Skip to content

Skip to secondary menu

Skip to table of contents

Wichi toj yen Lhometa Heowa

wichi

Chufwenhen ales

 NʼOCHUFWENYAJ 3

Rahab tʼekhaye pʼante Heowa

Rahab tʼekhaye pʼante Heowa

Lhek natichunla che nehi hupuy toj lhey Jericó, toj ihi pʼante Canaán. Wichi toj ihi tʼekhahiyetʼa pʼante Heowa. Mat, iche pʼante atsinha toj lhey Rahab toj ihi pʼante lhiptso.

Lewhay toj Rahab hope pʼante hanʼofwaj, ilatchepej chi malhyej toj Moisés ifwoyenche Lewomekchat wet toj itompha hop Israel lhayis toj ihi Egipto. Hate ilatchepej atsi mʼak toj iwoye pʼante Heowa toj tachʼote lhamel hopkhilak ikalhi letayhfwas lewhay toj ichepej nʼokaʼtshayajay. Mat athana lham ilatchʼoye toj Israel lhayis iwhaye hop Jericó.

Rahab tachʼote pʼante hop dos Israel lhayis tsi tʼekhaye pʼante Heowa

Iche pʼante honatsi toj ihi dos Israel lheley toj nʼochene pʼante Jericó hopkhilak ihanej mʼayhay toj ihi lhiptso. Lhamel ihoye pʼante Rahab lewʼet wet tʼalhe pʼantek lhamel ihi tʼat lewʼet. Honatsitso, hop niyat toj ihi Jericó ilatchʼoye pʼante toj Israel lhayisna ihi Rahab lewʼet. Toj malhyejtso niyat ichen hinʼul toj is che tʼukwe. Rahab iskat pʼante hop Israel lhayistso, itiʼpe pʼante lewukwe lhetekchʼo wet atsinhana ifwenho pʼante niyat kawos toj yok: ‹Hop Israel lhayis toj amel letʼukwe nechʼene toj yikhen, mat che amel lehan lenʼayij iwoyek amel lefwit lhamel›. ¿Ha lehanej atsi toj tamenej toj Rahab tachʼote pʼante hop Israel lhayisna?​... Tsi hop toj lham tʼekhaye pʼante Heowa wet ihanej tʼat toj hiwʼenhohla honhat toj Canaán hop Israel lhayis.

Toj kamaj Israel lhayisna iyej hop Rahab lewʼet, lhamel ifwenho atsinhana toj lham wet lewʼet lheley yʼinhihentʼala lewhay che nʼotayhat Jericó. ¿Ha lehanej atsi pʼante toj lhamel ifwenho toj atsinha is che iwoye?​... Lhamel yopʼantek: ‹Chuma hop niyakw toj ichat, wet lefwuhatlhi toj letihi ventana toj alhoye. Che lewoye tajtso, nilhokej hawʼet lheley yʼinhihentʼala›. Rahab iwoye tʼat hop Israel lhayistso lhomet. ¿Ha lehanej mʼak toj iche pʼante toj paj?​...

Heowa ifwayhat pʼante hop Rahab wet lewʼet lheley

Toj tafwaytshi pʼante ifwalastso, hop Israel lhayis lhamel ilunejlhi Jericó, mat tʼanhihentʼa. Seis ifwalas toj lhamel ilunejlhipej hop hupuytso, mat tajlhamet wʼeihalhapej ifwala toj ilunejlhi. Mat, toj ifwala siete lhamel ilunejlhi pʼante hupuy siete toj yachajopej wet toj paj nilhokej lhamel ifwitsenejen toj tʼanhen. Hop lewhaytso Heowa ithat kanhi pʼante nʼolafwek toj ilunej hupuy. Mat hop nʼowukwe toj niyakw toj ichat iyej laka ventana, ihi pʼante toj ihi. ¿Ha iwoyek lewʼen mʼayhay toj ihi nʼopeyakna?​... ¡Rahab wet lewʼet lheley yʼinhihentʼa pʼante!

 ¿Atsi toj ichufwen amej mʼak toj iyej pʼante Rahab?​... Rahab tʼekhaye pʼante hop Heowa tsi iseltej pʼante toj ihanej nilhokej mʼayhay toj Heowa iwoye pʼante. Am hate iwoyek alechufwenej wus mʼayhay toj isis toj Heowa iwoye pʼante. ¿Ha letʼekhaye Heowa malhyej iwoye Rahab?​... Olhamel ohanej toj am iwoyek lewoye tajtso.

TETSHAN TOJ IHI DIOS LHOMTES

  • Josué 2:​1-​24; 6:​1-5, 14, 15, 20-​25

  • Hebreos 11:31