Skip to content

Skip to secondary menu

Skip to table of contents

Wichi toj yen Lhometa Heowa

wichi

Chufwenhen ales

 NʼOCHUFWENYAJ 5

Samuel ifwalapej iwoye tʼat mʼayhay toj isen

Samuel ifwalapej iwoye tʼat mʼayhay toj isen

Talhe lewhay toj kamaj Samuel hope hanʼofwaj, lham tachumlhi toj ihi Dios lewʼet toj nʼotʼamajchet. Hop lhipna hope pʼante lhip toj wichi ihoye toj nʼokwiyej Heowa. ¿Ha lehanej atsi mʼak toj tamenej toj Samuel iyej hop Dios lewʼet toj nʼotʼamajchet? Toj ichun lhek natetshan mʼak toj iyej pʼante lako toj lhey Ana.

Wujpe lewhay toj Ana iwohiyetʼa (ha iwuhisey) pʼante che iwo lhasa, tej toj matche toj ihuminchek iwo lhasa. Hop toj tamenej toj iwo tʼalhyajaye pʼante Heowa wet tʼalheje pʼante lechʼotyaj. Lham ifwenho pʼante Heowa, che iwo lhasa, ichajiyela hop lhas hopkhilak tachumlhi toj ihi Dios lewʼet toj nʼotʼamajchet. Heowa nichulho pʼante letʼalhyaj, wet iwo pʼante lhasa, yen pʼante lheya Samuel. Toj malhyejtso Ana yam pʼante matche mʼak toj yome, tsi lewhay toj lhas hiwʼen pʼante tres wok cuatro nekchomis ihane pʼante Dios lewʼet toj nʼotʼamajchet hopkhilak tachumhoplhi Dios.

Elí hope pʼante sacerdote toj lhamya toj ihi Dios lewʼet toj nʼotʼamajchet. Iche pʼante dos leles toj ihi lhiptso toj tachumwetha. Tichunla, hop Dios lewʼet toj nʼotʼamajchet hope pʼante lhip toj is che nʼonʼokwiyej Heowa, wet wichi toj ihi lhiptso is che yam isis lakeyis toj iwoye. Mat Elí leles iwoye pʼante wujpe mʼayhay toj matche toj niʼisa. Samuel hiwʼen pʼante tʼat mʼak toj lhamel iwoye. ¿Ha Samuel iten mʼayhay toj niʼisa toj Elí leles iwoye pʼante?​... Kha, itenhitʼa pʼante. Lham yikchufwi pʼante toj iwoye mʼayhay toj ische alhoho toj lajcha wet lako ichufwenej pʼante.

¿Atsi toj atichunhayaj? ¿Atsi pʼante toj is che Elí iwoyeje leles?​... Lham is pʼante che itiyej lefwonyaj leles. Lham isitʼa pʼante che iwahnej toj lhamel yikchufwi toj tachumwetha toj ihi Dios lewʼet. Mat Elí iwohiyetʼa pʼante tajtso. Hop toj tamenej toj Heowa itiyej pʼante lewak lhamel. Toj malhyejtso Heowa ikalelhat toj itihiyeja tʼat letasnhayaj hop lhamel.

Samuel ifwele pʼante hop nʼosilatyaj Elí

Iche pʼante honatsi toj Samuel ima, wet ilate pʼante toj iche nʼoelh toj tʼane wet yok: ‹¡Samuel!›. Lham inu alhoho toj ihoye Elí, mat Elí yome toj yok: ‹Otʼanhitʼane ame›. Yachajopej dos toj Samuel ilate toja. Toj tafwaytshi lhimpaj lewhay, Elí tahuyej pʼante Samuel toj che lham yachajo toj ilate hop nʼopaktso, lham is che yok: ‹Pʼaltsennʼo Heowa, tahuy nʼoyej, otchʼahu ame›. Hop tajtso mʼak toj iwoye pʼante  Samuel. Hope tʼat lewhaytso toj Heowa ifwenho Samuel toj yok: ‹Fwenho hop Elí toj otihiyeja okalelhtayaj hop lewʼet lheley hop toj iwoye mʼayhay toj niʼisa›. ¿Ha lefwetaj hope pʼante mʼak toj athahitʼa toj Samuel is che ifwenho nʼosilatyajna hop Elí?​... Hope pʼante mʼak toj atha. Mat tej che Samuel noway, iwoye pʼante. Heowa yam matche pʼante lhomtes. Dos Elí lelesna nʼolanhen pʼante wet lham hate yʼil pʼante.

Samuel matche toj is mʼak toj iwoye pʼante wet tʼuhawetej che naten. Lham iwoye pʼante mʼak toj is tej toj hiwʼen pʼante iyhaj wichi toj iwoye mʼak toj niʼisa. Wet am, ¿ha ahatehla iwoye Samuel toj yikchufwi toj iwoye mʼayhay toj ische alhoho? Che am lewoye tajtso, iwoyek lewo kajyaja Heowa, ajcha wet ako.

TETSHAN TOJ IHI DIOS LHOMTES

  • 1 Samuel 2:​22-​26; 3:​1-​21