꞌre ꞌwapé mono da. Duréihã, Paulo ma tô ãma rowatsuꞌu ãhã rowẽ, ‘ꞌRe ĩhöimana uꞌötsi mono te rowẽ uꞌö na hã, niꞌwa te te ĩtsadaihuꞌu waihuꞌu õ na hã’. Duré Paulo ma tô tinha ãne: ‘Uburé marĩ hã te ꞌre aꞌmanharĩ waihuꞌu petse mono di, ꞌre ĩ̱nhiptete mono ꞌwa hã te te ꞌre ĩ̱nhiptete mono wa.’ — Filipenses 4:4-7, 9, 13.

Ropotoꞌwai mreme te tsiptete wanhimidzadze Jeová nhimiropitsutu norĩ na aptoꞌoré wab da. Ãma ĩtsimiré, Apocalipse 21:4, 5 te tinha e marĩ Ropotoꞌwa te dza ꞌmanha, duré e marĩ wa, wa dza umnhatsi dzaꞌra ni:

• ‘Te dza ĩtõmo u hã uburé tãma uꞌõ dzaꞌra.’ Te dza aꞌuprotsi uburé wa te ĩrobdzépata dzaꞌra dzé. Te dza duré uprotsi ĩwahötöꞌö dzaꞌra dzé, marĩ na ĩwahötöꞌö dzaꞌra hã da te tsadaihuꞌu dzaꞌra õ nherẽ.

• Ropotoꞌwa te nhamra höiwa ãma ‘apito tsimatsitsidzém na’. Õ hã Rotiꞌwa Ĩwaihuꞌu pe, duré tinhiptetedzém na te dza wapawaptob dzaꞌra apö wa te robdzépata dzaꞌra tõ da.

• Jeová nhimiropitsudu ‘tô tsena uptabi, duré danhipai u ĩpire, da te ꞌre ĩꞌumnhatsi dzaꞌra mono da hã.’ Õ hã Ropotoꞌwa ĩꞌuptabi wa, wa dza umnhatsi petse dzaꞌra ni ĩtsimiropitsutudzém norĩ hã dza te te ãma ĩꞌaꞌuwaimrami na hã.

‘“Te dza ĩtõmo u hã uburé tãma uꞌõ dzaꞌra. Tawamhã dadöꞌö õ di dza oto. Duré robdzeiꞌõ hã höimana õ di dza oto, duré dawawa hã duré dahödzé dzama. E marĩ wa. Marĩ ĩꞌratare hã oto tsiꞌutõrĩ petse dzaꞌra wa dza.” Tawamhã Apito tsimatsitsidzém na ĩtsãmra hã ma tô tinha, ãne: “Ãhã na hã wa dza oto ahö té, uburé marĩ hã.” Ma tô duré ĩ̱ma tiꞌru, ãne: “Maꞌãpé ãne na ãma robꞌuiꞌéré. E marĩ wa. Ã hã romreme hã tô tsena uptabi, duré danhipai u ĩpire, da te ꞌre ĩꞌumnhatsi dzaꞌra mono da hã.”’ — Apocalipse 21:4, 5.

Ropotoꞌwa nhimiropodo duré Ĩmreme nhihödö te höiꞌré dzahuré ĩhöimanadzé. Mreme ãna, ĩtsimiropoto norĩ te wadzô tihörö dzaꞌra õhõ ãma watsiwaihuꞌu petse dzaꞌra da. Duré Ropotoꞌwai mreme te tinha: ‘ꞌRe ĩhöimana uꞌötsi mono u atsina rotété petse dzaꞌra waꞌaba. Tawamhã te dza atẽme tsina rotété ꞌwa.’ (Tiago 4:8) Atos 17:27 te tinha Ropotoꞌwa ‘romhö na wanhiti dzaꞌra ꞌre ĩhöimana mono õ na.’

Bödö atsima pitsutu wamhã Ropotoꞌwa hã aima waihuꞌu da, te dza ĩꞌumnha ‘te te ꞌre ĩꞌaiꞌmadöꞌö uꞌötsi mono na.’ (1 Pedro 5:7) E niha Jeová ãma ĩꞌumnhatsidzé hã te dza aipawapto.

ꞌMadöꞌö Toru watsuꞌu, Japão ãma. Ĩmama Cristo dzadawa dzamarĩꞌwa na te te prédum nherẽ, õ hã ma tô ꞌre höimana daꞌubumro ĩwatsété uptabi me, Yakuza na ĩtsitsi. Te watsuꞌu: “Wa tô te rotsaꞌrata Ropotoꞌwai ma, wa hã tãma ĩ̱ꞌru ti. Niꞌwa ĩ̱ꞌratamhã döꞌö parimhã, wa natsi rotsaꞌrata Ropotoꞌwa te te ĩ̱ꞌadzöri na hã. Wa ãma rotsaꞌrata petse danhipai u niꞌwa ĩ̱ma tsawi pe döꞌö wamhã.” Ĩhöimanadzéb uꞌöbö, ma tô tihöiba “daꞌãma ĩtsibadzéb ãna duré daꞌãma ĩpẽꞌẽdzé õ na”. Te watsuꞌu: “Wa tô ĩ̱tsima wẽ ĩ̱höibatéb ré ĩ̱döꞌö da, duré niꞌwa ĩ̱nhipai u ĩpire hã te wĩrĩ wa, daꞌahö na da te ĩ̱waihuꞌu dzaꞌra da.”

Tane nherẽ, õ hã timro me Ropotoꞌwai mreme na te te romnhoré dzahuré parimhã, Toru ma tô ãma tsaprĩ uburé tihöimanadzém na duré tinhimirotsaꞌrata na. Ĩmro, Hannah ĩtsitsi hã, te watsuꞌu: “Ĩ̱tsiꞌuihö na wa tô ꞌmadö niha na ĩ̱mro te te ãma ĩtsaprĩdzém na tihöimanadzéb ãma.” Ã bötö na hã, Toru te watsuꞌu: “Ĩ̱ma waihuꞌu petse di Ropotoꞌwa tô ꞌre ĩhöimana  mono na hã duré te te waꞌãma ĩrotsaꞌrata dzaꞌra na hã. Te te tsima wẽ õ di dadöꞌö dzaꞌra da. Taha waꞌrãmimhã, te tsima wẽ dawatsédé te te pari da hã tô tsena datsiꞌruiwapari dzaꞌra norĩ ma hã. Ãté marĩ na wa te dama nharĩ waihuꞌu dzaꞌra õ di dza, da te tsadaihuꞌu dzaꞌra õ wa. Tadzahã, taha na wa te tiwi rowaptẽrẽ dzaꞌra wamhã, Ropotoꞌwa te dza te te ꞌre wawapari uꞌötsi dzaꞌra. Romhutu na, Jeová te dza aꞌuprotsi uburé ropire norĩ, robdzépada duré dahötöꞌödzé. Duré ã bötö na hã, te wapawaptob uꞌötsi dzaꞌra. Tãma wadzawi petse dzaꞌra di duré te waꞌãma rotsaꞌrata dzaꞌra wama robdzeiꞌõ dzaꞌra wamhã.” — Salmo 136:23 TNM.

Toru höimanadzé watsuꞌu dzarina, ĩwẽ uptabi wama waihuꞌu petse dzaꞌra wamhã Ropotoꞌwa uburé robdzépada te te ĩꞌuprotsi waihuꞌu petse na hã. Tô tahã te dza ꞌmanha romhutu na, duré te dza watõmo u hã uburé wama uꞌõ dzaꞌra. Tahã wama waihuꞌu petse dzaꞌra wamhã, wa dza umnhatsi petse dzaꞌra ni ã bötö mono na hã wama ĩrobdze waihuꞌu petse dzaꞌra na, duré marĩ ĩwẽ dzô tsi ĩré na hã wanhimipari dzaꞌra da aptoꞌoré wab da. Daro mono bö robdzépada ꞌre höimana mono nherẽ, aima waihuꞌu petse wamhã Ropotoꞌwai ma hã a hã tãma ĩtsawi na hã, aima rowẽ uptabi di dza.